Joshuwa 4 - Siswati 1996 Bible

Kumiswa kwematje esikhumbuto

¹ Kwatsi kube sonkhe sive sema-Israyeli sicedze kwewela umfula iJordane, Simakadze wakhuluma kuJoshuwa, watsi:

² “Khetsani emadvodza lali-12, kube yindvodza yinye kuleso nakuleso sive,

³ niwatjele atsatse ematje lali-12 ekhatsi nemfula iJordane, akhuphuke nawo lapho bekume khona baphristi, awetfwale ayekuwabeka phansi lapho nitawumisa khona lamuhla kusihlwa.”

⁴ Joshuwa wabita emadvodza lali-12 labesawakhetsile ka-Israyeli, yinye kuleso nakuleso sive.

⁵ Joshuwa wakhuluma kuwo, watsi: “Hambani embikwelibhokisi lesivumelwane saSimakadze Nkulunkulu wenu, ningene ekhatsi nemfula iJordane, ngulowo nalowo wenu atsatse litje aletjatse ehlombe, kuye ngelinani letive tonkhe tema-Israyeli,

⁶ loko kube luphawu emkhatsini wenu. Kuyawutsi bantfwabenu nababuta, batsi: ‘Lamatje lawa asho kutsini?’

⁷ bese niyabatjela kutsi emanti eJordane ema angete ageleta, ngesikhatsi kwewela libhokisi lesivumelwane saSimakadze. Latsi nalewela iJordane, emanti ema angete ageleta. Lamatje ayawuba sikhumbuto esiveni sema-Israyeli phakadze naphakadze.”

⁸ Ngako ema-Israyeli enta njengobe abeyalwe nguJoshuwa. Atsatsa ematje lali-12 ekhatsi nemfula iJordane, kwaya ngelinani letive tema-Israyeli, njengobe Simakadze abeyale Joshuwa. Awatsatsa akhuphuka nawo aya endzaweni, lapho ema-Israyeli emisa khona, bawabeka phansi khona lapho.

⁹ Joshuwa wemisa lamatje lali-12 labesekhatsi neJordane, lapho bekume khona baphristi lababetfwele libhokisi lesivumelwane; asekhona lapho nalamuhla loku.

¹⁰ Baphristi lababetfwele libhokisi lesivumelwane babemile ekhatsi nemfula iJordane, kwaze kwaphela konkhe loko Simakadze labekutjele Joshuwa kutsi akutjele sive; ngiko loko-ke Mosi labekutjele Joshuwa. Sive saphutfuma sewela ngekushesha,

¹¹ satsi nase sewele sonkhe saphelela, libhokisi lesivumelwane saSimakadze nebaphristi bakhuphukela ngesheya bonkhe bantfu babuka.

¹² Emadvodza esive sakaRubeni nesakaGadi nencenye yesive sakaManase akhuphuka nawo ahlomile ahamba embikwesive sonkhe sema-Israyeli, njengobe Mosi abebalayele.

¹³ Emadvodza labengaba ti-40 000 labehlomele imphi endlula embikwaSimakadze ewelela ematsafeni aseJerikho ayakulwa imphi.

¹⁴ Ngalelo langa Simakadze waphakamisa Joshuwa embikwaso sonkhe sive sema-Israyeli, sive samhlonipha Joshuwa imphilo yakhe yonkhe, njengobe sasimhlonipha naMosi.

¹⁵ Simakadze wakhuluma kuJoshuwa, watsi:

¹⁶ “Tjela baphristi labetfwele libhokisi lesivumelwane kutsi bakhuphuke emfuleni iJordane.”

¹⁷ Ngako Joshuwa wabita baphristi, watsi: “Khuphukani emfuleni iJordane.”

¹⁸ Baphristi bakhuphuka emfuleni betfwele libhokisi lesivumelwane saSimakadze. Batsi nabatsi catsatsa ngesheya, emanti emfula iJordane abuyela ageleta, agola tintsetse njengakucala.

¹⁹ Ngelilanga lelishumi enyangeni yekucala, sive sakhuphuka emfuleni iJordane sayawumisa eGilgali ngasemnyeleni waseJerikho longasemphumalanga.

²⁰ Joshuwa wawemisa eGilgali ematje lali-12 lababewatsetse emfuleni iJordane.

²¹ Wakhuluma kuma-Israyeli, watsi: “Ngesikhatsi lesitako titukulwane tenu natibuta kuboyise titsi: ‘Lamatje lawa asho kutsini?’

²² niyakutitjela nitsi: ‘Israyeli wewela iJordane ahamba emhlabatsini lowomile.’

²³ Ngobe Simakadze Nkulunkulu wenu wawomisa umfula iJordane embikwenu, naze newela nonkhe naphelela. Simakadze Nkulunkulu wenu wenta eJordane kona loko lakwenta eLwandle Lolubovu, ngesikhatsi alomisa embikwetfu, saze sewela sonkhe saphelela.

²⁴ Wakwenta loko kuze tonkhe tive temhlaba tati kutsi sandla saSimakadze sinemandla, nekutsi nani nihlale nimesaba Simakadze Nkulunkulu wenu phakadze naphakadze.”