Joshuwa 16 - Siswati 1996 Bible

Live lelabelwa baka-Efrayimu nebakaManase labasenshonalanga

¹ Live lelalisabelo saJosefa lalisuka eJordane malungana neJerikho, ngasemphumalanga netiyalu taseJerikho, lenyuke lidzabule lihlane licondze eveni letintsaba laseBetheli.

² Lelive lalisuka eBetheli, licondze eLuzi, lewelele ngesheya kwelive lema-Akhi, e-Atharothe,

³ lehlele ngasenshonalanga eveni lesive semaJafulethi, kuze kuyewufika esifundzeni saseBhethi Horoni Lengentasi, lendlulele eGezeri, ligcine elwandle.

⁴ Ngako-ke Manase na-Efrayimu, titukulwane taJosefa, tabelwa lelo lifa.

Efrayimu

⁵ Leli-ke bekulive lebaka-Efrayimu, lusendvo ngelusendvo: Umnyele wesabelo sabo wawusuka e-Atharothe Adari ngasemphumalanga, ucondze enhla neBhethi Horoni Lengenhla,

⁶ uchubeke uze ufike elwandle. Wawusuka eMikmethathi ngasenyakatfo, ujikele ngasemphumalanga ucondze eThanathi Shilo, ushaye edvute nayo, ucondze eJanoha ngasemphumalanga.

⁷ Wawusuka eJanoha ucondze e-Atharothe naseNara, utsintse eJerikho, uphumele ngale eJordane.

⁸ Kusuka eThaphuwa lomnyele wawucondza ngasenshonalanga emfudlaneni iKhana, ugcine elwandle. Leso-ke kwaba sabelo sesive saka-Efrayimu, lusendvo ngelusendvo.

⁹ Sasifaka ekhatsi onkhe emadolobha kanye nemiti yawo leyayehlukaniselwe sive saka-Efrayimu kanye nesabelo sesive sakaManase.

¹⁰ Atizange tikhone kuwacosha emaKhenani labehlala eGezeri; nalamuhla loku emaKhenani seloku ahlala ndzawonye nesive saka-Efrayimu, kodvwa asetjentiswa kamatima.