Joshuwa 13 - Siswati 1996 Bible

Live lelalisetawutsatfwa

¹ Kwatsi Joshuwa nasamdzala, asakhulile nangeminyaka, Simakadze wakhuluma kuye, watsi: “Sewumdzala kakhulu, kantsi kusenetifundza letinkhulu lekufanele titsatfwe.

² “Nali-ke lelive lelisasele: tonkhe tifundza temaFilisti netemaGeshuri,

³ kusukela eMfuleni iShihori, emphumalanga neGibhithe, kuye eveni la-Ekroni ngasenyakatfo, lonkhe libalwa ngekutsi lemaKhenani, live lebabusi bemaFilisti labasihlanu eGaza, nase-Ashdodi, nase-Ashkeloni naseGathi, kanye nase-Ekroni kulema-Avi;

⁴ kusukela eningizimu, kulo lonkhe live lemaKhenani, nekusukela eMeyara yemaSidoni kuze kube nguse-Afeki, emnyeleni welive lema-Amori,

⁵ nelive lemaGebali; nayo yonkhe iLebanoni ngasemphumalanga, kusukela eBhali Gadi, ngaphansi kweNtsaba iHemoni, kuye eLebo Hamathi.

⁶ “Tonkhe takhamiti tetifundza tetintsaba kusuka eLebanoni kuye eMisrefothi Mayimu, lokusho kutsi, onkhe emaSidoni, mine matfupha ngitatikhipha embikwema-Israyeli. Wena-ke lelive ubolabela ema-Israyeli ngenkatho, libe live lawo njengobe ngikuyalile.

⁷ Ubolaba kube lifa, ulabele letive letiyimfica nencenye yesive sakaManase.”

Kwabiwa kwelive langasemphumalanga neJordane

⁸ Incenye yesive sakaManase, nesive sakaRubeni, nesakaGadi tona tase tisemukele sabelo lesilifa lato kuMosi, watinika live lelingasemphumalanga neJordane njengobe yena, labeyinceku yaSimakadze, abesatabele.

⁹ Live labo lalisuka e-Aroyeri emngcengcemeni weMsaho wase-Anoni, nasedolobheni lelisemkhatsini weMsaho, lalifaka sonkhe sibebesi semmango waseMedeba kuze kuyewufika eDiboni,

¹⁰ nawo onkhe emadolobha aSihoni, inkhosi yema-Amori, labebusa eHeshboni, kuze kuyewufika emnyeleni wema-Amoni.

¹¹ Laliphindze lifake ekhatsi iGileyadi, nelive lesive sakaGeshuri nesakaMakha, nayo yonkhe iNtsaba iHemoni, nalo lonkhe laseBhashani, kuze kuyewufika eSalekha;

¹² lokusho kutsi ngiwo wonkhe umbuso wa-Ogi eBhashani, labeke wabusa e-Ashtarothe nase-Edreyi, labenguyena asesele angulomunye webekugcina besive semaRefa. Mosi abesincobile wabe sewutsatsa lelive laso.

¹³ Kodvwa ema-Israyeli akazange atidvungulule atikhiphe letive takaGeshuri nesakaMakha, ngako-ke tachubeka tahlala emkhatsini wema-Israyeli, kwaze kwaba ngulamuhla.

¹⁴ Kodvwa sive sakaLevi Mosi akazange asabele lifa ngesizatfu sekutsi iminikelo leyentiwa ngemlilo kuSimakadze, Nkulunkulu wema-Israyeli, ilifa lakaLevi, njengobe abemtsembisile.

Live lelabelwa sive sakaRubeni

¹⁵ Nali-ke live Mosi lalabela sive sakaRubeni, lusendvo ngelusendvo:

¹⁶ Live kusuka e-Aroyeri emngcengcemeni weMsaho wase-Anoni, nekusuka edolobheni lelisemkhatsini weMsaho, lifake ekhatsi sonkhe sibebesi semmango waseMedeba,

¹⁷ kuye eHeshboni kanye nawo emadolobha ayo labesetulu esibebesini labefaka ekhatsi iDiboni, neBhamothi Bhali, neBhethi Bhali Meyoni,

¹⁸ neJahasi, neKhedemothi, neMefathi,

¹⁹ neKhiriyathayimu, neSibima, neSerethi Shahari, egcumeni lelikuleso sihosha,

²⁰ neBhethi Pheyori, nemacele ePhisga, neBhethi Jeshimothi,

²¹ nawo onkhe lamanye emadolobha labesesibebesini nakuwo wonkhe umbuso waSihoni, inkhosi yema-Amori, labebusa eHeshboni. Mosi wayincoba lenkhosi kanye nebabusi baseMidiyani: bo-Evi, naRekhemu, naSuri, naHure, naReba, lababetihlanganise naSihoni, lababehlala kulelo live.

²² Ngetulu kwalabo lababebulewe emphini, ema-Israyeli abebulele agwaza Bhalamu, umsa waBheyori, labesangoma.

²³ Umnyele wemaRubeni kwakungumfula iJordane. Lamadolobha kanye nemiti yawo kwaba lifa lemaRubeni, lusendvo ngelusendvo.

Live lelabelwa sive sakaGadi

²⁴ Nali-ke live Mosi lalabela sive sakaGadi, lusendvo ngelusendvo:

²⁵ Kwaba live laseJazeri, nawo onkhe emadolobha akaGileyadi, nencenye yelive lema-Amoni kuze kuyewufika e-Aroyeri, eceleni kweRabha;

²⁶ nekusukela eHeshboni kuye eRamathi Mispa naseBhetonimu, nekusuka eMahanayimu kuye eveni laseDebiri,

²⁷ nasetihosheni eBhethi Haramu, naseBhethi Nimra, naseSukhothi, naseSafoni nawo wonkhe umbuso waSihoni, inkhosi yaseHeshboni, ngasemphumalanga neJordane, live lelenyuka liyewugcina ngeLwandle lwaseKhinerethi.

²⁸ Lamadolobha kanye nemiti yawo kwaba lifa lesive sakaGadi, lusendvo ngelusendvo.

Live lelabelwa sive sakaManase ngasemphumalanga

²⁹ Nali-ke live Mosi lalabela incenye yesive sakaManase, lokusho incenye yemindeni yetitukulwane takaManase, lusendvo ngelusendvo:

³⁰ Live lelisuka eMahanayimu lifaka ekhatsi yonkhe iBhashani, nawo wonkhe umbuso wa-Ogi, inkhosi yaseBhashani, nayo yonkhe imiti yaJayire lebeyiseBhashani, emadolobha langema-60,

³¹ nencenye yaseGileyadi, ne-Ashtarothe, ne-Edreyi, emadolobha a-Ogi, inkhosi yaseBhashani. Lelo-ke laba ngeletitukulwane taMakhire, umsa waManase, incenye yemadvodzana aMakhire, lusendvo ngelusendvo.

³² Leli-ke lifa Mosi labelabile ngesikhatsi asesematsafeni akaMowabi ngesheya kweJordane, emphumalanga neJerikho.

³³ Kodvwa sive semaLevi Mosi akazange asabele lifa, ngobe Simakadze, Nkulunkulu waka-Israyeli, ulifa laso, njengobe abesetsembisile.