Genesisi 3 - Siswati 1996 Bible

Kuwela kwemuntfu esonweni

¹ Inyoka yayinebucili kwendlula tonkhe tilwane tesiganga labetentile Nkulunkulu Simakadze. Yatsi kumfati: “Kodvwa ngempela Nkulunkulu ushito yini kutsi: ‘Ningadli nome ngusinye nje sitselo setihlahla letisensimini’?”

² Umfati waphendvula inyoka watsi: “Singatidla titselo tetihlahla letisensimini,

³ ngaphandle kwesitselo sesihlahla lesisekhatsi nensimi; Nkulunkulu utsite: ‘Ningasidli sitselo sesihlahla lesisekhatsi nensimi, ningasitsintsi nekusitsintsa, kuze ningafi.’ ”

⁴ Inyoka yatsi kumfati: “Ningeke nife.

⁵ Kepha Nkulunkulu uyati kutsi mhlazana nisidla, emehlo enu ayawuvuleka, bese nifanana naNkulunkulu nikwati lokuhle nalokubi.”

⁶ Ngako-ke watsi umfati kube abone kutsi lesihlahla sasifanelwe kudliwa, nekutsi sasibukeka sisihle, nekutsi lesihlahla sasifanele kumhlakaniphisa umuntfu, wakha kulesihlahla wadla. Wanika nendvodza yakhe, nayo yadla.

⁷ Emehlo abo bobabili ase ayavuleka, batibona kutsi bangcunu; base batfunga emacembe emkhiwa, batentela kwekuvunula.

⁸ Ekupholeni kwelilanga beva Nkulunkulu Simakadze ahambahamba ensimini; bo-Adamu nemkakhe bambhacela Nkulunkulu Simakadze emkhatsini wetihlahla tensimi.

⁹ Kodvwa Nkulunkulu Simakadze wabita Adamu watsi: “Ukuphi?”

¹⁰ Waphendvula watsi: “Ngive livi lakho ensimini, ngase ngiyesaba, ngobe ngihamba ngcunu; ngabhaca.”

¹¹ Nkulunkulu wambuta watsi: “Ngubani losakutjele kutsi uhamba ngcunu? Sewusidlile yini lesitselo salesihlahla lengakuyala ngaso kutsi ungabosidla?”

¹² Adamu waphendvula watsi: “Ngulomfati lowanginika yena kutsi ahlale nami, nguye lona longinike lesitselo, ngase ngiyasidla.”

¹³ Nkulunkulu Simakadze watsi kumfati: “Yini-ke lena lose uyentile?” Umfati watsi: “Ngikhohliswe yinyoka, ngase ngiyadla.”

Nkulunkulu ukhipha sigwebo

¹⁴ Nkulunkulu Simakadze watsi enyokeni: “Njengobe sewente loku, sewucalekiswe ngetulu kwato tonkhe tilwane: tonkhe tifuyo, nato tonkhe tilwane tesiganga. Sewuyawuhamba ngesisu sakho, ngesikhatsi sonkhe sekuphila kwakho udle lutfuli lwemhlabatsi.

¹⁵ Ngitawubeka butsa emkhatsini wakho nemfati, nasemkhatsini wentalo yakho nentalo yemfati. Yona iyawufihlita inhloko yakho, wena uyawuluma sitsendze sayo.”

¹⁶ Watsi kumfati: “Ngitakwandzisa buhlungu ekukhulelweni kwakho, bube bukhulu kakhulu; uyawutala bantfwana kabuhlungu. Kufisa kwakho kuyawubasendvodzeni yakho, yona iyakukubusa.”

¹⁷ Ku-Adamu watsi: “Njengobe ulalele livi lemfati wakho, wasidla lesitselo salesihlahla lengakuyala ngaso ngatsi: ‘Ungasidli,’ umhlaba sewucalekisiwe ngenca yakho. Sewuyakudla kuwo kamatima onkhe emalanga ekuphila kwakho.

¹⁸ Uyawukuvetela emanyeva nelukhula, wena uyakudla lokumila esigangeni.

¹⁹ Uyawusebenta kamatima, ukujulukele kudla kwakho, udzimate ubuyele emhlabatsini, ngobe vele watsatfwa kuwo; njengobe ulutfuli, uyawubuyela elutfulini.”

²⁰ Adamu wametsa umkakhe watsi ngu-Eva, ngobe waba ngunina wabo bonkhe labaphilako.

²¹ Nkulunkulu Simakadze wentela bo-Adamu nemkakhe kwekwembatsa kwetikhumba, wabembatsisa.

Bo-Adamu na-Eva bayacoshwa

²² Nkulunkulu Simakadze watsi: “Ase nibuke, Adamu sewunjengatsi, sewuyakwati lokuhle nalokubi. Angahle akhe kulesihlahla sekuphila adle, bese uphila kuze kube phakadze naphakadze.”

²³ Ngako-ke Nkulunkulu Simakadze wamcosha ensimini yase-Edeni, kutsi alime umhlabatsi labetsatfwe kuwo.

²⁴ Wamkhipha lo-Adamu; kwase kutsi ngasemphumalanga nensimi yase-Edeni wabeka emakherubhi kanye nenkemba lenelilangabi lephendvuphendvukako ilindze indlela leya esihlahleni sekuphila.