Genesisi 2 - Siswati 1996 Bible

Lilanga lesikhombisa

¹ Ngako-ke kwase kupheleliswe lizulu nemhlaba, nendalo yako konkhe.

² Ngelilanga lesikhombisa Nkulunkulu abesawucedzile wonkhe umsebenti wakhe labewenta; wase uyaphumula.

³ Ngako-ke Nkulunkulu walibusisa lilanga lesikhombisa, walingcwelisa; ngobe ngalo waphumula emsebentini wakhe wonkhe wekudala.

⁴ Ladalwa kanjalo-ke lizulu nemhlaba. Ngesikhatsi Nkulunkulu Simakadze enta umhlaba nelizulu,

Insimi yase-Edeni

⁵ kusete nakunye lokumilako emhlabeni, netibhidvo tisengakabikho, ngobe Nkulunkulu Simakadze abesengakayinisi imvula emhlabeni, kwakute umuntfu wekuwulima lomhlaba.

⁶ Noko kwenyuka inkhungu, iphuma emhlabatsini, yanisela wonkhe umhlaba.

⁷ Nkulunkulu Simakadze wase ubumba umuntfu ngelutfuli lwemhlabatsi, waphefumulela umoya wekuphila emakhaleni akhe; umuntfu wase uba ngumuntfu lophilako.

⁸ Nkulunkulu Simakadze wahlanyela insimi yase-Edeni ngasemphumalanga; wambeka khona-ke lomuntfu labesamentile.

⁹ Nkulunkulu Simakadze wamilisa emhlabatsini tonkhe tihlahla letibukekako letimnandzi; ekhatsi nensimi wamilisa sihlahla sekuphila kanye nesihlahla sekwati lokuhle nalokubi.

¹⁰ Kwavela umfula lowageleta wanisela insimi yase-Edeni, udzabula ekhatsi nayo, bese wehlukana uba ngimifula lemine.

¹¹ Libito lemfula wekucala yiPhishoni; ngulona logeleta utungelete lonkhe live laseHavila, lapho kunegolide khona.

¹² Igolide yalelo live yinhle kakhulu; kunenhlaka yebhedola kanye nelitje isholamu kulelo live.

¹³ Umfula wesibili yiGihoni; ngiwo logeleta utungelete lonkhe live laseKushe.

¹⁴ Libito lemfula wesitsatfu yiThigrisi, logeletela ngasemphumalanga ye-Asiriya. Umfula wesine yiYufrathe.

¹⁵ Nkulunkulu Simakadze wamtsatsa umuntfu wambeka ensimini yase-Edeni kutsi ayilime, ayilindze.

¹⁶ Nkulunkulu Simakadze wamyala umuntfu watsi kuye: “Ungadla ngekutsandza kwakho tonkhe titselo letilapha ensimini;

¹⁷ kodvwa ungasidli sitselo sesihlahla sekwati lokulungile nalokungakalungi, ngobe mhlazana usidla uyakufa nekufa.”

Kudalwa kwalomsikati

¹⁸ Nkulunkulu Simakadze watsi: “Akukuhle kutsi umuntfu ahlale yedvwana. Ngitamentela umsiti lolungele yena.”

¹⁹ Ngako-ke Nkulunkulu Simakadze wabumba ngemhlabatsi tonkhe tilwane tesiganga, netinyoni letindiza emoyeni, watiletsa kumuntfu kutsi abone kutsi utetsa njani. Lawo mabito latetsa wona tabitwa ngawo.

²⁰ Ngako-ke umuntfu watetsa emabito tonkhe tifuyo, netinyoni letindiza emoyeni, nato tonkhe tilwane tesiganga. Kepha Adamu akamtfolanga umsiti labelungele yena.

²¹ Ngako-ke Nkulunkulu Simakadze wamehlisela umuntfu butfongo lobukhulu; walala. Nkulunkulu wase ukhipha lolunye lwetimbambo takhe wagcwalisa sikhala ngenyama.

²² Nkulunkulu Simakadze wambumba lomsikati ngelubhambo labelukhiphe kulomdvuna, wase umyisa endvodzeni.

²³ Indvodza yatsi: “Lona-ke sewulitsambo lematsambo ami, nenyama yenyama yami. Uyawubitwa ngekutsi: ‘yindvodzakati’, ngobe utsetfwe endvodzeni.”

²⁴ Ngako-ke indvodza iyawushiya uyise nenina inamatsele kumfati wayo, bese baba nyamanye.

²⁵ Babehamba ngcunu, bobabili, lendvodza nemkayo, bate emahloni.