1 Samuweli 3 - Siswati 1996 Bible

Kutibonakalisa kwaSimakadze kuSamuweli

¹ Umfana Samuweli abekhonta Simakadze ngaphansi kwa-Eli. Kulawo malanga livi laSimakadze lase lilivelakancane, nemibono yayingasekavami.

² Ngalobunye busuku Eli, labesanemehlo labutsakatsaka asabona kalufifi, abelele endzaweni yakhe njengasemihleni.

³ Sibane saNkulunkulu sasingakacimi, naSamuweli alele phansi ethempelini laSimakadze, lapho bekunelibhokisi lesivumelwane saNkulunkulu khona.

⁴ Simakadze wabita Samuweli. Wasabela watsi: “Ngilapha.”

⁵ Wagijima waya ku-Eli, wafike watsi: “Sengikhona, ngive ungibita.” Kodvwa Eli wakhuluma watsi: “Cha, angikakubiti, hamba uyewulala phansi.” Ngako wancandzeka wayawulala phansi.

⁶ Waphindze Simakadze wamemeta watsi: “Samuweli!” Samuweli wavuka waya ku-Eli, wafike watsi: “Sengikhona, ngive ungibita.” Kodvwa Eli watsi: “Ndvodzana yami, angikakubiti; hamba uyewulala phansi.”

⁷ Samuweli abesengakamati Simakadze, kantsi futsi nelivi laSimakadze lalisengakembulwa kuye.

⁸ Simakadze waphindze wamemeta Samuweli kwesitsatfu, Samuweli wavuka wagijima waya ku-Eli, wafike watsi: “Sengikhona, ngive ungibita.” Eli wabona kutsi nguSimakadze lona labebita lomfana.

⁹ Ngako Eli watjela Samuweli watsi: “Hamba uyewulala; naphindza akubita, ubotsi: ‘Khuluma, Nkhosi, ngobe inceku yakho ilalele.’ ” Ngako Samuweli wahamba wayawulala endzaweni yakhe.

¹⁰ Simakadze wefika wema khona lapho, wamemeta njengakucala watsi: “Samuweli! Samuweli!” Samuweli wakhuluma watsi: “Khuluma, ngobe inceku yakho ilalele.”

¹¹ Simakadze wakhuluma kuSamuweli, watsi: “Lalela la, kukhona lengitakwenta lapha ka-Israyeli lokutakwenta kutsi tindlebe talabo labatawuva ngako tincencetse.

¹² Ngaleso sikhatsi ngitawumelana na-Eli nendlu yakhe ngako konkhe lengakusho kuye, kusukela ekucaleni kuze kube ngusekugcineni.

¹³ Ngobe ngamtjela kutsi indlu yakhe ngitayehlulela phakadze naphakadze ngenca yesono lasatiko: Emadvodzana akhe atidvonsele sicalekiso, naye akazange awekhute kutsi ayekele.

¹⁴ Ngako-ke ngafunga ngendlu ya-Eli, ngatsi: ‘Licala lendlu ya-Eli lingeke lihlengwe ngemhlatjelo nome ngemnikelo wekubuyisana.’ ”

¹⁵ Samuweli walala kwaze kwasa; kwase kutsi nakusa, wahamba wayakuvula iminyango yendlu yaSimakadze. Wesaba kutjela Eli lombono,

¹⁶ kodvwa Eli wambita, wafike watsi kuye: “Samuweli, ndvodzana yami.” Samuweli wasabela watsi: “Ngilapha.”

¹⁷ Eli wabuta watsi: “Yini lena layishito kuwe? Ungangifihleli. Shangatsi Nkulunkulu angakujezisa kakhulu, nakwenteka ungifihlela nome yini lakutjele kona.”

¹⁸ Ngako Samuweli wamtjela konkhe, wangete wamfihlela lutfo. Eli wakhuluma watsi: “UnguSimakadze; akente konkhe lakubona kukuhle emehlweni akhe.”

¹⁹ Simakadze waba naSamuweli asakhula, wangete wavumela ngisho nalinye livi lakhe kutsi liwele phansi.

²⁰ Sonkhe sive sema-Israyeli kusukela kulakaDani kuze kuyewufika eBherisheba savele sabona kutsi Samuweli abemiselwe kuba ngumphrofethi waSimakadze.

²¹ Simakadze waphindze watibonakalisa eShilo; ngobe lapho Simakadze watembula kuSamuweli ngelivi laSimakadze.