Sofonías 3 - Papang Yulni

Jerusalén dutni yamna kidika kaupak watwi laihwi dulauna

¹ ¡Alakaih, Jerusalén, tawan nuhni as kulnin dutni sani laihna, dawak taihyang!

² Papang yulni dakawas dana, dawak barangni kalyaknin bik yulwas dana, witing yakat kulnin awas dana; witing Papangni yaihnit yakat kiwas dana.

³ Tanituna muihni balna kidika laih, layan ihwa kapat ki, dawak wihnita balna kidika laih kauhmak wanilang nawahni kapat ki, di wakal as bik dadawas kidika yahan dini.

⁴ Pranipit balna kidika laih kulninna dutni, dawak malnikau dutni yayamwi; dawak sumalniyang balna kidika laih holi pāni kidika rispik dis yayamwi dawak Dawan lani balna kidika kukulwas ki.

⁵ Kaunah Papang laih tawan nuhni yakat sakki, witing laih di yamni manah yamwi, dutni laih yamwaski. Mapiris bitik yakat la kat kidika awi dawi. Wirlawakat, dutni muihni kidika laih asalni kidika amanglawas ki.

⁶ Papang yulwi: “Nisan balna kidika daukalnayang, tawannina daklana kidika bik bahtik dis yamnayang, dawak tanina pas balna kidika di dis yamnayang, muih asbik diski kidika yakut bayaknin. ¡Tawannina nunuhni balna yakat muih as bik diski!

⁷ Kulnayang: ‘Kaput yamtingkat Jerusalén kidika yamakiduwarang, dawak yang barangni kalyamnik kidika yamni kulwarang; kaput laih uni kidika daukalwas karang yang wah kalatingkat.’ Kauna witingna laih sirihni palni dutni yayamna, dutni balna bitik.

⁸ Kidika bahang, manna takitahatanauh, mani kidika lawik niningna kauh yulki kidika. Yang, Dawan yang kat yultayang: Uduhnin kulnayang nisan balna dawak king sauni balna bik kulnik daukalna kidika witingna minitna yakat sihnik, kulnik daukalna daihni kidika. ¡Sau adika bitik daukalpamna karang ki, yang kulnik daukalna kuhnipau kau!

⁹ “Kidika yakat kiwi kawakat, maisihni dis yamki tawan muihni balna yul babauwa kidika, kaput laih yang akat manah minitna yulnin, kaput laih witingna bitik aslah diki yamna atnin.

¹⁰ Etiopía wasni nakaskau yakat yang tawanki kidika rani aiwi, kalki dinit yakat bukwi yuyulwarang minitdis dini kidika duwi aiwarang yang akat.

¹¹ Kidika mani yakat, yang tawanki, baisa asalma dutas awama di yamtaman balna bitik yakat yang nikingkauh lawanaman dai kaunah kaput laih man kaupak dakyakki witingna manah kapat kaldakakawa balna kidika, dawak watta man manah kapat kaldakas awama yang asangki holi yakat.

¹² Yang man yakat dana awaki, muih kulnin yudutni, dawak minikunni kidika, bahang yang ayangki yakat kulnin awi duwarang.

¹³ Israel muihni balna dauwas yaklalana kidika watwi la awas kidika yayamwas karang, alas bik yuyulwas karang, witingna tininapas yakat alas lani kidika bangwas karang. Di kakaswarang dawak yamadunin as bik dis wingninata pupuhwarang.”

Unbauna alasna as Jerusalén yulni

¹⁴ ¡Sayan tawanni nuhni unbautah! ¡Damat alasna yakta, Israel tawanni! ¡Jerusalén alasna alahwah, ismang bitik kau alasna alahwah!

¹⁵ Papang yaklauwi la mahanin yamna dai kidika dana, dawak man namangkauh yaklalauwa balna yakat bik kangwi yakna. Dawan Israel Kingni kidika, man pasmang yakat sakki: di dutni as kau bik yamadutas awama.

¹⁶ Kidika mani yakat kalyulna karang Jerusalén yakat: “¡Yamaduwinih Sayan, datangkat tingma balna kidika parasni dis atnin awaski!”

¹⁷ Dawan, man Papangma kidika pasmang yakat sakki; ¡witing laih parasni nuhni duwi bahang malaihwi yakwarang! Dawan isinglak sakkarang man yulma. Witing kulnin dalani duwa yakau sangmaka wisam mawarang; alasna duwa yakat unbauna karang

¹⁸ alasna mani kapat. Papang yulwi: “Yang malaihtik yakki, dutni kidika kaupak, asalni kidika man mamatyakat karangkat.

¹⁹ Kidika mani yang yamki matataihwa balna bitik niningyakat. Angdika sīpni pilutwakat ilp kalaki dawak ta disna likkidika bik waltik yakna awaki; ayangni nuhni dawak rispik bik duna karang, sau bitik yakat.

²⁰ Kidika mani manna manaduaiki, manauduhki; yamtingkat suermanati satuk kalwarang, ayangni nuhni rispik bik manaki sau akat tawan balna bitik pasyakat. Yang Dawanyang kat yultayang.”