Números 35 - Papang Yulni

Libait balna dinina

¹ Dawan yaklauwi Moses yakat kalyulna, Jericó muhnit kau Jordán yaihnit kau, Moab wanilang yakat aput kalyulna:

² “Israel balna yakat diyultang, saunina paskau tawan nunuhni balna kidika dia yakat yalalahwang libait balna, dawak bik tawan nunuhni yaihnit kau sihrsihr duwa kidika bik diayawang.

³ Kaput laih libait balna kidika tawanni nunuhni yakat yalalahwarang, dawakat, yaihnit kau langni yakat tingninalau balna duduwarang.

⁴ Sau sihrsihr duwa kat diayawarang kidika laih tawan nunuhni yaihnit kau yakat diawarang, daklana kaupak ahni nining yakat 450 metros.

⁵ Sauni bitik kidika pirini arungka kidika, 900 karang, yuldarang kat, ma kilwa niningkauh kulwa kidika, sihm kulnakarang ma kawa niningkauh bik, dawakat pirini niningkauh, wadah, tingpal bik sihm kulna karang. Tawan nuhni kidika papus yakat kalwarang, yaihnit awaih kidika laih turuh kasnin manah karang.

⁶ “Libait balna yakat tawan nunuhni diayawarang kidika, tiaskauas laih yakmaldinin pāni karang, muih as yaklauwi muih ūk yakat ina karang kat. Kidika tawan nunuhni tiaskauas diana minityakat, tawan nunuhni ūk 42 diana karang;

⁷ bitik kat tawan nunuhni 48 diatanama libait balna yakat, tuninaruh kasnin pāni balna bitik.

⁸ Israel balna saunina kaupak, libait balna yakat tawan nunuhni kidika diayana karang kat, sulani bitik kau sau ampus duna kat kaput diayana karang libait balna yakat: sau nunuhni duduna kidika tawan nunuhni mahni duduna karang, dawakat sau dibin duduna kidika, tawan nunuhni bulah duduna karang.”

Kawi yakmaldinin tawanni nunuhni balna

⁹ Dawan yaklauwi kiwi Moses yakat aput kalyulna:

¹⁰ “Israel balna adika yulni diyultah: Manna Jordán wasni yakat daklawa, mahka Canaán yakat awanama karang kat,

¹¹ tawan nunuhni buas walyakta dunamnaki, maldanamna tawanni nunuhni balna atnin, kidika pāni yakat yakmaldana karang muih as isning aiwa pini muihni ūk yakat īna kidika.

¹² Kidika muihni, kidika pāni yakat kiwi kawarang kat, muih dauna wanaihni balna kidika sip ihiwas karang al yakat, dawak baisa kau laih dauwas karang, tawan nuhni dawakat lā yamyang balna muhnina yakat lāih kalahwas tanitkau.

¹³ Tawan nunuhni diayana kidika tiaskauas laih yakmaldinin pāni karang:

¹⁴ bās laih Jordán kaupak ma kilwa nining yakauh dawakat ūk as bās kidika laih Canaán yakat.

¹⁵ Adika tawan nunuhni tiaskauas laih yakmaldinin tawanni karang, Israel dawakat Israel awas muihni balna Israel pasyakat yalalahwa muihni balna bik, kidika awas bik muih as sirihni kaiwi bayakwakarang bik kidika tawanni nunuhni yakat kakana karang. Kidika tawanni yakat isningna aiwas muih ihina muihni balna kidika yakat uiwi kakana karang.

¹⁶ “Angdika muihni, muih ūk yakat dakna karang kat, ayang dini kau, kaldakna muihni kidika dawarang kat, iyang muihni as kulnakarang ki, iyang muihni kidika laih dauna karang ki.

¹⁷ “Muih as ūk yakat kipala kau bahwarang kat, muih kidika sipki daunin, dawak kalina kidika dauwarang kat, muih ina as ki, bahang iyang muihni laih dauna atnin karangki.

¹⁸ “Muih as yaklauwi ūk yakat pan kau wiswak dauwarang kat, muih ina as ki, bahang ina muihni laih daunin karang ki.

¹⁹ Dauna wanaihni kidika, īna muihni yakarak kalpapakwarang kat, biriwi īna karang ki.

²⁰ “Muih as yaklauwi kulnin dutni kulwi muih ūk yakat tukwarang, kidika awaskat di kau duwi ruhmwarang kat,

²¹ kidika awasbik waihla kulwa kidika yulni tingkau bauwak dauwarang kat, pāt duwa muihni kidika laih daunin yakat wirlana karang, kat muih iyang bahang. Dauna wanaihni as yaklauwi ina karang kalpakwarang kat.

²² “Kaunah muih as kat, ūk yakat tukwarang pa, kidik awaskat di as ruhmwarang pa dutni kulwas,

²³ kidika awas kat kipala as ruhmwak muih kidika kalwak daunakarang kat, kaunah waihnila awas dai karang kat, dawakat bik ting yamwas dai karang kat,

²⁴ tawan muihni balna kidika wihta karangki dauna muihni wanaihni kidika yaklauwi inin yamwarang kat, adika lani yakat kaput karangki.

²⁵ Tawan muihni balna yaklauwi nanit dadakwarang inin kalyamwa muihni yakat, dawak kalalawak yakmaldinin tawanni nuhni yakat kiwi kawarang, witing yakmaldinin walna dai kidika. Muih ina muihni kidika yakat sakkarang Sumalyang nuhni yaklauwi blisyamna kidika dauwarang kat.

²⁶ Kaunah yakmaldinin tawanni nuhni kidika sauni kaupak kalahwarang kat,

²⁷ dauna kidika wanaihni yaklauwi iwarang kat dutni kulna awaskarang ki.

²⁸ Iwada muihni kidika yakmaldinin tawanni nuhni yakat kiwarang ki sumalniyang kidika dauwak kat. Usnit yakat laih sipkarang sauni yakat kiuna atnin.

²⁹ “Adika lani balna, walamanabis kat tilahwi kiwarang, angkat, angkat manna yawa yalahdanama karang bik.

Talna dawakat laihwi yaknin lāni balna

³⁰ “Muih īna alni kidika, muih manas talwi yulni yuyulna karang laih sipkarang, al kidika ipamna atnin. Kaunah talna muihni kidika aslah karang kat sip awaski muih kidika īna atnin.

³¹ “Muih iyang kidika lā tingni munah daunin yakat wirlana karangkat, sip awas ki witing sangnika kidika lalah kau bakanwi yakna atnin, kidika muihni laih dauna atnin karang ki.

³² “Muih as iwi yakmaldinin tawanni nuhni yakat kiwi kana kat, lalah kau minitlauwi yaknin sip awas karang, sumalyang kidika dauwas tanitkauh.

³³ “Manna yalahtamana pāni kidika muih īta ayangni daukakalwinih, kat muih iwa kidika laih pa ayangni daukalwi, dawakat, muih īna kidika sip di ūk kau laihwi yakwas ki, iyang muihni kidika dauwarang kat laih.

³⁴ “Yalahtanama sauni kidika muih īta ayangni daukakalwinih, kidika sauni yang bik yalahki ki, bahang yang Dawan yang adika, Israel balna pasningna yakat yalahdayang.”