Mark 9 - Papang Yulni

¹ Jisas yaklauwi aput bik diyulna: —Barangni manayultayang akat bang-adika kaupak buas balna kidika laih dadauwas karangki, Papang king kāwi sauni kidika parasni karuk kaiwak talwi kat dadauwarang ki.

Jisas muihni nuhni satuk kalna kidika

² Ma tiaskauas bayakwak usnit kat, Jisas laih asang maluihni as kau kiuna dai, kidika yakat Pita, Jims dawak Jan kidika balna manah diduwi kiuna dai. Kidika pāni yakat witingna muhnina yakat, Jisas muhni pīsni kidika satuk kalnadai.

³ Prakni kidika laih yaringni pihni kalna dai muih as di suhwi pihni dawa kapat bik awas.

⁴ Dawak Elías dawi Moses kidika bik Jisas karak yulbauwabangkat tatalna dai.

⁵ Pita yaklau Jisas yakat kalyulna: —Sumalyang, ¡yamniki mayang akat bangmayang adika! Ū binina bas pakdarangki: man dima as, Moses dini as dawak Elías dini as.

⁶ Kat disaipil balna kidika laih muihsakdauna bangdai, dawak Pita laih witing ais yulninpa amanglawasdai.

⁷ Kidika minitni yakat, mukus as witing minityakat kaiwi bukna dai. Dawak mukus paskaupak yulni as aput yulna dai: “Adika ki yang walakibis dalani kidika: dakanauh.”

⁸ Kidika minitni yakat, yaihnitna yakat tatalna mani kat, muih as bik disdai witingna karak, kaunah Jisas manah sakdai.

⁹ Asang kaupak yaklakwabangkat, Jisas yaklau diyulna dai witingna ais tatalna kidika muih as kau bik yulnin awas, muih Walanibis al kidika watwi yaklauwarang kat.

¹⁰ Kidika bahang kidika yulni kidika witingna pasyakat manah dudunadai, watwi yaklaunin kidika ais diniyah atwi dakakawadai karang bik.

¹¹ Witingna yaklau Jisas yakat kalyulwi dakakana: —¿Ais yulni la sumalniyang balna yaklau yuyulwih, Elías kauh tatuna kaiwarangki atwa kidika?

¹² Jisas yaklau nangnitnalana: —Rahm palni Elías kauh tatuna kaiwi, dawak witing di balna barangni yamwarang. ¿Amput dawak ulna balna yakat yulwi, muih Walanibis al dalani wauhwarang, dawak bik muih yaklauwi dauh kalkulwarang ki?

¹³ Kaunah yang lawik manayultayang Elías laih uman kaina, dawak witing yakat amput kalyamkih kidika kalyayamna, ulna balna yakat yulwa kaput ais amput kalkalahnindai kidika kaput.

Jisas yaklau wahmabin as spirit dutni duwa kat yamni kalyamna kidika

¹⁴ Disaipil balna bangyakat, nawatwi aiwi tatalna, muih mahni awaihdak duwabangdai, dawak lā maestro balna karak yulbauwabangdai.

¹⁵ Jisas yakat tatalna mani kat, bitik witing niningkauh kiri uiwi kalparaswi yamni tatalna.

¹⁶ Jisas yaklau diyulwi dakana: —¿Manna ais yulni yultamanah witingna karak?

¹⁷ Kidika yakat bangdai kidika kaupak as yaklau yulna: —Sumalyang, yang walakibis al adika man yakat duainayang, spirit dutni as duwi dawak witing yakat tubi kalyamna.

¹⁸ Witing angkat angkat sakkarang bik, spirit dutni kidika kallaihwi sau kat kalruhmlakwi; tinpas kaupak luhuswi kalahwi, anani karswi dawak muihni kidika dadasni kalwi. Disaimapil balna yakat diyulnayang kidika spirit dutni kidika yakwi kalana atninna, kaunah sip yakwas dadana.

¹⁹ Jisas yaklau nangnitlana: —¡Muih kasak kulnin lani dis! ¿Mampat kat manna karak awakiyah? ¿Mampat mani kat yang manna karak kulnik laihwatkiyah? Muih al wahmabin kidika akat duaitanauh.

²⁰ Bahang muih wahmabin kidika Jisas muhni yakat duwi uina. Kaunah spirit dutni kidika Jisas yakat talna mani kat, muih wahmabin kidika sangka dauwi sau yakat bukwi pihrwi tinpas kaupak luhusni manah yakna dai.

²¹ Jisas yaklau wahmabin papangni yakat kalyulwi dakana: —¿Mampat kaupak adika dini kallaihnayah? Papangni kidika yaklau nangnitlana: —Muihbin mani kaupak.

²² Dawak ma mahni kidika spirit dutni yaklau kuh pasyakat dawak was pasyakat bik ruhmana, īna atnin yulni. Kaput bahang, man di as yamnam sipman kat, yangna yakat miknakun yanatala ilp yanatah.

²³ Jisas yaklau kalyulna: —¿Amput ais ‘sipman kat’? ¡Di bitik kau sipki angdika muihni rahm kulwa kidika!

²⁴ Bahang muih wahmabin papangni kidika sarahna: —Yang rahm kultayang. ¡Ilp yatangkat kasak kulnin kidika baisa dukuh!

²⁵ Jisas talwakat muih balna kidika mahni kalududuhwa kat, spirit dutni yakat bilwi aput kalyulna: —Spirit tubi dawak tappuk, yang lawik mayultayang adika wahnimabin kaupak alahwah dawak witing yakat watta āwanam awaski.

²⁶ Spirit dutni kidika sarahna, dawak wahmabin kidika watwi sangka dauna. Usnit kat witing kaupak kalahwi sihm dauna kapat kaldana dai, muih mahni yuyulna dai, rahm dauna.

²⁷ Kaunah Jisas yaklau tingni yakat laihwi dulauna; dawak wahmabin kidika laih kalni kau yaklauwi atakna dai.

²⁸ Usnit kat Jisas ū as kau kana, dawak disainipil balna yaklau witing alas sakkat kalyulwi dakakana: —¿Ampadawak, yangna laih spirit dutni kidika sip kangtik yaktasyangna daih?

²⁹ Dawak Jisas yaklau nangnitnalana: —Adika satni walanisa laih makat yulnin kau manah sipki kangwi yakna atnin.

Jisas witing daunin yulni wat bu yakat yulna kidika

³⁰ Witingna kidika kaupak kalahwi uina mani kat, Galilea munah bayayakna dai. Kaunah Jisas witing dukih kalawasdai muih as bik amanglana atnin,

³¹ kat disainipil balna yakat disumalwasakdai kidika yulni. Aput diyulwadai: —Muih Walanibis al kidika laih muih balna tingnina yakat kawarangki dawak ihiwarangki; kaunah ma bas kat watwi yaklauwarangki.

³² Witingna laih sip amanglalawasdai diyulwa yulni kidika, dawak bik kalyulwi dakana atnin yamaniduduwadai.

¿Wais kidika baisa tanit nuhni kalkulnayah?

³³ Capernaum tawanni nuhni yakat uiwi kakanadai. Uman ū yakat bangkat Jisas yaklau diyulwi dakana: —¿Ais yulni kat yultamanah tapas yakat?

³⁴ Kaunah witingna laih ap dadana dai, kat tapas yakat yulwīnah aina kidika laih, wais kauh tanit nuhni karangpa, kidika yulnibabauna dai.

³⁵ Bahang Jisas laih yalahwi disaipil balna 12 yakat diyulwak aiwak diyulna: —Angdika muihni tatuna atnin kaldakawa kidika laih, bitik pasyakat witni yakat atninki, dawak bik muih balna bitik yakat dinina yamna atninki.

³⁶ Usnit kat witingna bangkidika papusyakat muihbin as lakna, dawak tingni yakat dulauwi duwi, aput diyulna:

³⁷ —Angdika muihni kat yang ayangki usnit yakat muihbin as duwarang kidika, sihm adika apat, kidika laih yang yakat yaduwi; dawak angdika muihni yang akat yaduwa kidika laih, yang akat manah yaduwaski, kaunah yasihna muihni yakat bik duwi.

Angdika muihni mayang maniking yakat awas kidika laih, mayang ma ilpki yakat sakki

³⁸ Jan yaklau kalyulna: —Sumalyang, yangna muih as talnayangna man ayangma kau duwi sitan balna yakat kangwi yakwakat, kaunah mayang kaupak awas kidika yulni, yamnin awas kalyulnayangna.

³⁹ Jisas yaklau nangnitnalana: —Yamnin awas kalyuyulwinih, kat angdika muihni yang ayangki kau duwi taldas dini yamwarang kidika, usnit akat yang akat dutni yayulwas karangki.

⁴⁰ Angdika muihni mayang maniking yakat awas kidika laih, mayang ma ilpki yakat sakki.

⁴¹ Wais wais manna yakat was manah bik sutak as mananawarang kidika Krais dinimana kidika yulni, barangni manayultayang kidika muihni laih warkni minit duwarang ki.

Dutni yakat buknin yamadangni kidika

⁴² “Angdika muihni yaklau adika dibinina yang akat rahm yakukulwa balna yakat dutni diyamwakat bubukwarang kat, yamni karangki dinimak yakat kipala nuhni as kau sitwi kuma yakat ruhmana atnin.

⁴³ Tingma kidika dutni yakat malaknin yamwakat, dakpamtah; baisa yamniki sangka atnin yakat tingma nakas dis āwama kat dawak tingma nabupak karuk piwas atnin kuhni yakat yawama karak dawakat.,

⁴⁵ Dawak kalma kidika yaklauwi mayamwakat dutni yakat buktaman kat, dakpamtah; baisa yamniki kalma nakas dis sangka atnin yakat āwama kat, dawak kalma balna bupak karuk kuh yakat maruhmwarang karak dawakat.

⁴⁷ Dawak mamakpa kidika yaklau mayamwakat dutni yakat buktaman kat, yakpamtah; baisa yamni karangki mamakpa aslah karak Papang king kāwi sauni yakat āwama karang kat, dawak mamakpa bupak karuk kuh yakat maruhmwarang karak dawakat,

⁴⁸ Kidika kuhni banibil balna sip dadauwas kidika dawak bik sip piwas kidika.

⁴⁹ “Kat bitik kau kuh kau wilamni yamna karang.

⁵⁰ Kuma kidika laih yamniki; kaunah wilamni dis dawa laih, ¿manna amput watta dutanamayah? Manna muihmana yakat kuma dutanauh dawak biri biri kulnin aslah lani kidika duta yalahtanauh.