Ester 3 - Papang Yulni

Mardoqueo dawak Amán karak

¹ Ma as as bayakwakat, king Asuero yaklauwi Amán, Hamedata walanibis yakat parasni nuhni kalana dai, bahang kidika laih Agag sulani dai, kaput laih witing yakat kidika kabamintni āna dai.

² King ūni kau, witing yaihnit yakat dini yamyang balna bitik kidik Amán kaiwi bayakwakat, limbabahwi tunanina abubukwādai, kidika awas kat witing muhni yakat uiwakat kaput yayamwādai, king yaklauwi kaput yamnin yulna dai bahang; kaunah Mardoqueo laih yamwas dai, yamnin yulna kaput.

³ Kaput laih king yaihnitkau kabamint warkni yamyang balna duwasak kidika balna yaklauwi Mardoqueo yakat kalyulwi dakakana, amput dawak king yulna yakat yamwas pa.

⁴ Ma bitik yakat kaput kalyulwi dakakawa dai, kauna witingna yuyulwa kidika dakawas dai. Kaput laih Amán yakat uiwi kalyuyulna, bahang kaput laih talna atnin Mardoqueo yulni yakat ban laihwi duwarangpa, kat uman diyulna dai witing kidik laih Ju.

⁵ Amán talna, Mardoqueo kidika limbabahwas dai, dawak bik abukwas dai witing kiwi bayakwakat, bahang kulnin daukalna;

⁶ kauna uman kalyuyulna dai bahang, Mardoqueo kidika ais ninisan kidika, bahang witing wah kalanin manah laih kulwasdai, kaunah kulwi talna amput dawi Ju balna kidika bitik dismukna atnin, Asuero king kawa sauni yakat yalalahwa kidika.

Ju balna imuknin lani

⁷ Kurih kawak, waiku tatuna yakat, yuldarang kat nisān wainiku, Asuero kingkana kurih 12 dai yakat suerte ruhmwi tatalna, Amán muhni yakat; mani, wainiku kidika āna atnin, witing warkni yayamwarang kidika, dawak kalahna waiku 12 yakat, dawak mani laih 13 yakat, yuldarang kat Adar wainiku yakat.

⁸ Kaput laih Amán yaklauwi, king Asuero yakat kalyulna: —Man king āwaman sauni paskau tawan balna bitik kidika pasyakat, tawan as ki silp yalahwi, muih ūk balna karak; dawak witing lāni balna bik satuk duwi tawan ūk balna karak dawakat, king, man lā ānaman balna kidika kulwas ki. Kaput bahang king, man king awaman sauni yakat ban yalahwa atnin sip-awaski kidika tawanni.

⁹ Kaput bahang king man namang yakat yamni talamankat, lā as atangkat kidika balna bitik dismukwang, dawak yang laih kabamint warkni yamyang turuh mahni maintalyang balna yakat diana awaki, lalah 330 tausin kilo, kidika laih king lalahni baksni yakat uiwi ahana karang.

¹⁰ Kaput laih king tingni ānin kidika yakwi Amán yakat kalana, Ju balna waihninala yakat,

¹¹ bahang aput kalyulna: —Sipki lalahni kidika dunam. Dawak kidika tawanni laih man yamtah amput yamni talaman yakat.

¹² Kurih kawak waiku tatuna ma 13 yakat ulyang muihni balna king duwa sak kidika bitik uduhna, dawak Amán yulwa yakat uhulna, sau sahyakna balna kau kabamint balna yakat. Dawak adika yulni uhulna kidika, sau sahyakna balna kau yalalahwa balna tunina kat uhulna, tawan balna kidika bik witingna tunina kat, dawak bik king ayangni kidika bik ulna dai, dawak king tampni kau bik laih wauhnitaya kidika taihna dai,

¹³ dawak kidika, kingni kawa sauni sahyakna balna bitik yakat sihna dai. Kidika wauhnitaya ulwi sihna yakat aput yamnin dipakna dai; ma aslah ju muihni balna kidika bitik īwi disyamna atnin, wawahma karangpa, muihbararak karangpa, kidika awaskat muihbinina karangpa kaunah bitik laih īwi disyamna atnin, dawak dinina yayamni balna kidika bitik duna atnin, kidika laih Adar wainiku yakat yamnin dai.

¹⁴ Adika uhulna kidik laih lā as kaput dai, bahang kidika sauni sahyakna bitik yakat niningnakana, kaput laih kidika mani kiwi kawakat ridi atnin yulni.

¹⁵ Kidika wauhnitaya duwi uiwa muihni balna laih mahka palni kalahwi uina, king yaklauwi pakna bahang, kidika lani laih Susa tawanni nuhni pani kaupak ulwi yakna dai. Dawak, Amán dawi king karak, yalahwi didina, kaunah Susa tawanni yakat laih muih balna kidika sip amanglalawas dai, di kalahwa kidika.