JEREMIYA INTRO1 - Sumi Naga CL (Re-edited) Bible (BSI)Kilethitsa Tungkupu Jeremiah ye Khristo ighinike züu tiqheli akütsüniu shekhau ngo tiqheli akütsüghou hukuthu ghuloki lo xüache. Pa no ado kushuo mla cheke ghuloki lo Alhouw timiqo no asüatu kümlla eno axine lo xüuve keu ghenguno panoqo püghaveni chenipi ghutukeu tsa pitsü ke. Pa no asheazü shi pitsü keu hu kuchono Babylon kükau Nebuchadnezzar no Jerusalem phughi eno achineki kuboleve tsü, Judahmi kükau eno timi kutomo küghasü Babylon lo wuve keu kutolo xüwo toluno ithulu ke. Khunoqo küghasü wuve keno tipaqo ideighi luno pano shiaye tsüchilelu nani pikeu tsa ghi Jeremiah no asheazü shi pitsü keu ani. Jeremiah kaku ye hitoi kijelu nani: (1) Josiah, Jehoiakim, Jehoiachin eno Zedekiah noqo no kacheke ghuloki lo Alhou no Judah shiaye no pano yekipemi vilo pikeu tsa. (2) Jeremiahw akiyeu Baruch no yekeqo eno Jeremiah küxü lo tungkuptsa eno akhoto sütsa yetsü keqo. (3) Ampeu sütsa inaghami lau pikeqo. (4) Xüghili shekümtsü, ti ye Jerusalem ikiqive keu eno Babylon lo haküghütsüve keu ghili. Jeremiah ye paw timiqo kimiye no ighono mlo chekemi, eno panongu shou küghakütha tsa pinishimo pülaghi pitsü ke. Alhou no pa kulu no pa pelo tungkupu lakhi shilupe keu lo ghichheghime sholu keu, pa mlo ghime ghili a-a kutomo lo ye püani. Ampeu tsa huye pa mlo lo ami toi auve kehu pa ye tipau süchile mlave. Kaku hipau lo atsato hami ye Jeremiahw shiluksa do nguno pishipuwo puloshoqhi akitheu Alhouw timiqo no shikükau küha namu pewoluve nani pikeu, kughengu ti ye panongu mlo lo yepukuve tsüake ghenguno (31:31-34). Kaku kimji: Alhouw timiqo pelo pano xine lono Pa lau xaideghi penike hakite keu. Khuu no ye kea: Jeremiah. Khuno lau ye kea: Judah eno Jerusalem. Kughono ye kea: B.C. 627-586. |
The Bible Society of India
© 2023, Used by permission. All rights reserved. More
Bible Society of India