Mapisarema 22 - Baiberi Magwaro Matȿene aMŋari 1949 (Doke)

Kucema kwomunhu wakasiyiwa naMŋari.

Kumutuŋgamiriri wokuimba; no muimbirwe weAjereti hashi‐Shahari. Pisarema raDavidi.

¹ Mŋari waŋgu, Mŋari waŋgu, mandisiyireiko? Munomirireiko kure pakundiɓatsira, napamashoko okugomba kwaŋgu?

² Mŋari waŋgu, ndinoɗana masikati, asi hamupinduri; Noʋusiku, asi handiwani zororo.

³ Asi imi muri mutȿene, Imi mugere parumbidzo dzaIsraeri.

⁴ Madziɓaɓa eɗu akaʋimba nemi; Ʋakaʋimba, imi mukaʋarwira.

⁵ Ʋakacema kwamuri, ʋakarwirwa; Ʋakaʋimba nemi, ʋakasanyadziswa.

⁶ Asi ini ndiri honye, handizi munhu; Ndiri cinhu cinoɀidzwa naʋanhu, cinoshoʋorwa naʋanhu ʋose.

⁷ Ʋose, ʋanondiʋona ʋanondiseka; Ʋanoshamisa muromo, ʋanodzuŋgudza misoro, ʋaciti:

⁸ Ciɀiisai kunaJehova; iye ŋgaamurwire; Ŋgaamurwire, ɀaanomufarira iye.

⁹ Asi ndimi makandiɓuɗisa paciɀaro; Makandiʋimbisa nemi ndiciri pamazamu amai ʋaŋgu.

¹⁰ Ndakaiswa kwamuri kubva paciɀaro; Imi muri Mŋari waŋgu kubva paɗumbu ramai ʋaŋgu.

¹¹ Regai kuʋa kure neni; nokuti njodzi iri pedyo; Nokuti hapana‐uŋgaɓatsira.

¹² Hando zhinji dzakandikomba; Hando dzinesimba dzaBashani dzakandipoteredza.

¹³ Dzinondishamisira miromo yadzo, Seshumba inoparadza iciʋomba.

¹⁴ Ndakaɗururwa semvura, Mafupa aŋgu ose akaȿoɗogoka; Mŋoyo waŋgu wakafanana nenamo; Wakanyauka mukati moʋura bgaŋgu.

¹⁵ Simba raŋgu rakawoma secaeŋga; Rurimi rwaŋgu rwakanamatira pashaya dzaŋgu; Makandiisa paguruʋa rorufu.

¹⁶ Nokuti imbga dzakandikomberedza; Ʋuŋgano yaʋanoita ɀakaipa yakandipoteredza; Ʋakabvoʋora maʋoko aŋgu namakumbo aŋgu;

¹⁷ Ndiŋgaʋereŋga mafupa aŋgu ose; Ʋanonditarira nokundinaŋanidza;

¹⁸ Ʋanogoʋana ŋguʋo dzaŋgu pakati paʋo, Ʋanokanda mijenya pamsoro pehanzu yaŋgu.

¹⁹ Asi imi Jehova, regai kuʋa kure neni; Imi simba raŋgu, kurumidzai kundiɓatsira.

²⁰ Rwirai mŋeya waŋgu pamunondo; Muɗikanwa waŋgu pasimba rembga.

²¹ Ndiponesei pamuromo weshumba; Ɀirokwaɀo, makandipindura ndiri pakati penyaŋga dzenyati.

²² Ndicaɗudzira zita renyu kuhama dzaŋgu; Ndicakurumbidzai pakati peʋuŋgano.

²³ Imi munotya Jehova, murumbidzei; Imi mose ʋana ʋaJakobo, mukudzei; Mumutyei, imi mose ʋana ʋaIsraeri.

²⁴ Nokuti haana‐kuɀidza kana kusema ɗambudziko rounotambudzwa; Kana kumuʋanzira ciso cake; Asi paŋguʋa yaakacema kwaari wakamunzwa.

²⁵ Kurumbidza kwaŋgu paʋuŋgano huru kunobva kwamuri; Ndicaripa mhiko dzaŋgu pamberi paʋanomutya.

²⁶ Ʋanyoro ʋacadya ʋakaguta; Ʋanotȿaka Jehova ndiʋo ʋacamurumbidza; Mŋoyo yenyu ŋgairarame nokusiŋgaperi.

²⁷ Migumo yose yenyika icaraŋgarira nokudzokera kunaJehova; Marudzi ose aʋahedeni acanamata kwamuri.

²⁸ Nokuti ʋushe ndobgaJehova; Ndiye muɓati waʋahedeni.

²⁹ Ʋakuru ʋose ʋenyika ʋacadya nokunamata; Ʋose ʋanoɓurukira kuguruʋa ʋacafugama pamberi pake, Naiye usiŋgagoni kuraramisa mŋeya wake.

³⁰ Ʋana ʋake ʋacanamata kwaari; Rudzi runoteʋera rucaʋudzwa ɀaJehova.

³¹ Ʋacaʋuya ʋaciɗudzira kururama kwake Kuʋanhu ʋacazoɀarwa, kuti ndiye wakaɀiita.