Mapisarema 92 - Shona BIBLE

Rwiyo rwokurumbidza Jehovha

Pisarema, rwiyo rweSabata.

¹ Zvakanaka kuvonga Jehovha, Nokuimbira zita renyu nziyo dzokurumbidza, imi Wokumusorosoro;

² Kuparidza unyoro hwenyu mangwanani, Nokutendeka kwenyu usiku hwose,

³ Nechinoridzwa chine ungiso gumi, nomutengeranwa; Nezwi rakanaka pambira.

⁴ Nokuti imi, Jehovha, makandifadza nezvamakaita; Ndichafara kwazvo namabasa amaoko enyu.

⁵ Mabasa enyu akakura seiko, Jehovha! Mifungo yenyu yakadzika kwazvo.

⁶ Asina njere haazvizivi; Benzi harinzwisisi izvozvi,

⁷ Kana vakaipa vachimera souswa, Uye kana vaiti vose vezvakaipa vachikura; Zvinoitwa kuti vaparadzwe nokusingaperi.

⁸ Asi imi Jehovha, muri kumusoro nokusingaperi.

⁹ Nokuti tarirai, Jehovha, vavengi venyu, Nokuti tarirai, Jehovha, vavengi venyu vachaparara; Vaiti vose vezvakaipa vachaparadzirwa.

¹⁰ Asi runyanga rwangu makarusimudza sorunyanga rwenyati; Ndakazodzwa namafuta matsva.

¹¹ Ziso rangu rakaona zvakaitirwa vavengi vangu, Nzeve dzangu dzakanzwa zvakaitirwa vaiti vezvakaipa, vakandimukira.

¹² Akarurama achamera somuchindwe; Achakura somusidhari yokuRebhanoni.

¹³ Vakasimwa mumba maJehovha Vachakura muvazhe dzaMwari wedu.

¹⁴ Vacharamba vachibereka zvibereko pakukwegura kwavo; Vachava vanyoro navatsva;

¹⁵ Kuti vaparidze kuti Jehovha akarurama; Ndiye dombo rangu, hapana chinhu chisina kururama maari.