Mapisarema 91 - Shona BIBLE

Mufaro womunhu anochengetwa naJehovha

¹ Uyo agere panzvimbo yokuvanda yoWokumusorosoro Acharambira pamumvuri wowaMasimbaose.

² Ndichati pamusoro paJehovha, “Ndiye utiziro hwangu nenhare yangu, Iye Mwari wangu, wandinovimba naye.”

³ Nokuti iye achakurwira parugombe rwomuteyi weshiri, Napachirwere chinouraya zvikuru.

⁴ Iye achakufukidza nemhinenga yake, Uchatizira pasi pamapapiro ake; Zvokwadi yake inhoo huru neduku.

⁵ Haungatyi chinhu chinovhundusa usiku, Kana museve unofurwa masikati;

⁶ Kana chirwere chinofamba murima, Kana kuparadza kunouraya masikati.

⁷ Kurutivi rwako kuchawa vane gumi ramazana, Nezana ramazana paruoko rwako rworudyi; Asi hazvingaswederi kwauri.

⁸ Uchangozvitarira hako nameso ako, Ukaona mubairo wavakaipa.

⁹ Nokuti imi Jehovha, muri utiziro hwangu! Iwe wakaita Wokumusorosoro ugaro hwako.

¹⁰ Hapana chakaipa chingakuwira, Uye hapana chirwere chichaswedera patende rako.

¹¹ Nokuti iye acharaira vatumwa vake pamusoro pako, Kuti vakuchengete panzira dzako dzose.

¹² Vachakusimudza pamaoko avo, Kuti urege kugumbusa rutsoka rwako pabwe.

¹³ Uchatsika pamusoro peshumba nechiva; Mwana weshumba nenyoka uchazvitsikirira pasi.

¹⁴ “Zvaakandida, ndichamurwira; Ndichamuisa pakakwirira, nokuti wakaziva zita rangu.

¹⁵ Iye achadana kwandiri, ndichamupindura; Ini ndichava naye pakutambudzika; Ndichamurwira, nokumukudza.

¹⁶ Ndichamugutsa noupenyu hurefu, Nokumuratidza ruponeso rwangu.”