Johane 2 - Shona BIBLE

Jesu anoshandura mvura ikava waini

¹ Nezuva retatu muchato waivapo paKana yeGareriya; namai vaJesu vakanga varipo.

² NaJesu navadzidzi vake vakanga vadanwawo kumuchato.

³ Waini yakati ichizoshayikwa, mai vaJesu vakati kwaari, “Havachine waini.”

⁴ Jesu akati kwavari, “Ndineiko nemi, mai? Nguva yangu ichigere kusvika.”

⁵ Mai vake vakati kuvaranda, “Itai zvose zvaanokuudzai.”

⁶ Zvino kwakanga kuna makate matanhatu amabwe, akanga aiswapo netsika yavaJudha yokuzvinatsa, rimwe nerimwe raizadzwa nezviero zviviri kana zvitatu.

⁷ Jesu akati kwavari, “Zadzai makate nemvura.” Ivo vakaazadza kusvikira pamiromo.

⁸ Akati kwavari, “Cherai zvino muise kumukuru womuchato.” Vakandoisa.

⁹ Zvino mukuru womuchato wakati aravira mvura yakasanduka waini, asingazivi payabva, (asi varanda, vakanga vachera mvura, vaiziva), mukuru womuchato akadana muwani,

¹⁰ akati kwaari, “Munhu mumwe nomumwe anositanga abudisa waini yakanaka, neisinganaki kana vanwa kwazvo; asi iwe wachengeta waini yakanaka kusvikira zvino.”

¹¹ Ichi chiratidzo chake chokutanga Jesu akaita paKana yeGareriya, akaratidza kubwinya kwake; vadzidzi vake vakatenda kwaari.

¹² Shure kwaizvozvo akaburukira Kapenaume, iye namai vake navanun'una, navadzidzi vake; akagarapo mazuva mashomanane.

Jesu anonatsa temberi

¹³ Pasika yavaJudha yakanga yava pedyo; zvino Jesu akakwira Jerusaremu.

¹⁴ Akawana mutemberi vaitengesa mombe namakwai nenjiva, navaitsinhanha mari, vageremo.

¹⁵ Akaruka tyava yetambo, akabudisa mutemberi makwai nemombe zvose; akaparadza mari yavaitsinhanha, nokuwisa matafura avo.

¹⁶ Akati kuna vaitengesa njiva, “Bvisai zvinhu izvozvo muno; musaita imba yaBaba vangu imba yokutengesera.”

¹⁷ Vadzidzi vake vakarangarira kuti kwakanyorwa, kuchinzi, “Kushingairira imba yenyu kuchandipedza.”

¹⁸ Zvino vaJudha vakapindura, vakati kwaari, “Ungatiratidza chiratidzo cheiko, zvaunoita zvinhu izvozvo?”

¹⁹ Jesu akapindura, akati kwavari, “Putsai temberi iyi, ini ndichaimutsazve namazuva matatu.”

²⁰ Zvino vaJudha vakati, “Temberi iyi yakavakwa namakore ana makumi mana namatanhatu, zvino iwe ungaimutsa namazuva matatu here?”

²¹ Asi iye akanga achireva temberi yomuviri wake.

²² Zvino akati amutswa kuvakafa, vadzidzi vake vakayeuka, kuti akanga areva izvozvo; vakatenda Rugwaro neshoko rakanga rarehwa naJesu.

²³ Zvino nguva yaakanga ari Jerusaremu pamutambo wePasika, vazhinji vakatenda kuzita rake, vachiona zviratidzo zvaaiita.

²⁴ Asi Jesu haana kutendeseka navo, nokuti akanga achivaziva vose.

²⁵ Akanga asingatsvaki kuti munhu mumwe apupure zvomunhu; nokuti akanga achiziva iye zviri mumunhu.