Genesi 8 - Shona BIBLE

Nowa anobuda muareka

¹ Zvino Mwari wakarangarira Nowa nezvipenyu zvose, nezvipfuwo zvose zvakanga zviri muareka naye; Mwari akafambisa mhepo panyika, mvura ikaserera,

² namatsime apakadzika namahwindo edenga akazarirwa, nemvura yakabva kudenga ikadziviswa,

³ mvura ikaramba ichidzoka panyika; mazuva ane zana namakumi mashanu akati apfuura, mvura ikaderera.

⁴ Nomwedzi wechinomwe, nezuva regumi namanomwe romwedzi, areka ikamira pamusoro pamakomo eArarati.

⁵ Mvura ikaramba ichiderera kusvikira pamwedzi wegumi; nomwedzi wegumi, nezuva rokutanga romwedzi misoro yamakomo ikaonekwa.

⁶ Mazuva ana makumi mana akati apfuura, Nowa akazarura hwindo reareka raakanga aita;

⁷ akabudisa gunguo, iro rikaramba richibhururuka–bhururuka kusvikira mvura yapwa panyika.

⁸ Ipapo akabhururutsa njiva paakanga ari, kuti aone kana mvura yaserera panyika;

⁹ asi njiva haina kuwana pokuzorodza rutsoka rwayo, ikadzokera kwaari kuareka, nokuti mvura yakanga iri pamusoro penyika yose; akatambanudza ruoko rwake, akaitora, akaipinza kwaari muareka.

¹⁰ Ipapo akagara mamwe mazuva manomwezve, akabudisazve njiva paareka;

¹¹ njiva ikapinda kwaari madekwana; onei mumuromo mayo makanga muine rushizha rwomuorivhi rwakatanhwa; naizvozvo Nowa wakaziva kuti mvura yakanga yaserera panyika.

¹² Akagarazve mazuva manomwe, akabudisazve njiva; iyo haina kudzokerazve kwaari.

¹³ Pagore ramazana matanhatu nerimwe, pamwedzi wokutanga, nomusi wokutanga womwedzi, mvura yakanga yapwa panyika; ipapo Nowa akabvisa denga reareka, akatarira, onei pasi pose paoma.

¹⁴ Nomwedzi wechipiri, nezuva ramakumi maviri namanomwe romwedzi, nyika yakanga yaoma.

¹⁵ Zvino Mwari wakataura naNowa akati,

¹⁶ “Budai muareka, iwe, nomukadzi wako, navanakomana vako, navakadzi vavanakomana vako, pamwechete newe.

¹⁷ Budisawo pamwechete newe zvipenyu zvose zvenyama zvinewe, zvinoti, shiri, nezvipfuwo, nezvinokambaira zvose, nezvinokambaira panyika, kuti zviwande panyika, zvibereke, zvive zvizhinji panyika.”

¹⁸ Ipapo Nowa akabuda, iye navanakomana vake, nomukadzi wake, navakadzi vavanakomana vake pamwechete naye;

¹⁹ nemhuka dzose, nezvinokambaira zvose, neshiri dzose, nezvose zvinofamba panyika, namarudzi azvo, zvakabuda paareka.

²⁰ Nowa akavakira Jehovha atari, akatora dzimwe pamhuka dzose dzakanaka neshiri dzose dzakanaka, akapisira zvipiriso zvinopiswa paatari.

²¹ Jehovha akanzwa kunhuwira kwakanaka, Jehovha akati mumwoyo make, “Handichazotukizve nyika nokuda kwomunhu; nokuti kufunga kwomwoyo womunhu kwakaipa kubva pauduku hwake; handichazorovizve zvipenyu zvose, sezvandakaita.

²² Nguva yose yenyika kudyara nokucheka, kutonhora nokudziya, zhizha nechando, masikati nousiku hazvingagumi.”