Genesi 4 - Shona BIBLE

Kaini naAbhero

¹ Zvino Adhamu wakaziva mukadzi wake Evha; iye ndokutora mimba, akapona Kaini, akati, “Ndawana munhu, ndichibatsirwa naJehovha.”

² Akazoponazve munun'una wake Abhero. Abhero wakanga ari mufudzi wamakwai, Kaini wakanga ari murimi wevhu.

³ Zvino nguva yakati yapfuura, Kaini akauya nezvibereko zvevhu, zvive zvipo kuna Jehovha.

⁴ NaAbherowo akauya namakwayana ake ematangwe akakorawo. Jehovha ndokugamuchira Abhero nechipiriso chake;

⁵ asi Kaini nechipiriso chake haana kumugamuchira. Ipapo Kaini akatsamwa kwazvo, chiso chake chikaunyana.

⁶ Ipapo Jehovha akati kuna Kaini, “Watsamwireiko? Chiso chako chakaunyana nei?

⁷ Kana ukaita zvakanaka, haungafari here pachiso chako? Kana usingaiti zvakanaka, zvivi zvinokuhwandira pamusuwo; zvichakutsvaka, asi iwe unofanira kuzvikunda.”

⁸ Zvino Kaini wakataurirana nomunun'una wake Abhero; vakati vari kusango, Kaini ndokumukira Abhero munun'una wake, akamuuraya.

⁹ Ipapo Jehovha akati kuna Kaini, “Ari kupiko Abhero, munun'una wako?” Iye akati, “Handizivi, ndini mufudzi womunun'una wangu here?”

¹⁰ Akati, “Waiteiko? Izwi reropa romunun'una wako rinodaidzira kwandiri panyika.

¹¹ Zvino watukwa, wadzingwa panyika, iyo yakashamisa muromo wayo kugamuchira ropa romunun'una wako paruoko rwako;

¹² kana uchirima ivhu, haringakupi simba raro; uchava mutizi nomudzungairi panyika.”

¹³ Ipapo Kaini akati kuna Jehovha, “Kurohwa kwangu kukuru, handingakutakuri.

¹⁴ Tarirai, mandidzinga nhasi panyika ino, ndichavanda pamberi penyu; ndichava mutizi nomudzungairi panyika; ani naani anondiwana achandiuraya.”

¹⁵ Jehovha akati kwaari, “Naizvozvo ani naani anouraya Kaini achatsiviwa kanomwe.” Jehovha ndokuisira Kaini chiratidzo, kuti munhu anozomuwana arege kumuuraya.

¹⁶ Ipapo Kaini wakabva pamberi paJehovha, akandogara panyika yeNodhi, kumabvazuva kweEdheni.

Vana vaKaini

¹⁷ Kaini akaziva mukadzi wake, akatora mimba, akapona Inoki; akavaka guta, akatumidza guta zita romwanakomana wake Inoki.

¹⁸ Inoki akaberekerwa Iradhi; Iradhi akabereka Mehujaeri; Mehujaeri akabereka Metushaeri; Metushaeri akabereka Rameki;

¹⁹ Rameki akawana vakadzi vaviri, zita romumwe rainzi Adha, zita romumwe rainzi Zira.

²⁰ Adha akapona Jabhari; iye waiva baba vavanhu vanogara mumatende vane zvipfuwo.

²¹ Zita romunun'una wake raiva Jubhari; iye waiva baba vavose vanoridza mbira nenyere.

²² Zira wakapona Tubharikaini, mupfuri wenhumbi dzose dzendarira nedare; hanzvadzi yaTubharikaini waiva Naama.

²³ Rameki akati kuvakadzi vake; “Adha naZira, inzwai izwi rangu, Imi vakadzi vaRameki, teererai zvandinotaura; Nokuti ndinouraya munhu unondikuvadza, Nejaya rakandirova;

²⁴ Kana Kaini achitsiviwa kanomwe; Zvirokwazvo Rameki kana makumi manomwe nenomwe.”

²⁵ Adhamu akazivazve mukadzi wake, akabereka mwanakomana, akamutumidza zita rinonzi Seti; nokuti wakati, “Mwari wandipa mumwe mwana pachigaro chaAbhero, zvaakaurayiwa naKaini.”

²⁶ NaSeti wakaberekerwa mwanakomana, akamutumidza zita rinonzi Enoshi. Nenguva iyo vanhu vakatanga kudana zita raJehovha.