Eksodo 37 - Shona BIBLE

Areka, netafura, nemwenje, neatari yezvinonhuwira

¹ Zvino Bhezareri akaita areka yamatanda omuakeshia; kureba kwayo kwaiva makubhiti maviri nehafu, noupamhi hwayo kubhiti rimwe nehafu, nokukwirira kwayo kubhiti rimwe nehafu;

² akaifukidza nendarama yakaisvonaka nechomukati nechokunze, akaita pamusoro payo hata yendarama yakaipoteredza.

³ Akaiumbira zvindori zvina zvendarama, akazviisa pamakumbo ayo mana; zvindori zviviri zvaiva parutivi rumwe, nezvindori zviviri panorumwe rutivizve.

⁴ Akaveza matanda omuakeshia, akaafukidza nendarama,

⁵ akapinza matanda iwayo muzvindori zvaiva panhivi dzeareka, kuti areka itakurwe nawo.

⁶ Akaitawo chifunhiro chokuyananisa nendarama yakaisvonaka; kureba kwacho kwaiva makubhiti maviri nehafu, noupamhi hwacho kubhiti rimwe nehafu;

⁷ akaita makerubhi maviri endarama, akaaita nendarama yakapambadzirwa pamiromo miviri yechifunhiro chokuyananisa,

⁸ kerubhi rimwe pamuromo mumwe, nerimwe kerubhi panomumwe muromo; akaita makerubhi pamiromo yacho miviri, zvikava chinhu chimwechete nechifunhiro chokuyananisa.

⁹ Makerubhi akanga akatambanudzira mapapiro awo kumusoro, akafukidza chifunhiro chokuyananisa namapapiro awo, zviso zvawo zvakatarisana; zviso zvamakerubhi zvakanga zvakatarira chifunhiro chokuyananisa.

¹⁰ Akaitawo tafura yamatanda omuakeshia; kureba kwayo kwaiva makubhiti maviri, noupamhi hwayo kubhiti rimwe, nokukwirira kwayo kubhiti rimwe nehafu.

¹¹ Akaifukidza nendarama yakaisvonaka, akaiitirawo hata yendarama yakanga ichiipoteredza;

¹² akaiitirawo ukomba hwakanga huchiipoteredza, upamhi hwahwo sechanza; akaiitirawo hata yendarama yaipoteredza ukomba hwayo.

¹³ Akaiitira zvindori zvina zvendarama, akaisa zvindori pamakona mana aiva pamakumbo ayo mana.

¹⁴ Zvindori zvaiva pedyo noukomba, paiva pokutakura tafura napo namatanda.

¹⁵ Akaita matanda omuakeshia, akaafukidza nendarama, kuti tafura itakurwe nawo.

¹⁶ Akaitawo midziyo yaigara pamusoro petafura, ndiro dzayo, nembiya dzayo, nemikombe yayo, nezvirongo zvayo zvokudira nazvo, zvose zvendarama yakaisvonaka.

¹⁷ Akaitawo chigadzikiro chemwenje chendarama yakaisvonaka; akaita chigadzikiro nendarama yakapambadzirwa, chigadzikiro chacho, nehunde yacho, notumbiya twacho, namapfundo acho, namaruva acho; zvose zvikava chinhu chimwechete nacho;

¹⁸ kumativi acho kukabuda matavi matanhatu, matavi matatu echigadzikiro kuno rumwe rutivi rwacho, namatavi matatu echigadzikiro kuno rumwe rutivi rwacho.

¹⁹ Tumbiya tutatu twakaumbwa samaruva omuamanda padavi rimwe, nefundo neruva, notumbiya tutatuzve twakaumbwa samaruva omuarimondi pane rimwe davi, nefundo neruva; saizvozvo matavi matanhatu akabuda pachigadzikiro.

²⁰ Uye pachigadzikiro pakanga panotumbiya tuna twakanga twakaumbwa samaruva omuarimondi, namafundo atwo, namaruva atwo;

²¹ nefundo panyasi pamatavi maviri akanga akaumbwa pamwechete nacho; nefundozve panyasi pamatavi maviri akaumbwa pamwechete nacho, akafanana namatavi matanhatu akabuda pachigadzikiro.

²² Mafundo azvo namatavi azvo akanga akaumbwa pamwechete nazvo, zvose zvikava chinhu chimwe chakanga chakumbwa nendarama yakaisvonaka, yakapambadzirwa.

²³ Akaita mwenje yacho minomwe, nembato dzacho, nendiro dzacho, zvose nendarama yakaisvonaka.

²⁴ Akachiumba netarenda rendarama yakaisvonaka, pamwechete nemidziyo yayo yose.

²⁵ Akaitawo atari yezvinonhuwira nomuakeshia; kureba kwayo kwakanga kuri kubhiti rimwe, noupamhi hwayo kubhiti rimwezve; nhivi dzose ina dzakanga dzakaenzana; kukwirira kwayo kwaiva makubhiti maviri, nenyanga dzayo dzakanga dziri chinhu chimwechete nayo.

²⁶ Akaifukidza nendarama yakaisvonaka, kumusoro kwayo, nenhivi dzayo dzose, nenyanga dzayo; akaiitirawo hata yendarama yakanga yakaipoteredza.

²⁷ Akaiitirawo zvindori zviviri zvendarama pasi pehata yayo, pakona dzayo mbiri panhivi dzayo mbiri, pakava pokuitakura napo namatanda.

²⁸ Akaitawo matanda omuakeshia, akaafukidza nendarama.

²⁹ Akaitawo mafuta matsvene okuzodza nawo, nezvinonhuhwira zvakaisvonaka zvemiti inonaka, zvikava zvakavhenganiswa nouchenjeri hwomuvhenganisi wezvinonhuhwira.