Eksodo 28 - Shona BIBLE

Nguo dzoMupristi Mukuru

¹ “Zvino uswededze kwauri Aroni, mukuru wako, navanakomana vake pamwechete naye, vabude pakati pavana VaIsiraeri, kuti andishumire pabasa roupristi, vanoti; Aroni, naNadhabhi, naAbhihu, naEreazari, naItamari, ivo vanakomana vaAroni.

² Uitire Aroni, mukuru wako, nguo tsvene, akudzwe nadzo, uye huve ukomba.

³ Utaure navose vane mwoyo yakachenjera, vandakazadza nomweya wouchenjeri, kuti vaitire Aroni nguo dzokumuita mutsvene nadzo, kuti andishumire pabasa roupristi.

⁴ Nguo dzaunofanira kuita ndidzo: Hombodo yechipfuva, neefodhi, nejasi, nenguo yakarukwa, nenguwani, nebhandi; ngavaitire Aroni, mukoma wako, navanakomana vake nguo tsvene, kuti andishumire pabasa roupristi.

⁵ Ngavatore ndarama, nezvakarukwa zvitema, nezvishava, nezvitsvuku, nomucheka wakaisvonaka.

⁶ “Efodhi ngavaiite nendarama, nezvakarukwa zvitema, nezvishava, nezvitsvuku, nomucheka wakaisvonaka wakarukwa, rive basa romubati wakachenjera.

⁷ Ngaive namabande maviri pamafudzi akabatanidzwa pamiromo yayo miviri; kuti ibatanidzwe saizvozvo.

⁸ Nebhandi rakarukwa nomubati wakachenjera, riri pamusoro payo, rokuisunga naro, ngariitwe saiyo, uye chive chinhu chimwechete nayo, iitwe nendarama, nezvakarukwa zvitema, nezvishava, nezvitsvuku, nomucheka wakaisvonaka wakarukwa.

⁹ Utorewo mabwe maviri eonikisi, ugonyora pamusoro pawo mazita avana VaIsiraeri,

¹⁰ mazita matanhatu pabwe rimwe, namazita matanhatu akasara pane rimwe ibwezve, sapakuzvarwa kwavo.

¹¹ Unyore pamabwe iwayo maviri, sebasa romuvezi wamabwe, sezvinonyorwa ibwe rokusimbisa, mazita avana VaIsiraeri; uanyudze muzviruva zvendarama.

¹² Zvino uise mabwe iwayo maviri pamabande apamafudzi eefodhi, kuti ave mabwe okurangaridza vana VaIsiraeri; Aroni ngaatakure mazita awo pamberi paJehovha pamafudzi ake maviri, chive chokurangaridza.

¹³ “Unofanira kuitawo zviruva zvendarama,

¹⁴ nezviketani zviviri zvendarama yakaisvonaka; uzviite setambo rwakakoswa, ugoisa zviketani zvacho zvakamoniwa pazviruva izvozvo.

¹⁵ “Unofanira kuitawo hombodo yechipfuva yokutonga, rive basa romubati wakachenjera; uiite ifanane neefodhi, uiite nendarama, nezvakarukwa, zvitema, nezvishava, nezvitsvuku, nomucheka wakaisvonaka wakarukwa.

¹⁶ Ngaive nenhivi ina dzakaenzana, dzakaita mheto mbiri; kureba kwayo kuite sapanosvika minwe, noupamhi hwayo sapanosvika minwewo.

¹⁷ Uise mukati mayo zviruva zvina mabwe, misara mina yamabwe; mumwe musara uve nesadhio, netopasi, nekabhunakeri. Ndiwo musara wokutanga.

¹⁸ Pamusara wechipiri samaragidhino, nesafiri, nedhaimani;

¹⁹ pamusara wechitatu hiakindi, neagati, neametisi;

²⁰ pamusara wechina beriri neonikisi, nejasipiri; ngaapotedzwe nendarama muzviruva zvawo.

²¹ Mabwe iwayo ngaave namazita avana VaIsiraeri ane gumi namaviri, sezvinoita mazita avo; ngaave namarudzi ane gumi namaviri, rimwe nerimwe rive nezita raro, sezvinonyorwa ibwe rokusimbisa.

²² Napahombodo yechipfuva unofanira kuita zviketani zvakafanana notambo, zvendarama yakamoniwa yakaisvonaka.

²³ Uitewo pahombodo yechipfuva zvindori zviviri zvendarama, ugoisa zvindori izvo zviviri pamicheto miviri yehombodo yechipfuva.

²⁴ Zvino uise zviketani zviviri zvendarama yakamoniwa pazvindori zviviri zviri pamicheto yehombodo yechipfuva.

²⁵ Nemimwe miromo miviri yezviketani zviviri zvakamoniwa uzviise pazviruva zviviri, uzviise pamabande apamafudzi eefodhi nechemberi kwayo.

²⁶ Uitewo zvindori zviviri zvendarama, ugozviisa pamicheto miviri yehombodo yechipfuva pamupendero wayo uri kurutivi rweefodhi nechomukati.

²⁷ Unofanira kuitawo zvindori zviviri zvendarama, ugozviisa pamabande maviri apamafudzi eefodhi zasi nechemberi kwayo, pedyo payakabatanidzwa napo, pamusoro pebhandi reefodhi rakarukwa nouchenjeri.

²⁸ Zvino ngavasunganidze hombodo yechipfuva nezvindori zvayo pazvindori zveefodhi netambo nhema, kuti ruve pamusoro pebhandi reefodhi rakarukwa nouchenjeri, kuti hombodo yechipfuva irege kusununguka paefodhi.

²⁹ “Naizvozvo Aroni anofanira kutakura mazita avana VaIsiraeri pahombodo yechipfuva yokutonga pamwoyo wake, kana achipinda panzvimbo tsvene, kuti chive chirangaridzo pamberi paJehovha nguva dzose.

³⁰ Unofanira kuisawo muhombodo yechipfuva yokutonga Urimi neTumimi, kuti zvive pamwoyo waAroni kana achipinda pamberi paJehovha; Aroni agotakura kutongwa kwavana VaIsiraeri pamwoyo wake pamberi paJehovha nguva dzose.

³¹ “Unofanira kuita jasi reefodhi rose romucheka mutema.

³² Ngarive neburi rokupinza musoro pakati paro, rive nomupendero wakarukwa unopoteredza buri raro, sapaburi renguo yokurwa, kuti irege kubvaruka.

³³ Pamipendero yaro unofanira kuita matamba ezvakarukwa zvitema, nezvishava, nezvitsvuku, anopoteredza mupendero, nezvitare zvinorira zvendarama pakati pawo kunhivi dzose.

³⁴ Ngapave nechitare chimwe nedamba rimwe, chitare chimwe nedamba rimwe pamipendero yejasi kunhivi dzose.

³⁵ Aroni ngaarifuke kana achishumira, kuti kurira kwazvo kunzwike, kana achipinda panzvimbo tsvene pamberi paJehovha, uye kana achibuda, kuti arege kufa.

³⁶ “Unofanira kuitawo hwendefa rendarama yakaisvonaka, ugonyora pamusoro paro sezvinonyorwa ibwe rokusimbisa, uchiti: MUTSVENE KUNA JEHOVHA.

³⁷ Uriise patambo nhema, igoiswa panguwani, ive nechemberi kwenguwani.

³⁸ Ngarive pahuma yaAroni, Aroni atakure zvakaipa zvingavapo pazvinhu zvitsvene, zvichaitwa zvitsvene navana VaIsiraeri pazvipo zvavo zvitsvene zvose; rinofanira kugara pahuma yake nguva dzose, kuti ivo vagamuchirwe pamberi paJehovha.

³⁹ “Unofanira kuitawo nguo yakarukwa yomucheka wakaisvonaka, uye uite nguwani yomucheka wakaisvonaka, uye uitewo bhandi, rive basa romusoni anogona.

⁴⁰ “Navanakomana vaAroni unofanira kuvaitira nguo, uvaitirewo mabhandi, uvaitirewo nguwani dzomusoro, vakudzwe nadzo, uye huve ukomba.

⁴¹ Udzifukidze Aroni, mukoma wako, pamwechete navanakomana vake; uye uvazodze, nokuvagadza, nokuvatsaura, kuti vandishumire pabasa roupristi.

⁴² Unofanira kuvaitira mabhuruku omucheka kuti vafukidze nyama yavo yakashama; ngaatange pazviuno, asvikire pachidya;

⁴³ ngaafukwe naAroni navanakomana vake kana vachipinda mutende rokusangana, uye kana vachiswedera paatari kushumira panzvimbo tsvene; kuti varege kuzvitorera mhosva, vakafa; ngauve mutemo usingaperi kwaari nokuvana vake vanomutevera.