Eksodo 17 - Shona BIBLE

Vanopiwa mvura padombo paRefidhimu

¹ Zvino ungano yose yavana VaIsiraeri yakabva murenje reSini, vakafamba vachibva kune imwe nzvimbo vachienda kune imwe, sezvavakanga varairwa naJehovha, vakavaka misasa yavo paRefidhimu; zvino ipapo pakanga pasina mvura inganwiwa navanhu.

² Vanhu vakakavadzana naMosesi, vakati, “Tipe mvura tinwe.” Mosesi akati kwavari, “Munokakavadziraneiko neni? Munoedzereiko Jehovha?”

³ Vanhu zvino vakanga vane nyota yemvura ipapo, vanhu vakapopotera Mosesi, vakati, “Wakatibudisireiko Ijipiti, kuti utiuraye nenyota, isu navana vedu, nezvipfuwo zvedu?”

⁴ Mosesi akachema kuna Jehovha, akati, “Ndichaiteiko navanhu ava? Voda kunditaka namabwe.”

⁵ Jehovha akati kuna Mosesi, “Tungamira pamberi pavanhu, uende navakuru VaIsiraeri, utore tsvimbo yako yawakamborova rwizi nayo muruoko rwako uende.

⁶ Tarira ndichamira pamberi pako padombo riri paHorebhu, urove dombo iro, mvura ichabuda pariri, vanhu vagonwa.” Mosesi akaita saizvozvo pamberi pavakuru VaIsiraeri.

⁷ Akatumidza nzvimbo iyo zita rinonzi Masa neMeribha nokuda kwokurwa kwavana VaIsiraeri; uye nokuti vakaedza Jehovha, vachiti, “Jehovha ari pakati pedu here, kana kwete?”

VaIsiraeri vanokunda Amareki

⁸ Zvino Amareki akauya kuzorwa naVaIsiraeri paRefidhimu.

⁹ Mosesi akati kuna Joshua, “Utitsaurire varume, ugondorwa naAmareki; mangwana ini ndichamira pamusoro pechikomo, ndakabata tsvimbo yaMwari muruoko rwangu.”

¹⁰ Joshua akaita sezvaakanga audzwa naMosesi, akandorwa naAmareki; Mosesi naAroni naHuri vakakwira pamusoro pechikomo.

¹¹ Zvino zvakati kana Mosesi osimudza ruoko rwake, VaIsiraeri vokunda, kana oregera ruoko rwake pasi, Amareki okunda.

¹² Asi maoko aMosesi akazoneta, zvino vakatora ibwe, vakariisa pasi pake, akagara pamusoro paro, Aroni naHuri vakatsigira maoko ake, mumwe kuno rumwe rutivi, mumwe kuno rumwe rutivi; maoko ake akava nesimba kusvikira pakuvira kwezuva.

¹³ Joshua akakunda Amareki navanhu vake neminondo inopinza.

¹⁴ Zvino Jehovha akati kuna Mosesi, “Nyora izvi mubhuku, vazvirangarire, uzvirondedzerewo munzeve dzaJoshua, kuti ini ndichabvisa chose pasi pokudenga zvose zvinorangaridza Amareki.”

¹⁵ Ipapo Mosesi akavaka atari, akaitumidza zita rinonzi Jehovha–nisi;

¹⁶ akati, “Noruoko pachigaro choushe chaJehovha, ndinopika ndichiti, ‘Jehovha acharwa naAmareki kusvikira kumarudzi namarudzi.’ ”