Zozuwe 24 - SEBR SÕNGO

Sikɛm Tigsg kãsenga

¹ A Zozuwe tigma Israyɛl buuda Sikɛm. Yɩɩ Wẽnd taoore la a bool nin-kẽemba, taoor dãmba, bʋ-kaoodba la tʋʋmda zu-raado.

² A yeela b fãa: «Ad Soaala, Israyɛl Wẽnnaama, koɛɛga: ‹A Tera, y yaab a Abraam la a Nawor ba, da kẽeda Efrat kʋɩlga rʋʋnde. A ra waoogda wẽnd dãmb a taaba.

³ M dʋʋga Efrat kʋɩlgã n tɩ bool y ba, a Abraam, n kɩt t'a wa Kanaã tẽnga. M kõ-a-la rogem, m kõ-a-la a Izaak.

⁴ M kõ-la a Izaak, a Zakoob la a Ezayu. M kõ-la a Ezayu Seyir tãnga. A Zakoob ne a kamba wa n siga Ezipt.

⁵ M waa n tʋma a Moyiiz ne a Aarõ la m sɩbga Ezipt ne bõn-bãn m sẽn maan be. M waa n yiis-y-la be.

⁶ M yiisa y ba-rãmb Ezipt tẽnga. Y teesa mogrã. Ezipt rãmb yii ne wed-dʋʋdba la bilim-bilm, n pʋg y ba rãmba n ta Rudum Mogre.

⁷ B kelma Wẽnde tɩ b yals lik sẽn tagme yãmb ne Ezipt rãmba sʋka. B kɩtame tɩ mogra lɛɛg n wa rɩ-ba. Y yãenda ne y nin m sẽn maan Ezipt tẽnga. Y kẽna we-raoogẽ wã n kaoose.

⁸ M waa n kẽes-y-la Amoritsa tẽnga sẽn be Zʋrdẽ yaanga. B sẽn tak zabr ne yãmba, m dɩk-b lame n sagl y nusẽ. M sẽn menes-b yãmb taoore, y paama b tẽngã n sooge.

⁹ La a Balak, a Sipor biig la Moab dãmb dĩm, waa n yikame n na n tak zabr ne Israyɛl. A tɩ boola a Beor biig, a Balaam, t'a wa kãab-y beedo.

¹⁰ M pa sak n kelg a Balaam ye. Menga, a kong ning-y-la barka la m fãag-y-la a Balak nugẽ.

¹¹ Y rʋʋga Zʋrdẽ n ta Zeriko la Zeriko soaalba yik n teega ne yãmba. Amoritse, Perizitse, Kanaã rãmba, Ititse, Girgazitse, Ivitse la Zebuzitse me yika ne yãmba. M dɩk-b lame n sagl y nusẽ.

¹² M lʋɩɩsa kãnenkãas y taoore tɩ b rig Amoritsa dĩm dãmb a yiibu, ka tũ ne sʋʋg wõogre bɩ tãp yãagr ye.

¹³ M kõ-y-la tẽng sẽn dɩlgd a neb tɩ b tʋʋlg ka kaoog ye, tẽns yãmb sẽn ka nams n me, n yaool n kẽ ye, bugsuntund la oliv tɩɩse y sẽn pa sel n yaool n dɩt b biis rũnna.› »

¹⁴ A Zozuwe paasame: «Zoe-y Soaala marsã, tũ-y-b zãng ne pʋ-peelem. Zãag-y y mense ne wẽn-naandsã y yaab rãmba sẽn waoog Efrat yaang, la Ezipt tẽnga. Pʋg-y Soaala.

¹⁵ Yãmb sã n ka rat n pʋg Soaala bɩ y yãk rũnna wẽnd niyns y sẽn na n pʋgã: y ba-rãmb sẽn pʋg b rãmb kʋɩlga rʋʋnde, bɩ wẽn-naandse, b sẽn ket n waoogd Amoritsa tẽns niyns y sẽn kẽed rũnna. Sã n ya maam ne m roogo, yaa Wẽnnaam, d Soaala, la tõnd na n tũ.»

¹⁶ Zãma wã leokame: «Wẽnd na laas d ne Soaala basgo la wẽn-naandsa pʋgbo!

¹⁷ Ka Soaala, tõnd Wẽnnaam, n yiis tõnd ne d ba-rãmb Ezipt, d yembd tẽnga, n maan bõn-bãn d nifẽ, n wogl d yõor d so woka zugu la tẽns niyns d sẽn pɩʋʋga laa?

¹⁸ Soaala riga tẽnsa rãmb d taoore la Amoritsa tẽn-peelmẽ dãmba n yɩɩda. Tõnd me ratame n kẽ d Soaala tɩ bãmb la tõnd Wẽnde.»

¹⁹ Dẽ la a Zozuwe yeel-ba: «Y pa na n tõog n pʋg Soaala ye tɩ b yaa Wẽnd sẽn pid ne sõmblem. Yaa Wẽnd sẽn pa rat tɩ b waoog bũmb a to n paas bãmb ye. B kõ pa n ka sɩbg y tõdgre la y beegr ye.

²⁰ Y sã n bas bãmb pʋgbo n pʋg wẽn-naandsã, bãmb me na nams yã, b na menes yã la bãmb n yaool n sɩng n maan y neere.»

²¹ Zãma wã leoka a Zozuwe: «Yaa Soaala la tõnd na n pʋge, ka na n yɩ wẽn-naandsa ye.»

²² T'a Zozuwe lɛɛg n yeele: «Yãmb meng kaseto n na n paalg yã la y kõta kaseto tɩ yaa yãmb meng n yãk Soaala la yaa Soaala la y na n tũ bala.» Tɩ b leoke: «N-ye! D meng kõta kaseto.»

²³ T'a Zozuwe me yeele: «Sã n ya woto yiis-y bu-zẽmba wẽn-naandsa sẽn be yãmb sʋka la kɩll-y sũuri n tees Soaala, a Israyɛl Wẽnnaam.»

²⁴ Zãma wã yeela a Zozuwe: «Yaa d Soaala, d Wẽnnaam, la d dat n pʋge, bãmb noor sẽn togs la d na n deege.»

Sikɛm Kaseto

²⁵ Ba daare, yɩɩ woto la a Zozuwe ne zãma wã kaool ne taaba. Sikɛm tẽnga; a Zozuwe kõo Israyɛl kamba b rog-n-mik la noy-niyns b sẽn na n deege.

²⁶ A Zozuwe gʋlsa rẽ fãa Wẽnnaam noor sebra pʋga. A Rɩka kug bedre n sel kʋk tẽngre, la kʋk kãng bee Wẽnd sẽn yãk b waoogr zĩigẽ wã.

²⁷ A Zozuwe yeela nebã: «Ade, kug kãnga n na n yɩ d paalgr kaseto t'a wʋma Wẽnd sẽn togsd bũmb ninga fãa; a na n yɩ kaseto n gɩgd-y tɩ y da bas Wẽnnaam, y Soaala ye.»

²⁸ A Zozuwe bas-b lame la ned kam fãa leba a tẽngẽ.

A Zozuwe kũum

²⁹ Dẽ poore a Zozuwe, a Nun biig la Wẽnd sõgna, ki-la a yʋʋm koabg la piiga.

³⁰ B mum-a-la a pʋɩɩr tẽngẽ, Timnat-Sera sẽn be Efrayim tãnga zugu, Gaas tãng goabga.

³¹ A Israyɛl pʋga Wẽnd n tãag a Zozuwe kũum la nin-kẽemsa fãa sẽn kell n vɩɩnd, yẽ loogr poore. A Israyɛl pʋga Wẽnd n tãag sẽn da yãend-b tʋʋm sõma niyns Wẽnd sẽn tʋm a Israyɛl yĩnga loogre.

³² Israyɛl kamba da yii Ezipt ne a Zozɛf kõaba la b mum-b-la pʋʋg ninga a Zakoob sẽn da ra a Sikɛm ba, a Amor, kamb nengẽ. A da raa-a-la wanzurf wakɩ koeems koabga la pʋ-kãng ra lebga a Zozɛf kamb pʋɩɩre.

³³ A Aarõ biig, a Elazar, me waa n kiime. B mum-a-la Gibea, a biig, a Pinas, tẽnga. Yaa Efrayim tãmsa tãn-bila la b da rɩk n kõ a Pinas.