Sõadga 4 - SEBR SÕNGO

Levitsa ne b tʋʋma

¹ Soaala-Wẽnd yeela a Moyiiz ne a Aarõ:

² «Ges a Levi kamba sʋka n welg a Keyat roogẽ,

³ neb niyns yʋʋm sẽn ta pis-tã n digd pis-nu tɩ b wa tʋm sɛka roogẽ.

⁴ Ad-b tʋʋmd sẽn na yɩ a soaba sɛka roogẽ: te-sõma wã gesgo.

⁵ B sã n na n viig sɛka roogo, a Aarõ ne a kamb n na n wa yak peen-lillã la b na n dɩk-a lame n pil kuga walsa koglgo.

⁶ B lut-a lame n paas ne gãong sẽn ka madgd koom. B lebd n pila fãa ne peend mismiuugu n yaool n tui ra-tuiidsã, koglga zẽkr yĩnga.

⁷ Te-roagendga zugu b yɛdgda peend mismiuugu, n dɩgl yõg-laasã, laasã, wũmlsã, ko-teesã la bura sẽn ka tõe n vaalã.

⁸ Dẽ fãa luta ne peen moomd yʋs, n sẽbg ne gãong sẽn ka madgd koom, n yaool n tui ra-tuiidsã te-roagendga zẽkr yĩnga.

⁹ B baooda peend mismiuugu n lud sãnem fitil kãsengã n paas bug-rɩɩnda sẽn dʋʋgd zĩig ningã, ne yɩʋʋdã, wõrsdgã la kaama tʋgdã.

¹⁰ B lut-b-la ne gãnd sẽn ka madgd koom n loe pãndare.

¹¹ Yũ-noog maan-kugra zugu, b tʋɩta peend mismiuugu, n mobg-a ne gãnd sẽn ka tõe n madg koom la b tui a raadã a tʋkr yĩnga.

¹² B rɩkda teed niyns fãa b sẽn tar b rãmb tʋʋmde sɛka roogẽ, n lud ne peend mismiuugu, n pil ne gãnd sẽn ka madgd koom, n loe pãndare, n tʋke

¹³ Bãmb n wʋkd tompɛglma maan-kugra zugu n lɛɛg n gãneg peend miuugu,

¹⁴ n wʋk teeda b sẽn tar b rãmb tʋʋmdã maanda yĩnga: yɩʋʋda sẽn na n wʋk bug-saala, kut roɛ sẽn tar n tusd bugum, tompɛglma kardo, tompɛglma laase, nemda kõse, zɩ-mesdma laase la maan-kugra teed a taaba. B luta rẽ fãa ne gãnd sẽn ka madgd koom. B tuiida raadã maan-kugra tʋkr yĩnga.

¹⁵ Yikr sã n ta, a Aarõ ne a kamba pinda teeda fãa t'a Keyat kamba wa tʋk n looge. Rooga sã n ket n yɛs a zĩigẽ b pa saagd n sɩɩs bũmb ye. Yɩta b kũum. Sɛka roog teed niyns a Keyat kamba sẽn tõe n sɩɩs la sẽn wilgã.

¹⁶ Maan-kʋʋd a Aarõ biig a Elazar, n da get fitilsa kaama yelle, tɩdara sẽn na n yõogã, kũuna burã, kaama sẽn taagd maan-kʋʋdbã. Yẽ n get sɛka roog ne a pʋgẽ teeda fãa.»

¹⁷ Soaala-Wẽnd yeela a Moyiiz:

¹⁸ «Da bas-y t'a Keyat yagensa kolg roogã n bao b kũum ye.

¹⁹ Ad-y sẽn na n maan bũmb ning tɩ b ra ki ye b sã n kolgd zĩ-sõngã: a Aarõ ne a kamba wat n yals ned kam fãa a tʋʋmd zĩigẽ, a sẽn tog n tʋka taoore.

²⁰ B ra saag n kẽ, gesg yĩng bal ye, ba ya nif kamseg pʋgẽ. B na n kiime.»

²¹ Soaala-Wẽnd yeela a Moyiiz:

²² «Sõd a Gersõ kamba zak-zaka, roog-roogo.

²³ Sõd neb niyns yʋʋm sẽn ta pis-tã n digd pis-nu sẽn deeg tʋʋmd sɛka roogẽ.

²⁴ Ad-a Gersõ kamba tʋʋmde, ad-b sẽn na n tʋke.

²⁵ Bãmb n zɩt sɛka zaka pɛɛla, sɛka roog menga ne a pɛɛlã la gãn niyns sẽn ka madgd kooma, sɛka rooga noor peen-lillã,

²⁶ zaka pɛɛla, wĩ wã la teed a taaba fãa, b sẽn deeg bũmb ning fãa b tʋʋmda yĩnga.

²⁷ Yaa a Aarõ ne a kamba noor la a Gersõ yagensa na n tũ, yaa zɩɩb la b yet tɩ b tʋk bɩ yaa tʋʋmd a to la b yet tɩ b maan. Teeda tʋkr n na n yɩ b tʋʋmde.

²⁸ A Gersõ yagensa tʋʋmd la woto sɛka roogẽ; yaa zɩɩba tʋkr tʋʋmde la maan-kʋʋd a Itamar na n kõ-ba. A Itamar yaa a Aarõ biiga.»

²⁹ Soaala-Wẽnd yeela a Moyiiz: «Sã n ya a Merari yagensã, sõd bãmb me zak-zaka, roog-roogo.

³⁰ Sõd neb niyns yʋʋm sẽn ta pis-tã n digd pis-nu n kõ-b tʋʋmde, sɛka roogẽ.

³¹ Teeda tʋkr n na n yɩ b tʋʋmde. B sẽn na n tʋk la woto: rooga ra-lug paklsã, ra paadsã, ra-lug gilsã ne b te sendsã.

³² Le yaa ra-lug gilsã sẽn gũbg zakã ne b te-sendsã, biili wã ne wĩ wã la tʋʋma teedo. Y na n wilga ned kam fãa a sẽn tog n tʋke.

³³ Woto la a Merari kamba tʋʋmde sɛka roogẽ la a Aarõ biig a Itamar n na n ges b yelle.»

Sẽn tʋmd-ba sõore

³⁴ A Moyiiz, a Aarõ ne kãsem-dãmba sõda a Keyat yagensã zak-zaka, roog-roogo.

³⁵ B sõda neb niyns yʋʋm sẽn ta pis-tã n digd pis-nu la sẽn da tʋmd sɛka roogẽ,

³⁶ b paama neb tus a yi la kobs-yopoe la pis-nu.

³⁷ Ad-y b sẽn waa n na n sõd a Keyat kamba sẽn tʋmd sɛka roogẽ, a Moyiiz ne a Aarõ tũu Soaala-Wẽnd sẽn da kõ-b noor ningã.

³⁸ Ad-a Gersõ kamba sẽn sõd zak-zaka, roog-roogo,

³⁹ kamb niyns yʋʋm sẽn ta pis-tã n digd pis-nu la sẽn da tʋmd sɛka roogẽ,

⁴⁰ yɩɩ neb tus a yi la kobs-yoob la pis-tã.

⁴¹ Ad-y b sẽn waa n na n sõd a Gersõ kamba sẽn tʋmd sɛka roogẽ, a Moyiiz ne a Aarõ tũu Soaala-Wẽnd sẽn da kõ-b noor ningã.

⁴² Ad-a Merari kamba sõore. Sõd-b-la zak-zaka, roog-roogo.

⁴³ Sõda neb niyns yʋʋm sẽn ta pis-tã n digd pis-nu la sẽn tʋmd sɛka roogẽ,

⁴⁴ la b paama tus a tã la kobs-yi.

⁴⁵ Ad-y b sẽn waa n na n sõd a Merari kamba sẽn tʋmd sɛka roogẽ, a Moyiiz ne a Aarõ tũ Soaala-Wẽnd sẽn da kõ-b noor ningã.

⁴⁶ Sã n ya Levitsa a Moyiiz la Aarõ ne kãsem-dãmb sẽn sõd zak-zaka, roog-roogã,

⁴⁷ b sẽn sõd neb niyns fãa yʋʋm sẽn ta pis-tã n digd pis-nu la sẽn tʋmd sɛka roogẽ, rooga baasg bɩ a tʋkr sã n wa ta,

⁴⁸ b paama neb tus a nii la kobs-nu la pis-nii.

⁴⁹ Wala a Moyiiz sẽn paam Soaala-Wẽnd noor la a sẽn wilgi, ned kamb fãa ra mi-la a sẽn maande la zɩɩb ninga a sẽn tog n tʋke.