Sõadga 12 - SEBR SÕNGO

A Miriyam sɩbgre

¹ A Miriyam ne a Aarõ guglma ne a Moyiiz, a paga sẽn da ka Israyɛl poaka yĩnga. A Moyiiz ra kẽe kãadem ne Kusitga.

² B ra yeta woto: «Yaa ne a Moyiiz bal la Soaala-Wẽnd gom yã, bɩ b goma ne tõnd me.» Wɩdga lʋɩ Soaala-Wẽnd tʋbrẽ.

³ A Moyiiz ra yaa sulg-m-meng soaba, tẽng zug ka, ned sulg-m-meng ka yɩɩg a rẽnd ye.

⁴ Soaala-Wẽnd lɛɛg n yeela a Moyiiz, a Aarõ, a Miriyam: «Kẽng-y, yãmb y tãaba fãa, sɛka roogẽ.»

⁵ La Soaala-Wẽnd siga ne sawadgo n yals sɛka roog noore. B boola a Aarõ la a Miriyam tɩ b kolge,

⁶ tɩ b yeel-ba: «Kelg-y m goama. Ned sã n be yãmb sʋka n ya bãngda, ad-y yaa maam n likd m meng a soaba, yaa a zãmsdẽ la m gomd ne a soaba.

⁷ Yaool n ka boto ne m tʋʋm-tʋmd a Moyiiz ye, t'a yaa m sũurẽ neda la m teeg-a-la m zaka zãab yĩnga.

⁸ D gomda ne taab tɩ solgr kaẽ ye, d nee taaba, goama me ka goam bɩnem ye, tɩ m ne-la a Moyiiz tɩ yẽ me ne maam. Dɩlla yãmb yɩta a wãn n wɩt m tʋʋm-tʋmda Moyiiz?»

⁹ Wẽnnaam zabame n bas n looge.

¹⁰ Sawadga menema sɛka roog zugu, la a Miriyam tiig n bẽeda yĩng bãaga, n pelg wa goore. A Aarõ sẽn wẽnemd n ges-a, a mikame t'a bẽeda yĩnga,

¹¹ t'a na n yeel a Moyiiz: «D beegame, d zu-soaba, d maana gãeemdo, d maana wẽnga la ra sak-y tɩ d dɩ a taal ye.

¹² Bɩ a Miriyam yĩnga ra yɩ wa pa-tar sẽn wat moogo t'a yĩnga zoe n yaa a soaba ye!»

¹³ A Moyiiz pʋʋsa Soaala-Wẽnd woto: «Soaala, kõ-y yã a Miriyam laafi!»

¹⁴ La Soaala-Wẽnd leoka a Moyiiz: «Bãng t'a ba sã n da tʋbs a nenga kolkoodo a na n paẽ la ne yãnde rasem a yopoe. Bɩ a Miriyam zãag ne sika rasem a yopoe n yaool n le wa a zĩigẽ.»

¹⁵ B zãaga a Miriyam ne sika rasem a yopoe la yikr pa yiki t'a ka lɛɛg n wa a zakẽ ye.

¹⁶ Dẽ poor marsã la neba yaool n yi Aserot n tɩ wẽ b sik Parã zĩ-peen-daagẽ.