1 Sãmwɛlle 12 - SEBR SÕNGO

A Sol naam la a tõogo

¹ A Samwɛl yeela a Israyɛl kamba fãa: «Ade, mam kelga yãmb koɛɛga, m maana y sẽn yeel-m bũmb ning fãa la m ninga dĩm yãmb sʋka.

² Marsã, ad-y yaa dĩm ninga sẽn na n lʋɩ-a yãmb taoora la woto! Sã n ya maam yẽ, mam lebga nin-kẽema, m zug pelgame, la m kamba bee ne yãmba.

³ Mam kẽna yãmb taoore, al m yãadmẽ n ta rũnna. Ad ma! Togs-y-ma, Soaala-Wẽnd taoore, la b sẽn sõog a soab naam kaama taoore: ãnda la m yẽeg n deeg a naafo, n deeg a bõanga? Ãnda la m weoog yã, la ãnd soab la m tall toogo? Ãnda nengẽ la m deeg ligdi n mum m nini n kedb bʋʋdo? M na lebs-y y ligdi.»

⁴ Neba leokame: «Ayo! Fo ka maan-d pãng ye, fo ka tall tõnd toog ye, fo ka reeg kũun ned ba a ye nugẽ ye.»

⁵ T'a Samwɛl le yeel-ba: «Bɩ y wẽen, dũnna daarã, Soaala taoore la kaama sẽn pʋdg a soab zuga taoore, tɩ yãmb ka yãend baa fɩ m nugẽ ye.» Tɩ neba leoke: «D wẽendame!»

⁶ A Samwɛl yeela nebã: «Ad-y y wẽena ne Naaba-Wẽnd ning sẽn wilg b pãng ne a Moyiiz la a Aarõ la sẽn yiis y yaab rãmb Ezipt tẽnga!

⁷ Marsã kolg-y ka tɩ m paalg-y bʋʋdo, Naaba-Wẽnd taoore, ne yel-sõma niynsa fãa Soaala-Wẽnd sẽn maan yãmb ne y saam-dãmba yĩnga.

⁸ A Zakoob sẽn wa Ezipt tẽnga, Ezipt rãmb namsa y ba rãmba la b kelma Naaba-Wẽnde. B tʋma a Moyiiz ne a Aarõ tɩ b tɩ yiis-b Ezipt tẽnga, n tall-ba n wa zĩndig zĩ-kãnga.

⁹ La bãmb yĩma Wẽnnaam, b Soaala, tɩ b na n bas ba tɩ b lʋɩ, Asor zabrẽ, dĩm a Sisera nugẽ, la b lʋɩ Filisti rãmba la Moab dĩma sẽn kaoog zabre ne bãmb nusẽ.

¹⁰ B kelma Soaala-Wẽnd taoore n yetẽ: ‹Tõnd beegame, tõnd basa Soaala-Wẽnd n nok a Baal la Astarte rãmba. Marsã, fãag-y tõndo d bɛɛb nusẽ tɩ tõnd na waoog yãmba.›

¹¹ La b tʋma a Yerubaal, a Bedã, a Zɛfte la a Samwɛl n paam n fãag yãmb y bɛɛba sẽn da gũbg yãmba nusẽ, tɩ y zĩnd b sẽn kõ-y tẽng ninga pʋg ne laafi.

¹² La yãmb sẽn yãe t'a Naas, Amonitsa dĩma, yiisa tãpo, n wat n na n zab ne yãmba, yãmb yeela maam: ‹Ad-y tõnd me rata dĩma sẽn na n dɩ naam d zugu.› Naaba-Wẽnd n yaool n ya yãmb dĩma.

¹³ Ad-y dĩm ninga yãmb sẽn tũusi, y sẽn kose, ad-y dĩm ning Soaala-Wẽnd sẽn kõ yã.

¹⁴ Yãmb sã n zoet Soaalã, n sakd bãmba, la y reegd b koɛɛga,

¹⁵ yãmb sã n pa kɩɩsd b gomde, n kell n mobg bãmba, yãmb ne y dĩma yam na kẽ Wẽnnaam. La yãmb sã n pa sakd b koɛɛga, yãmb sã n kɩɩsd b gomde, b nug na n sɩbga yãmba, wala b sẽn sɩbg y saam-dãmbã.

¹⁶ Le yals-y ka n ges bõn-bãnd ninga Soaala sẽn na n maan tɩ y nif yãende.

¹⁷ Marsã ka saas wẽnd ye, yaa alkam kẽebg wakato. Mam na n pʋʋsa Naaba-Wẽnde, la b na tʋma sa-tãse la saaga. Bɩ y bãnge la y gese, tɩ y konga wʋsgo, Soaala-Wẽnd taoore, y sẽn kos tɩ b kõ yãmb dĩma.»

¹⁸ A Samwɛl pʋʋsame la badaar bala, Soaala-Wẽnd tʋma sa-tãse, la saaga. Naaba-Wẽnd ne a Samwɛl rabeem kãseng kẽe neba fãa.

¹⁹ La b fãa yeela a Samwɛl: «Pʋʋs Naaba-Wẽnd n kõ f yemsã, tɩ b ra ki ye, tɩ tõnd sẽn kos tɩ b kõ-d dĩma, d maana yel-wẽnde, n paas yel-wẽn a taaba.» A Samwɛl yeela neba fãa:

²⁰ «Da zoe-y rabeem ye! Yãmb sɩd maana yel-wẽnde; la da bʋdg-y moog n bas Naaba-Wẽnd ye, la sak-y-ba ne y sũur fãa.

²¹ Da bas-y bãmb tũudem ye, tɩ sã n pa rẽ, yãmb na n zoe n pʋga bõn-yood sẽn ka võore, sẽn kõn zĩnd yõod yãmb yĩnga, la sẽn kõn fãag yãmba, tɩ b yaa wẽn-faado.

²² Naaba-Wẽnd kõn daag b buud n bas tɩ rẽ wa ne b yʋ-sãang ye. Bãmb n tũus yãmb b sũurẽ, n maan b buudu.

²³ La Soaala-Wẽnd na gũ maam, tɩ m da beeg-ba n bas pʋʋsgo yãmb yĩng ye, mam na n zãmsa yãmb sor sẽn ya neere la tɩrga.

²⁴ Yãmb yee n zoe Soaala bala, sak-y bãmb daar fãa ne y sũur fãa; la ges-y b pãngã sẽn maand bũmb ninga fãa yãmb sʋka.

²⁵ La yãmb sã n maan wẽnga, yãmb na n kiime yãmba ne y dĩmã.»