1 Kibayã 21 - SEBR SÕNGO

Wẽnd buuda sõadga

¹ Bɛ-Kudga, Sʋtaana, yikame n na n sãam a Israyɛl yelle n kʋɩɩb a Daviid t'a sõd a soolma rãmba.

² A Daviid yeela a Zoab ne a tãnsoaben-dãmbã: «Kẽng-y n tɩ sõd a Israyɛl, sẽn sɩng Beerseba n tɩ ta Dã, n lebg n wa n togs-m tɩ m bãng m neba sõore.»

³ T'a Zoab yeele: «M dĩma, ba Naaba-Wẽnd yalg y buudã ne a sẽn ka paoodã naoor koabga, bãmb fãa ka m naaba yems laa? M naab tʋlla sõadga bõe yĩnga? Yaa wãna tɩ b na n kɩt t'a Israyɛl maan yel-wẽnde?»

⁴ La baasg zãnga, yɩɩ pakre ne a Zoab, t'a rɩk sore, n sa n sõd Israyɛl gilli, n yaool n lebg n wa Zerizalɛɛm.

⁵ A Zoab kɩsa dĩma sõadgã sebre, buuda neba sõore; a Israyɛl zãng fãa da yaa tus-kẽemde la tus koabga, neb sẽn da minim tãpo, la a Zɩɩda da yaa tus kobs-naase la pisopoe, sẽn minim tãpo.

⁶ A Zoab da pa sõd a Levi ne a Bẽnzame neba n naag ye, tɩ dĩma noor da yaa wẽng wʋsgo, a nifẽ.

⁷ Noorã pa ta Soaala-Wẽnd yam ye, tɩ b sɩbg a Israyɛl.

⁸ A Daviid yeela Naaba-Wẽnde: «Mam sẽn maan woto wã, mam beega al wʋsgo. La marsã bɩ y sak n kõ y yambã a yel-wẽnda sugri, tɩ sɩda mam maana yalemdo.»

⁹ Wẽnd goma ne bãngda a Gad a Daviid sagenda:

¹⁰ «Kẽng n tɩ yeel a Daviid: Wẽnd koɛɛg la woto: mam dɩgla f taoore sɩbgre buud a tã; bɩ f yãk a yembre tɩ m tõog n sɩbg-f wa f sẽn date.»

¹¹ A Gad kẽnga a Daviid nengẽ n yeel-a: «Naaba-Wẽnd koɛɛga la woto: Bɩ f yãke:

¹² Kom yʋʋm a tã, bɩ f bɛɛba sẽn na n digd-f tɩ f zoetẽ kiis a tã tõre, tɩ b sʋʋg yãgd n pʋgd-fo. Tõe n yɩɩ Wẽnd sʋʋga bɩ bã-longdem sẽn na n kẽ f soolmẽ, da-yɩten-daare, tɩ malɛk sɩbgd a Israyɛl gilli. La marsã bɩ f tagse, yaa koɛ bʋgo la f na n leok-m tɩ taas sẽn tʋm-b maama?»

¹³ A Daviid yeela a Gad: «Yɩɩr kãsenga n tar maam! La ade, mam sẽn lʋɩt Soaala-Wẽnd nugẽ n são, tɩ Naaba-Wẽnd nimbãan-zoeer labsa la m yee n da lʋɩ ninsaalb nusẽ ye.»

¹⁴ Wẽnd tʋma bãaga, bã-longdem, a Israyɛl sʋka, t'a Israyɛl neb tus pisopoe ki.

¹⁵ Soaala-Wẽnd tʋma malɛka Zerizalɛɛm t'a tɩ sãam tẽnga zãnga; la a sẽn sɩng tẽnga sãoongo, Soaala-Wẽnd gesame la b sũur sãamame la b waa n yeela malɛka sẽn da sãamd tẽngã: «Sekame marsã, yõk f nugu.» Malɛkã da yɛsa a Orna, Zebuzitga zɛɛg sɛɛgẽ.

¹⁶ A Daviid sẽn zẽk a nenga, a yãee Wẽnd malɛkã sẽn zẽk yĩngri bilfu, tɩ sʋʋg wõog n be a nugẽ, n teesd Zerizalɛɛm. A Daviid ne a nin-kẽemsã sẽn da yeelg sũ-pa-noang futã, wõgemdame n fõgneg b neng tẽnga.

¹⁷ A Daviid yeela Soaala-Wẽnd: «Ka maam n maan yel-wẽnda bɩ? Ka maam n maan n yet tɩ b sõd neba bɩ? La nim bãmba, bãmb maana bõe? Bãmb ka tũud bal laa? M Soaala-Wẽnde, bɩ y nug sɩbg maam la a sɩbg m ba roogo, la bã-longdem da kʋ neb a taab ye.»

¹⁸ Wẽnd malɛkã kosa a Gad t'a yeel a Daviid woto: «Kẽng n tɩ lugl maan-kugr a ye, Soaala-Wẽnd yĩnga, Zebuzitga a Orna zɛɛgẽ.»

¹⁹ A Daviid kẽngame wala a Gad sẽn yeel-a wã.

²⁰ A Orna wẽneg a poorẽ n yãe malɛkã. A kamb a naasa sẽn da be ne-a wã zoeeme n tɩ solge, wakat kãng t'a Orna da pãbda a alkam.

²¹ A Daviid taa a Orna nengẽ; a Orna gesame la a yãee a Daviid. Woto, a yi-la a zɛɛgẽ wã n wa wõgemd a Daviid taoore n fõgneg a neng tẽnga.

²² A Daviid yeela a Orna: «Kõ maam f zɛɛga tɩ m me maan-kugri Naaba-Wẽnd yĩnga; kõ-a maam tɩ m na bao wanzurf ligd ninga sẽn zems ne a yaoodo la woto tẽn-kũuma na zãag ne buudã!»

²³ A Orna yeela a Daviid: «Bɩ y reeg zɛɛgã, m dĩma, n maan y yam sẽn dat ne-a. Ade, mam kõta yãmb m niisã yũ-noog maoong yĩnga, bilim-bilma yaa maoonga raado la y na n yãk be; alkama zom la y na n dɩk n tũnug maoongã; mam kõt-y-la rẽ fãa.»

²⁴ La dĩma a Daviid leoka a Orna: «M na n daa zɛɛgã n yao sẽn zems yaood ninga tɩ mam pa rat n deeg f sẽn so, n kõ Soaala-Wẽnd ye, la m pa rat n kʋ maoong ne bũmb m sẽn pa yiis m ligd n da ye.»

²⁵ A Daviid yao a Orna zɛɛga sãnem wakɩ koeems kobs-yoobe.

²⁶ A Daviid mee maan-kugra zĩ-kãnga, Soaala-Wẽnd yĩnga, n kʋ sugr kosgo maand a zugu; a yõka Soaala-Wẽnd sɛɛga tɩ b reeg a pʋʋsem, n zĩnd saag zugu n tʋm bugum maan-kugrã la maoongã zugu.

²⁷ Naaba-Wẽnd kõo malɛkã noore t'a lebs a sʋʋgã a wʋʋgẽ.

²⁸ Wakat kãnga, a Daviid sẽn mik tɩ Soaala-Wẽnd deega a kosgo, Zebuzitga zɛɛgẽ, a kʋʋ maando.

²⁹ Wakat kãng tɩ sɛka roogo, a Moyiiz sẽn da maan zĩ-pɛɛlẽ, Naaba-Wẽnd yĩnga, n paas maan-kugrã b sẽn da tar n kʋʋd maandã, bãmb b yiib fãa dag n keta Gabaõ kunkubra zugu.

³⁰ La a Daviid da pa tõog n ta, al beene, n yõk Soaala-Wẽnd sɛɛg ye, tɩ Soaala-Wẽnd malɛka sʋʋg da yɛɛs-a-la al wʋsgo.