फिलिप्पियों 3 - सिरमौरी नौवाँ नियम

जिन्दगी का मकसद

¹ इथकारिए ओए रै मैरै बिशवाशी भाईटु, प्रभु दै सौदा खुश रौव। सैजी बातौ तुऔं कै बार बार लिखणौ मुंजी मुखै तौ कुणजाई कोष्ट ना हौंव, बल्कि ऐजी बातौ झूठै गुरुओं शै तुंआरी रक्षा कौरदी।

² तिनु लोगौ शै चौकश रौंव जू कुते कै जैशणै बर्ताव कौरौ, औरौ सैजै जू बुरै काम कौरौ। औरौ तिनु लोगौ शै बै चौकश रौंव, जू बौल़ौए तुऔं उध्दार कारिए खतना कौरवाणा जौरुरी औसौ।

³ जिथुकै पौरमेशवर कै साची लोग आमु औसौ, जू पौरमेशवर कै आराधना तैसकै आत्मा कै दवारा कौरु, औरौ आपणै जिन्दगी दै मसीह यीशु कै साथै एकता दै खुश हौंव; औरौ तिनु चीज़ौ पांदी भोरोशा ना कौरौ जू आमुए कौरे राए।

⁴ पौरौ हांव तिनु चीज़ौ पांदी बै भोरोशा राख सौकु जू मोऐं कौरे रैई जै कुणिए सुंचौए कै सै आपणै दवारा कौरेयौंदी चीज़ौ पांदी भोरोशा राखै सौकौ, तौ हांव तैसी दा बै बौड़ैयो राख सौकु।

⁵ जोबै हांव आठी दूसौ का थिया, तोबै मैरा बै खतना हौआ, जैशै पौरमेशवरे आज्ञा दैय राए थै। हांव जन्म शै इस्राएल देश का औसौ, औरौ बिन्‍यामीन कै गोत्रो का औसौ; मैरै माँ-बापू इब्रानी देश कै थिए, इथकारिए हांव बै ऐक इब्रानी औसौ; जिथै तौड़ी मूसा कै कानून कै मानणौ कै बात औसौ हांव ऐक फरीसी थिया जू कै कानून कै सख्ती शै पालन कौरु थिया।

⁶ जोश कै बारै मुंजी जै बुलू तौ हांव कलीसिया कै सोताणो वाल़ा थिया; औरौ यहूदी कानून का पालन कौरणौ मुंजी हांव ऐक धरमी आदमी थिया जिथुकै मोऐं तिनु सौबी बातौ का पालन कौरा।

⁷ पौरौ जू-जू बातौ हांव आगै सुंचौ थिया कै मैरै फायदै कै थी, तिनुखै मोऐं मसीह कै जाणणौ की बौजैह शै बैकार सौमझी।

⁸ जिथुकै हांव मसीह यीशु प्रभु कै जाणणा चोऊं जू बाकी सौबी चीज़ौ शै कीमती औसौ औरौ हांव सौबी चीज़ौ कै बैकार सौमझु। जिथकै बौजैह शै मोऐं सौबी चीज़ौ कै छोड़े दी औरौ तिनु साट कोबाड़ सौमझु ताकि हांव मसीह कै जादा जाणै पोऊँ।

⁹ औरौ हांव तैसकै साथै एकता दा रौए सौकु; ऐबै मैरी धार्मिकता ऐजै ना आथी जू मूसा कै कानून का पालन कौरणौ शै भैटौ, पौरौ ऐबै मैरै धार्मिकता सैजी औसौ जू सिरफ मसीह पांदी बिशवाश कौरणौ कै बौजैह शै पौरमेशवर शै मुखै भैटौए।

¹⁰ औरौ मसीह कै हौजौ जादा जाणणा मैरा मकसद औसौ। ताकि तैसकै मौरेयौंदे मुंजीदै जियुंदी हौणौ कै अनौखी शौकतै कै महसूस कौरे सौकु, औरौ तैसकै दुख दा शामिल हौयौ तैसकै मौत दा तैसकै जैशणा बौणै जोऊं मौत दै तैसकै जैशणै बौणैयौं तैसकै दुखो बुगणो का सहयोगी बौणै जोऊं।

¹¹ ताकि हांव बै औटेयौ मौरेयौंदे मुंजीदा जियुंदी हौए सौकु।

मकसद कै ढौबौ बौढ़दौ जाणौ

¹² हांव ऐजा दावा ना कौरु कै मोऐं इनु सौबी चीज़ौ कै आगै दी ही पाए रैई, या मोऐं तैसी सिध्दता कै पाणौ कारिए बैजाए कौचिश कौरे लौए। पौरौ हांव तियौं चीज़ कै पाणौ कारिए आगै बौढ़दा जांदा लागै रौआ ताकि हांव सिध्द हौए जोऊं जिथकारिए मसीह यीशुए मुखै चोणे राए थिया।

¹³ ओए रै बिशवाशी भाईयों हांव ऐजा दावा ना कौरु कै मोऐं सैजा मकसद पाए राए; पौरौ ऐजा ऐक काम कौरु कै जू आगै हौए गौ सैजौ मोऐं बैसरेयौ भविष्‍य कै मकसद कारिए कड़ी मैहनत कौरणी जारी राखै।

¹⁴ हांव बौड़ी खुशी शै आपणै मकसद कै ढौबौ दौडु़, ताकि हांव स्वर्ग दा सैजा इनाम पाए सौकु जिथकारिए पौरमेशवरे आमु यीशु मसीह दै बौएदै राए।

¹⁵ आमै सौबै जू मोजबूती शै मसीह दै भोरोशा कौरु, ऐकैई तरह शै सुंचणौ वाल़ै हौंव, औरौ जै कोसी बातौ दा तोंवारा ओका ही विचार हौंव तौ पौरमेशवर तैसी बै तुऔं पांदी प्रगट कौरे दैन्‍दा।

¹⁶ इथकारिए आमु सच कै साथै जीणु चैंई जू आगै दौ ही पौरमेशवरे आमु पांदी प्रगट कौरे राए।

स्वर्गो दै अमारै नागरिकता

¹⁷ ओए रै भाईटु तुऐं सौबै मैरै बर्ताव कै नकल कौरौ, औरौ तिनु लोगौ पांदी ध्यान दैंव जू मैरै बर्ताव कै नकल कौरौ, औरौ तिनकै नकल कौरौ। जिथका उदारण तुऐं आमु बर्ताव कौरदै बैई दैखौ जोबै आमु तोंवारै साथै थिए।

¹⁸ जिथुकै ऐशणै बौहितै लोग औसौ जिनकै बारै मुंजी मोऐं तुऔं कै बार बार बौल़ै राए औरौ ऐबै बै रुए-रूएयो बुलू कै जू ऐशैकै बर्ताव कौरौ औरौ दिखांव कै जैसी बौजैह शै मसीह क्रूस पांदी मौरा, सै तैसकै खिलाफ औसौ।

¹⁹ तिनका अन्त नाश औसौ औरौ तिनकी शारीरिक इछाएं तिनका ईशवर औसौ, सैजै शर्मनाक काम कौरणौ कै बारै दा घमण्‍ड कौरौ औरौ सौदा धोरती कै चीज़ौ कै बारै मुंजी सुंचदै रौंव।

²⁰ पौरौ अमारा आपणा देश स्‍वर्ग औसौ, औरौ आमुए ऐक उध्दार कौरणौवाल़ै प्रभु यीशु मसीह का स्वर्ग शै पाछु आणौ का इंतजार कौरे लौआ।

²¹ सै आपणै शौकतै कै तैसी प्रभाव कै हिसाब शै जिथकै दवारा सै सौबै चीज़ौ कै आपणै काबू दी कौरे सौकौ, औरौ अमारै कमजोर शोरीर का रुप बौदलैयौ आपणै महिमामय शोरीर कै जैशणा बाणै दैन्‍दा।