फिलिप्पियों 2 - सिरमौरी नौवाँ नियममसीही शराफत 1 जै मसीह कै साथै कौठै हौणौ शै तुऔं खोशे भैटौ, जै तुऔं मसीह कै प्यार शै सुकून भैटौ, औरौ जै तुऔं कैई आत्मा कै साथै संगति औसौ, औरौ जै मसीह तोंवारै साथै करूणा औरौ दया कौरणौवाल़ा औसौ, 2 इथकारिए मैरै ऐजै खुशी पोरे कौरौ कै ऐक मन रौव, औरौ ऐकैई प्यार, ऐकैई मत राखौ, औरौ ऐकैई मकसद राखौ। 3 स्वार्थ औरौ घमण्ड कारिए किछै ना कौरौ, पौरौ दीनता शै ऐकी दूजै कै आपी शै जादा आछोड़ै सौमझौ। 4 हरेक आपणै भोलाए कै नी, पौरौ ओकी कै भोलाए कै बै फिकर कौरौ। मसीह कै दीनता औरौ महानता 5 जैशै मसीह यीशु का स्वभाव थिया, तैशैखैई तोंवारा बै स्वभाव हौंव; 6 जैणै पौरमेशवर खै रुपो दै हौयौ बै पौरमेशवर कै बराबर हौणौ खै आपणै काबू दै राखणौ खै चीज़ ना सौमझी। 7 पौरौ आपणा सारा ईशवरीय औधिकार छोड़े दिया, औरौ गुलाम का रुप धारण कौरा, औरौ ऐक आदमी बौणै गौआ। 8 औरौ आदमी कै रुपो दा प्रगट हौयौ आपी खै दीन कौरे दिया, औरौ पौरमेशवर कै आज्ञा कै पालन कौरेयौ मौरणौ कै तैयार थिया ऐक अपराधी कै जैशणी क्रूस कै मौत बै सैय पाए। 9 इथकारिए पौरमेशवरे तैसीखै सौबीदै ऊंची गादी पांदी बौठाल़ा, औरौ तैसीखै ऐजा नांव दिया जू सौबी नांव मुंजीदा बौड़ा औसौ। 10 कै जू स्वर्ग दा औरौ धोरती पांदी औरौ धोरती तौड़ी औसौ; सै सौबै लोग यीशु कै नांव कै आदर दैणौ कारिए घुंडू नियुड़ाव, 11 औरौ पौरमेशवर पिता कै महिमा कारिए सौबै लोग अंगीकार कौरे पाव कै यीशु मसीह ही प्रभु औसौ। दुनिया दै बिजली कै जैशणै चौमकौ 12 इथकारिए ओए रै मैरै प्यारो, जोबै हांव तोंवारै साथै थिया तोबै तुऐं हमैशा पौरमेशवर कै आज्ञा का पालन कौरा। ऐबै जोबै हांव दूर हौए गौआ, तौ तुऔं हौजौ बै बात मानणै चैंई। डौरेयौ औरौ कामणैयौ आपी मुंजी हर ऐकी कै तिनु चीज़ौ कै कौरणी चैंई जू तिनु लोगौ कारिए सोही औसौ जिनुखै पौरमेशवरे बौचाए राए। 13 जिथुकै पौरमेशवर ही औसौ, जू तुऔं मुंजी काम कौरौ औरौ सैजाई तुऔं काम कौरणौ कै इछा औरौ शौकतै दैंव जू तैसीखै खुश कौरौ। 14 सौबै काम बिना कुड़कुड़ाए औरौ बिना बैहस कै कौरेया कौरौ। 15 ताकि तुऐं ढीठ औरौ भ्रष्ट लोगौ शै भोरेयौंदे दुनिया दै पौरमेशवर कै सिध्द संतानो कै जैशणै निर्दोष औरौ बिना कपट का जीवन जियौं। तुऔं इयौं दुनिया कै लोगौ कै बीच गौयण कै तारै कै जैशणै चौमकौणौ चैंई जोबै तुऐं तिनु सैजा वचन बौतांव जू सौदा कै जिन्दगी दैंव। 16 औरौ मुखै मसीह कै औटेयौ पाछु आणौ कै दूस दै हांव इयौं बात पांदी घमण्ड कौरे सौकु कै मैरै मैहनत औरौ मैरै कौचिश बैकार ना हौंव। 17 प्रभु दा तोंवारा बिशवाश औरौ तोंवारै सेवा पौरमेशवर खै चौढ़ायौंदे बलिदान कै जैशणी औसौ। जै सै मुखै मारै बै दैंव, तौ बै हांव खुश औसौ, औरौ तुऔं सौबी खै साथै खुशी मौनौऊं। 18 ऐशैखैई तुऐं बै खुश हौंव औरौ मैरै साथै खुशी मौनांव। तीमुथियुस कै तारीफ 19 मुखै प्रभु यीशु दै आशा औसौ, कै हांव तीमुथियुस खै तोंवारै धोरे झट भैजदा, ताकि जोबै सै पाछु आला, तोबै तुऔं लोगौ कै बारै मुंजी समाचार शोणेयो मुखै हिम्मत भैटौ। 20 जिथुकै मैरै धोरे ऐशणै स्वभाव का कुणिए नै आथी जू साची मन शै तोंवारै फिकर कौरौ। 21 सौबै आपणै ही मतलब खै खोज़ दै रौंव, सै यीशु मसीह शै जोड़ेयौंदे बातौ कै बारै मुंजी फिकर ना कौरौ। 22 पौरौ तुऐं जाणौए कै तीमुथियुस का चाल चलन आछा औसौ। जैशै बैटा बापू कै साथै कौरौ, तैशैखैई तैणै सुसमाचार कै फौयलाणौ दै मैरै साथै मैहनत कौरे राए। 23 इथकारिए मुखै आशा औसौ कै जैशै ही मुखै पौता चालै जाला कै मैरी का हालत हौन्दै, तैशैखैई हांव तैसी तोंवारै धोरे झट भैजै दैन्दा। 24 औरौ मुखै प्रभु पांदी भोरोशा औसौ कै हांव तावल़ा आन्दा। इपफ्रुदीतुस कै तारीफ 25 मोऐं इपफ्रुदीतुस कै तोंवारै धोरे भैजणा जौरुरी सौमझा। सै मैरा भाई औरौ सहयोगी औसौ, सै सुसमाचार कै रक्षा कौरणौ कारिए मैरै साथै ऐक योध्दा कै जैशणा औसौ। जैसी तुऐं मैरी जौरुरतौ का ख्याल राखणौ कारिए मैरै धोरे छाड़ै राए थिया। 26 तुऔं सौबीआरी भैटिणौ कारिए तैसका बौड़ा मन कौरे रौआ, औरौ सै बैजाए उदास रौंव थिया, जिथुकै तुऐं तैसकै बीमारी का हाल शौणै राए थिया। 27 पाका सै बीमार तौ थिया इथै तौड़ी कै सै मौरणौ पांदी थिया, पौरौ पौरमेशवरे तैसी पांदी दया कौरेयौ तैसी ठीक कौरा। पौरमेशवरे सिरफ तैसी पांदी ही नै पौरौ मुं पांदी बै दया कौरे ताकि हांव तिथैशै जादा दुख सैहन ना कौरु जैतरा मोऐं आगै दुख सौयन कौरे राए थिया। 28 इथकारिए मोऐं तैसी भैजणौ कै हौजौ बै जादा कौचिश कौरे कै तुऐं तैसीआरी औटेयौ भैटियो खुश हौए जांव औरौ मैरी बै फिकर कम हौए जांव। 29 इथकारिए तुऐं प्रभु मुंजी तैसीआरी बौहितै खुशी कै साथै भैटियो, तुऔं तैसका औरौ तैसकै जैशणै लोगौ का आदर कौरदै रौणौ चैंई। 30 तैणै मसीह कै काम कारिए आपणै प्राणो खै खतरै दै पाए राए थिए औरौ मौरणौ ही वाल़ा थिया, ताकि सै मैरै मौदद कौरे सौकौ जू तुऐं ना कौरे सौकौ जिथुकै तुऐं बैजाए दूर औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation