फिलिप्पियों 2 - Sirmouri

मसीया के नरमाँऐं अरह् बड़पंन

¹ तअ: जे तुँओं मसीया के नाँव दा किऐ होंसला असो, अरह् प्यारो शी पय्दा हऐ अंदी किऐ ढैह्ट, अरह् पबित्र-आत्त्मा दी किऐ हिस्सेदारी अरह् प्यारो के किऐ भावना के हिछ़या,

² तअ ऐक मंन हऐयों मेरा आँनन्द-खुशी पुरी करह्, अरह् ऐक ही प्यार, ऐक चींत्त, अरह् ऐक ही हिछ़या थुऐ।

³ बिरूध, झूठी बड़ियाऐं, तारीफ, खे किऐ ने करे, परह् नंरमाँऐं, शे ओका ओकी खे आपु शा आछा जाँणे।

⁴ ऐक नाँम आप्णे ही मतल्व खे ने; परह् ओकी के मतल्व खे चिंत्ता-फिकर करे।

⁵ जेष्णाँ मसीया यीशू का सभाव थिया, तेष्णा ही तुवाँरा भे सभाव हुआ चेंई;

⁶ जिन्ऐ पंण्मिश्वर के स्वरूप दे हंऐयों भें, पंण्मिश्वर शी आप्णीं बरा-बरी गाशी आप्णाँ हंकधिकार थंणाँ ठीक ने जाँणीं;

⁷ परह् तिन्ऐं आपु आप्खें किऐ ने जाँणीं, अरह् ऐक दास का जिया रूप धारण करियों सादा आदमी जिया बंणियों, अरह् आदमी की देंह्-शरीर दे पर्गट हंऐयों,

⁸ आपु आप्खे दीन-गंरीब करियों मँऊत्त, होर, शुँल़ी-फ़ाँशी की मँऊत्ती तोड़ी आज्ञाँ कारी रंऐयों, आपु खे किऐ नें जाँणीं,

⁹ ईन्देंखे के पंण्मिश्वर ऐ तिनू ऊगले शे ऊगले जागे दे बईठाल़ियों बड़ा बंणाँया; अरह् तिनखे सेजा नाँम दिता, जू सोभी बड़े नाँव शा भे जादा बड़ा असो।

¹⁰ के जू स्वर्गो दे अरह् धर्ती दे अरह् पताल़ो दे असो, से बादे प्रभू यीशू के नाँव शे घुडकुँणिऐं नमंष्कार करह्;

¹¹ अरह् परमं-पिता पंण्मिश्वर के बड़ियाऐं खे हर ऐक जीभ ऐजो माँनी पाँव के यीशू मसीया ही प्रभू असो।

संईसारी दा त्तेज-प्रकाष जिया चमका

¹² ईन्देंखे हे मेरे प्यारे, तुँऐं सदा मेरी बात मान्दे रंह्, ऐबे हाँव तुँओं शा दुरका असो, ईन्देंखे जबे हाँव तुँओं आरी थिया, तिन्दे शे कंम ने; परह् तिन्दे शे भे जादा होंस्ले शे तुँऐं डर्दे, अरह् आप्णे पाप के छुट्कारे के काँँम-काज़ दे लागे अंदें रूऐ;

¹³ पंण्मिश्वर आप्णी आच्छ़ी हिछ़या पुरे कर्णो खे, तुँओं दी तेस्की हिछ़ा पय्दा करह्; अरह् तिन्दे के मुँताबिक शा काँम-काज़ कर्णो के तागत भे दियों।

¹⁴ बादे काँम-काज़ बिना तूड़-खुड़ाई अरह् बिना बाद-बिबाद शा करिया करह्,

¹⁵ जू तुँऐं सिदे-सादे नीष-कपट, अरह् बै-कसूर बणियों रंह्, तअ ईयों हठाव्णी, हर-कुछ कर्णो वाल़े गड़ी-पीड़ी दे, पंण्मिश्वर की साच्ची अलाद बंणियों अस्माँनों के तारे जैष्णें चँमक्दे रंह्।

¹⁶ अरह् जीवन देणों वाल़ी खुषख्बरी शुणाँदें रंह्, तेशे दाँई मसीया के आँणों वाल़े देसे ईयों बातो गाशी हाँव तारीफ करूबा के मेरी भाग-दोऊँड़ अरह् मेरी मेंह्नत बै-कार ने गंई।

¹⁷ तुँवारा बिश्वाष ऐक बल़ी के रूप दा असो, अरह् जे मेरो लह्ऊँ तुँवारी बल़ी गाशी पेरी देईलो तअ हाँव भे तुँवारी खुशी आरी खुशी असो।

¹⁸ तेष्णें ही तुँऐं भे खुशी हों, अरह् मेरी गईलो आँनन्द-खुशी मनाँव।

तीमुथियुस अरह् इपफ्रुदीतुस

¹⁹ मुँह प्रभू यीशू दा भूर्षा असो, के हाँव तिमुथियुस तुँओं कैई हेभी भेजुबा, जू तुँवारा हाल-चाल शुँणियों मुँह शाँण्त्ति भेंटो।

²⁰ किन्देंखे के मुँह कैई ऐष्णें आछे सभाव का कुँऐं ने आथी, जू शुद्ध मंन शी तुँवारी चिंन्त्ता-फिकर करह्।

²¹ किन्देंखे के बादे आप्णे-आप्णे मतल्व की खोज दे रंह्, ना के यीशू मसीया की खोज दे।

²² परह् तेसी तअ तुँऐं परख-अजमाँणों अरह् जाँणी थुवा, के जेष्णो बैटा बाबा की गऐलो करह् तैष्णों ही तेने खुषख्बरी फईलाँणों खे मेरी गईलो मेंह्नत करी थंऐ।

²³ ईन्देंखे मुँह भूर्षा असो, के जेऐ ही मुँह कैई पता लागला के मेरे का हाल हंदे, तेई हाँव तेसी तुँओं कैई तेख्णी डेयाल़ी देऊँबा।

²⁴ अरह् मुँह प्रभू गाशी भूर्षा असो, के हाँव आपु भे शट आँऊबा।

²⁵ परह् मुँऐ इपफ्रुदीतुस जू मेरा भाऐ, अरह् साथी-संगी जोंह्दा अरह् तुवाँरा दूत्त, अरह् जरूरत की बातो दा मेरी सेवा कर्णो वाल़ा असो, मुँऐं तेसी तुँओं कैई डेयाल़णा जरूरी सम्झा।

²⁶ किन्देंखे के तेस्का जीऊँ तुँओं सोभी दा लगा अंदा थिया, तबे ही से ऊदास रंह् थिया, किन्देंखे के तुँऐं तेस्की बीमारी का हाल-चाल शुँणाँ थिया।

²⁷ जरूर से बीमार हऐं रूआ थिया, ऐथै तोड़ी के से मर्णो वाल़ा थिया, परह् पंण्मिश्वर ऐ तेसी गाशी दया-रंय्म करी, अरह् सिर्फ तेसी ही गाशी ने परह् मुँह गाशी भे करी, के मुँखे दु:ख्ह गाशी दु:ख्ह ने भेंटो।

²⁸ ईन्देंखे के मुँऐ तेसी डेयाल़्णों के बैगेही कोशिष करी, के तुँऐं तेसी आरी भेंटियों खुशी हऐ ज़ाँव, अरह् मेरा फ़िकर भे कंम हला।

²⁹ ईन्देंखे तुँऐं तेसी आरी बैजाऐ खुशी शे भेंट करे, अरह् प्रभू दे बैजाऐ आँनन्द दा तेस्का सू-स्वागत् करे।

³⁰ किन्देंखे के से मसीया की काँम-काज़ खे आप्णे पराँण भे जोख्मि दे पाँऐयों मऊँत्ती के नंजीक आऐ गुआ थिया जू कंम्मीं तुवाँरे ढबे शी मेरी सेवा दे रऐ रंऐ थी, से तियों कंम्मीं पुरी करह्।