फिलिप्पी INTRO1 - घले नयाँ करारकिताबजे बारेने फिलिप्पीब माकेडोनिया (या दक्षिण यूरोपजे ग्रीस यब देशजे उत्तर भा)- जे मुख्य सहर त्या ख्य। रोमजे कुम मीयू मेस्ये सिपाईयू होने टूङब क्यूत्देबे फिलिप्पीने रोमी उपनिवेश बन्दीये ख्य (मूल स्यूस्स्यायूजे काम १६:१२)। पावलदे सूगब खबर प्रचार चीक्कीब ङूजे दोस्रो यात्राने फिलिप्पीने फ्योये ख्य। हन्छ्वाब यूरोप माहदेशने ख्रीष्टजे सूगब खबर प्रचार चेब अम्ब पात्ता खूम् ख्य। येरेबे ख्रीष्टियान धर्म एशियादे यूरोपसेमे फ्योइदे। येरेक्यूत्देबे अम्ब यूरोपजे धर्म दी, तर पावलदे मून्दे दर्शन त्या प्रेत्देबे पात्ता खूम फिलिप्पीने गीलीदे, हम्ब दर्शनने माकेडोनीयाजे मीत्यादे “माकेडोनियाने ख, मेस्ये ङीने तोङ्म्मी” यदेबे य ख्य (मूल स्यूस्स्यायूजे काम १६:९-१०)। फिलिप्पीने ख्यब पावलजे पात्ता खूम त्वब बयान मूल स्यूस्स्याजे कामजे किताब १६: ११-४०-ने लिख्दीये ख्यङ्। होरदेङ्येदे प्रचार चेब रङ्से तेस्रो यात्राने पावल फेरि फिलिप्पीने गीलीदे (मूल स्यूस्स्यायूजे काम २०:१,६)। पावल झ्यालखानने ख्यब बीलने अम्ब फिलिप्पी मण्डलीने चङ्बेब चिट्ठी ङू रङ्सेदेने लिख्दे ख्य। कूम बाइबलजे विद्धानयूजे विचारने, एफिसीयू, कलस्सीयू मेस्ये फिलेमोनने लिख्देब चिट्ठीयूप्रे अम्ब फिलिप्पीयूजे चिट्ठीये ई.सं. ६२-६३-ने रोम सहरदे लिख्दीदेबे चङ्बे ख्य। अम्ब चिट्ठीयूने कैदी-चिट्ठी यबये चलन ख्य। पावलदे केरे जीया चदे यब बारेने थेप पो थाप्रेजे लागि पावलदे रोमीयूने चङ्बेब चिट्ठीजे परिचयने ले खूय। |
Ghale New Testament © Nepal Bible Society, 2011.
Nepal Bible Society