Salāmo 9 - O LE TUSI PAIA

O LE SALAMO IX. O le viiga ia Ieova ona o lona faasala i e na ita i ona tagata. Ma le usu pese i mutu-lapeni. O le salāmo a Tavita.

¹ Ou te vivii atu ia te oe Ieova ma lo‘u loto atoa; ou te ta‘uta‘u atu foi ou vavega uma.

² Ou te fiafia ma ou olioli ia te oe; ou te pese lava i lou suafa, lē Silisili ese.

³ Na liutuaina o e ua ita mai ia te au; ona tausuai ai lea o i latou, ma fano lava ai ou luma.

⁴ Auā ua e faia lo‘u faamasinoga ma la‘u finauga; ua e tietie i le nofoālii e faamasino tonu ai.

⁵ Ua e aoai atu i nuu ese; ua faaumatia e oe o e amio leaga, ua e sōloiesea o latou igoa e oo i le faavavau faavavau lava.

⁶ O e ita mai, ua faaumatia e faavavau o latou faatafunaga; ua e olopalaina aai; ua gālo lava le faamanatuina o i latou.

⁷ A o Ieova, e tietie lava ia e faavavau; ua saunia e ia lona nofoālii e faamasino ai.

⁸ O ia lava na te faamasinoina le atulaulau ma le tonu; na te faatonuina ma le sa‘o finauga a nuu.

⁹ O Ieova e fai ma ‘olo maualuga mo le ua faasauaina, o le ‘olo maualuga i ona po e i ai le puapuaga.

¹⁰ E faatuatua ia te oe o e ua iloa lou suafa; auā, Ieova e, e te le tuuna i latou o e saili ia te oe.

¹¹ Ina pepese atu ia outou ia Ieova, o loo afio i Siona; ina faaali atu ia i nuu ana mea na fai.

¹² Auā o lē taui i le toto na te manatua i latou; na te le faagalogaloina le tagi o e ua puapuagatia.

¹³ Ieova e, ia e alofa mai ia te au, ia e silasila mai i lo‘u puapuaga na tupu mai i e ua ‘ino‘ino mai ia te au, o oe na o le ua aveina ae a‘u ai faitotoa o le oti;

¹⁴ ina ia ou ta‘uta‘u atu ou viiga uma i faitotoa o le tama fafine a Siona; ou te fiafia i lau faaolataga.

¹⁵ Ua gogoto nuu ese i le lua na latou faia; o lea lava upega na natia e i latou ua lāvea ai o latou vae.

¹⁶ E iloa Ieova i le faamasinoga ua na faia; ua maileia le fai amio leaga i le galuega a ona lava lima. Ikaiona. Selā.

¹⁷ E tulia i seoli o e fai amio leaga, o nuu uma lava o e faagalogalo i le Atua.

¹⁸ Auā e le faagalogaloina e faavavau o e matitiva; o le faamoemoega foi o e ua puapuagatia e le fano lea a le tu a le tu lava.

¹⁹ Ieova e, ina tulai mai ia, aua ne‘i manumalo tagata; ia faamasinoina nuu ese i ou luma.

²⁰ Ieova e, ia e faamatatau ia te i latou; ia iloa e nuu ese o tagata lava i latou. Selā.