Salāmo 4 - O LE TUSI PAIA

O LE SALAMO IV. O le tatalo a Tavita ia Ieova na te faafofoga mai ia te ia. Ma le usu pese i nekina. O le salāmo a Tavita.

¹ Le Atua e, lē ou te amiotonu ai, ia e tali mai i la‘u valaau atu; ua e laveaiina a‘u nai le puapuaga; ia e alofa mai ia te au, ma faafofoga mai i la‘u tatalo.

² O outou le fanau a tagata, tou te faia ma luma lo‘u mamalu seia afea? Tou te loto ea i le mea faatauvaa? Tou te saili ea i le pepelo? Selā.

³ Ia outou iloa ua faailogaina e Ieova le tagata amio Atua mo ia; e faafofoga mai Ieova i la‘u valaau atu ia te ia.

⁴ Ia outou tetemu, aua ne‘i agasala; ia outou manatunatu ifo i o outou loto i luga i o outou moega, ma ia outou fifilemu. Selā.

⁵ Ina fai taulaga ia i taulaga tatau, ma ia outou faalagolago ia Ieova.

⁶ E toatele ua fai mai, O ai ea se faailoa mai se mea lelei ia te i matou? Ieova e, ia e faasaga mai ia te i matou le malamalama o ou fofoga.

⁷ E tele le fiafia ua e tuu i lo‘u loto, ae itiiti lo latou i ona po ua faateleina ai a latou saito ma a latou uaina.

⁸ Ou te taoto, ma ou moe filemu; auā o oe Ieova e, na o oe lava, ua ou nofo ai ma le filemu.