Salāmo 3 - O LE TUSI PAIA

O LE SALAMO III. E le afaina e ua leoleoina e Ieova. O le salāmo a Tavita ina o sola ia i luma o lona atalii o Apisaloma.

¹ Ieova e, ua matuā faatoateleina e ua saua mai ia te au! E toatele e ua laga mai ia te au.

² E toatele o e fai ane ia te au, E le faaolaina lava o ia e le Atua. Selā.

³ A o oe, Ieova e, ua fai oe mo‘u talita; o lo‘u mamalu foi, ma lē faaeaina lo‘u ulu.

⁴ Na ou valaau ia Ieova i lo‘u leo; ua faafofoga mai foi o ia ia te au mai lona mauga paia. Selā.

⁵ Na ou taoto lava a‘u, ma ou moe; na ou ala, auā ua lagolagoina mai Ieova ia te au.

⁶ Ou te le fefe i manomano o tagata, o e siosio mai ia te au.

⁷ Ieova e, ia e tulai mai; lo‘u Atua e, ia e faaola mai ia te au; auā ua e taia auvae o i latou uma o e ita mai ia te au; ua e tu‘imomomoina nifo o e amio leaga.

⁸ O loo ia Ieova le faaolataga; o loo i luga o ou tagata lou manuia. Selā.