Salāmo 27 - O LE TUSI PAIA

O LE SALAMO XXVII O le faatuatua o Tavita i le Atua i le aso vale. O le salāmo a Tavita.

¹ O Ieova, o lo‘u malamalama ia, ma lo‘u olataga: o ai ea se ou te fefe ai? O Ieova, o le malosi ia o lo‘u ola; ou te mata‘u ea ia te ai?

² Na sii taua mai ia te au tagata amio leaga, ina ia ‘ai lo‘u tino o e saua mai ma e ita mai ia te au; ona tausuai lea o i latou, ma latou pauu.

³ E ui lava ina to lauapi se itu taua e tau ma a‘u, e le fefe ai lo‘u loto; e ui ina siitia se taua ia te au, ou te loto tele lava i lea mea.

⁴ E tasi le mea ua ou ole atu ai ia Ieova, o le mea lava lea ou te saili atu ai; ia ou nofo i le fale o Ieova i aso uma o lo‘u ola, ina ia ou iloa atu ai le matagofie o Ieova, ma ou saili i lona malumalu.

⁵ Auā na te faalilo ia te au i lona fale apitaga i le aso vale; na te natia a‘u i le mea lilo i lona fale fetafai; na te faaeetia a‘u i le papa.

⁶ O lenei, e faaeaina lo‘u ulu i luga o e ua ita mai ia te au, o e siosio ia te au; ou te osia ai taulaga i lona fale fetafai ma le alaga fiafia; ou te pese ma ou fai pesega ia Ieova.

⁷ Ieova e, ia e faafofoga mai i lo‘u leo, ou te valaau; ia e alofa mai, ma ia e tali mai ia te au.

⁸ Na fai atu lo‘u loto ia te oe i lau na e fetalai mai, Ia outou sailiili mai ia te au; Ieova e, ou te sailiili atu i lau afio.

⁹ Aua e te liliu ese ou fofoga ia te au; aua e te tuli i lau auauna i lou toatamai; na fai oe mo‘u fesoasoani; aua le tuulafoaiina a‘u, aua foi e te tuua a‘u, le Atua e, lo‘u faaolataga.

¹⁰ E ui lava ina tuua a‘u e lo‘u tamā ma lo‘u tinā, a e talia a‘u e Ieova.

¹¹ Ieova e, ia e a‘oa‘o mai ia te au i lou ala, ma ta‘ita‘i ia te au i le ala laulelei, ona o e ita mai ia te au.

¹² Aua e te tuuina a‘u i le manao o e saua mai ia te au; auā ua laga mai ia te au o e molimau pepelo, ma latou tautalatala i le faasaua.

¹³ Ana ou le faatuatua ou te iloa le agalelei o Ieova i le nuu o tagata ola, po ua ou faavaivai lava.

¹⁴ Ina faatalitali atu ia ia Ieova, ina loto tele ia, e faamalosia foi e ia lou loto; ina faatalitali lava ia ia Ieova.