Salāmo 2 - O LE TUSI PAIA

O LE SALAMO II. O le valoaga i le malo o le Mesia.

¹ Se a le mea ua faanunununu ai nuu ese, ma mafaufau ai nuu i le mea e le aoga?

² Ua tutū mai tupu o le lalolagi, ua pulega faatasi foi alii, e tetee atu ia Ieova ma le na ia faauuina,

³ Se‘i tatou motusi ese o laua noataga, ma lafoaieseina a laua maea ia te i tatou.

⁴ E soisoi le o afio i le lagi; e tauemu le Alii ia te i latou.

⁵ Ona fetalai atu ai lea o ia ia te i latou i lona toasa, na te faatuatuvaleina foi i latou i lona toasa tele.

⁶ A o a‘u, ua ou faauuina la‘u Tupu i luga o Siona lo‘u mauga paia.

⁷ Ou te ta‘uina atu le tulafono; ua fetalai mai Ieova ia te au, O lo‘u Atalii oe, o le aso nei ua o‘u fanauina ai oe.

⁸ Ia e fai mai ia te au, ona ou foaiina atu ai lea ia te oe o nuu ese e fai mou tofi, ma tuluiga o le lalolagi e fai mou.

⁹ E te fasi gaugauina i latou i le tootoo uamea; e pei o le ipu a le fai ipu omea e te nutililii ia te i latou.

¹⁰ O lenei, outou tupu e, ia outou atamamai; ia a‘oa‘oina foi outou faamasino o le lalolagi.

¹¹ Ia auauna ia Ieova ma le mata‘u, ia fiafia foi ma le gatete.

¹² Ina sogi ia i le Atalii, ne‘i toasa mai o ia, ma outou fano ai i le ala; auā e faafuasei ona tupu o lona toasa. Amuia i latou uma o e faatuatua ia te ia.