Salāmo 145 - O LE TUSI PAIA

O LE SALAMO CXLV. O le viiga ia Ieova. O le vii a Tavita.

¹ Lo‘u Atua e, le Tupu, ou te faaneenee ia te oe; ou te faamanū atu foi i lou suafa e faavavau faavavau lava.

² Ou te faamanu atu ia te oe i aso uma lava; ou te vivii atu foi i lou suafa e faavavau faavavau lava.

³ E silisili lava Ieova, e tusa ona matuā viia o ia; e le mafai ona suesueina lona silisili ese.

⁴ E vivii atu le tasi tupulaga ma le tasi tupulaga i au galuega; latou te faailoa atu au mea mamana.

⁵ Ou te tautala atu i le matagofie o le viiga o lou mamalu, atoa ma au mea mamana;

⁶ e tautalatala i latou i le malosi o au mea e matautia ai oe; ou te ta‘uta‘u atu foi i lou silisili ese.

⁷ Latou te ta‘u atu lava le faamanatuga i lou agalelei tele lava; latou te alalaga fiafia foi i lau amiotonu.

⁸ E alofa fua mai ma alofa mutimuti vale mai Ieova; e telegese lona toasa, e tele foi lona alofa.

⁹ O loo agalelei mai Ieova i mea uma, o lona alofa mutimuti vale foi ua i ana mea uma na fai.

¹⁰ Ieova e, e vivii atu ia te oe mea uma na e faia; e faafetai atu foi ia te oe ou tagata amio Atua.

¹¹ E tautalatala atu i latou i le mamalu o lou malo, ma ta‘uta‘u atu i lou mana;

¹² ina ia faailoa atu i le fanau a tagata ana mea mamana, ma le mamalu matagofie o lona malo.

¹³ O lou malo o le malo lea e faavavau lava; ma lau pule e āu tupulaga lava lea.

¹⁴ E taofia i luga e Ieova atoa uma ē pauu; o ia foi lē faatusa‘oina o e ua faano‘uno‘u uma lava.

¹⁵ E faasaga atu ia te oe mata o mea uma lava; e te avatua foi a latou mea e ‘ai i ona aso e tatau ai.

¹⁶ O loo e faamafola lou aao, ma faamaoona le manao o meaola uma lava.

¹⁷ E amiotonu Ieova i ona ala uma; o loo alofa ia i ana mea uma lava na faia.

¹⁸ E latalata mai Ieova ia i latou uma o e valaau ia te ia, o i latou uma o e valaau ia te ia ma le faamaoni.

¹⁹ E faia e ia le mea e manao i ai o e matatau ia te ia; e faafofoga foi o ia i la latou alaga atu, ma faaolaina i latou.

²⁰ E tausi Ieova i e alolofa atu ia te ia uma lava; a e fano ia te ia o e amio leaga atoa uma.

²¹ O vii o Ieova e ta‘u atu e lo‘u gutu; e faafetaia e tagata uma o lona suafa paia, e faavavau faavavau lava.