Salāmo 143 - O LE TUSI PAIA

O LE SALAMO CXLIII. O le tatalo i le Atua ina ia fesoasoani mai pe a puapuagaina. O le salāmo a Tavita.

¹ Ieova e, ia e faafofoga mai i la‘u tatalo; ia liliu mai ou fofoga i la‘u aioi atu; ia e tali mai ia te au i lou faamaoni ma lau amiotonu.

² Aua foi e te faaoo le faamasinoga i lau auauna; auā e leai se tagata ola e amiotonu i ou luma.

³ Auā ua tuliloa mai o e ita mai ia te au; ua na fasia a‘u ia paū i le eleele; ua na faanofo a‘u i le pouliuli, pei o e ua leva ona oti.

⁴ I le ua lailoa lo‘u loto i totonu ia te au; ua fememeai lava lo‘u loto i totonu ia te au.

⁵ Ou te manatu i aso anamua; ou te manatunatu i mea uma na e faia; ou te mafaufau i galuega a ou aao.

⁶ Ou te faaloaloa o‘u lima ia te oe, ou te manao lava ia te oe, faapei o se nuu naumati. Selā.

⁷ Ieova e, ia e vave tali mai ia te au, o le a faauma lo‘u nei ola; aua le ‘alo ou fofoga ia te au, ne‘i tusa a‘u ma tagata e o ifo i le lua.

⁸ Ia ou faalogologo i lou alofa i le taeao; auā ou te faatuatua ia te oe; ia e faasino mai le ala ou te savali ai; aua o loo naunau atu lo‘u loto ia te oe.

⁹ Ieova e, ia e laveaiina mai a‘u i e ita mai; ou te lafi atu ia te oe.

¹⁰ Ia e a‘oa‘o mai ia te au e fai lou finagalo; auā o oe lava lo‘u Atua; ia ta‘ita‘iina atu a‘u e lou Agaga lelei i le laueleele laulelei.

¹¹ Ieova e, ia e faaolaola mai ia te au ona o lou suafa; ia e aveeseina a‘u i le puapuaga ona o lau amiotonu.

¹² O lou alofa ia fano ai ia te oe e o ita mai ia te au; ia e faaumatia foi e ua faasaua mai ia te au uma lava; auā o lau auauna lava a‘u nei.