Sakaria 3 - O LE TUSI PAIA

O LE MATAUPU III. O Iosua. O le La laau.

¹ Ua ia faaali mai foi ia te au o Iosua le faitaulaga sili, o loo tu i luma o le agelu a Ieova; o Satani foi, o loo tu o ia i lona itu taumatau e tetee atu ia te ia.

² Ona fetalai atu lea o Ieova ia Satani, Ia aoai atu Ieova ia te oe Satani, ia aoai atu ia te oe Ieova, o le ua filifili i Ierusalema; e le o le motumotu ea lenei na seia mai le afi?

³ Ua ofu Iosua i ofu eleelea; ua tu foi o ia i luma o le agelu.

⁴ Ua ia tali atu, ma fetalai atu i e na tutū mai i ona luma, o loo faapea, Ave ese ia o ofu eleelea ua ofu ai o ia. Ua ia fetalai atu foi ia te ia, Faauta, ua ou aveesea au amioletonu i ou luga; ou te faaofu foi ia te oe i le ofu matagofie.

⁵ Ona ou fai atu lea, Ia latou faaee le pulou lelei i luga o lona ulu. Ona latou faaee ai lea o le pulou lelei i lona ulu, ma faaofu ia te ia i ofu; o loo tu mai foi le agelu a Ieova.

⁶ Ua matuā fai atu le agelu a Ieova ia Iosua, o loo faapea,

⁷ O loo faapea ona fetalai mai o Ieova o ‘au, Afai e te savali i o‘u ala, afai foi e te tausiusi i a‘u sauniga, ona e faamasino ai lea i lo‘u fale, ma e leoleo i o‘u lotoā; ou te tuu atu foi ia te oe ta‘ita‘i mai ia te i latou nei o e tutū mai.

⁸ Ia e faalogo mai Iosua e, le faitaulaga sili, o oe atoa ma e ua ia te oe, o e nonofo i ou luma; auā e fai ma faailoga nei tagata; faauta foi, ou te aumaia la‘u auauna o le La laau.

⁹ Auā faauta, o le maa na ou tuuina atu i luma o Iosua, e i le maa e tasi mata e fitu; faauta, ou te togitogi i ai ona togitogiga, ua fetalai mai ai Ieova o ‘au; ma ou ave ese le amioletonu a le nuu nei i le aso e tasi.

¹⁰ Ua fetalai mai Ieova o ‘au, O lea aso tou te taitasi ai ma valaau i lana uo i lalo o le vine ma lalo o le mati.