Roma 10 - O LE TUSI PAIA

O LE MATAUPU X. O le valaauina o nuu ese.

¹ Le au uso e, o le manao lava lenei o lo‘u loto, ma a‘u tatalo i le Atua mo Isaraelu, ia faaolaina i latou.

² Auā ou te molimau ia te i latou, ua latou maelega i la le Atua, a e le tusa ma le poto.

³ Auā ua le iloa e i latou le amiotonu mai le Atua, ma ua saili e faatu la latou lava amiotonu, ua latou le usiusitai ai i le amiotonu ma le Atua.

⁴ Auā o le iuga o le tulafono o Keriso lea, e oo mai ai le amiotonu i e faatuatua uma lava.

⁵ Auā ua tusia e Mose le amiotonu e maua i le tulafono, O le tagata na te faia ia mea, e ola ai lava ia.

⁶ A o le amiotonu e maua i le faatuatua, ua faapea ona fai mai, Aua le faapea ifo i lou loto, O ai se alu ae i le lagi? (o lona uiga, ina ia aami ia Keriso ia maliu ifo;)

⁷ pe faapea, O ai se alu ifo i le mea loloto? (o lona uiga, ona ia aami ia Keriso ia maliu ae nai e ua oti;)

⁸ a o le a ua fai mai ai? Ua latalata ia te oe le upu, o i lou gutu ma lou loto; o le upu lea o le faatuatua o matou o tala‘i atu ai;

⁹ afai e te ta‘utino i lou gutu i le Alii o Iesu, ma talitonu i lou loto ua toe faatuina mai o ia e le Atua nai e ua oti, e faaolaina ai oe;

¹⁰ auā o le loto e talitonu ai, e oo mai ai le amiotonu; a o le gutu e ta‘utino ai, e oo mai ai le ola.

¹¹ Auā ua faapea mai le Tusi, E le mā se tasi e faatuatua ia te ia.

¹² Auā e le eseese le Iutaia ma le Eleni; auā o le Alii e toatasi o tagata uma e faulai lona alofa ia te i latou uma lava o e valaau atu ia te ia;

¹³ auā e faaolaina i latou uma o e valaau i le suafa o le Alii.

¹⁴ O lenei, pe faapefea ona latou valaau atu i le ua latou le faatuatua i ai? pe faapefea foi ona latou faatuatua i le ua latou le faalogo atu i ai? pe faapefea foi ona latou faalogo atu, pe a leai se tala‘i atu?

¹⁵ pe faapefea foi ona latou tala‘i atu, pe afai ua le aauina atu i latou? Pei ona tusia, E matagofie naua o latou vae o e au mai le tala lelei i le manuia, o e au mai le tala i mea lelei.

¹⁶ A e lei usiusitai i latou uma lava i le tala lelei; auā ua faapea mai Isaia, Le Alii e, o ai ea ua talitonu i la matou upu e taulogologo atu?

¹⁷ O lenei, e tupu le faatuatua i le taulogologo atu, o le taulogologo atu foi o i le afioga a le Atua lea.

¹⁸ A e ou te fai atu, Ua latou le faalogo mai ea? E moni, ua oo lo latou leo i le lalolagi uma lava, o a latou upu foi i tuluiga o le atu laulau.

¹⁹ A e ou te fai atu, E lei iloa ea e Isaraelu? Ua muai fai mai Mose, Ou te faatupu le fuā ia te outou e le nuu ua le se nuu, ou te faaonoono ia te outou i le nuu valea.

²⁰ A ua faamalosi lava Isaia, ua faapea mai, Ua maua a‘u e i latou na le saili mai ia te au; ua faaalia a‘u i e na le fesili mai ia te au.

²¹ A ua faapea mai o ia ia Isaraelu, Ua ou faaloaloa atu o‘u lima i aso uma i le nuu faalogo gata ma le finau mai.