Pese 7 - O LE TUSI PAIA

O LE MATAUPU VII.

¹ Le tausala e, e matagofie naua ou vae i see; o le fa‘iga o ou suilapalapa ua pei o se asoa ua faia e lima o le tufuga.

² O lou pute ua pei o se ipu lapotopoto ua i ai le uaina ua suia; o lou manava ua pei o le faaputugāsaito ua afei i susana.

³ O ou susu e lua ua pei o tamai sevi e lua, o le ui lua a le sevi.

⁴ O lou ua ua pei o se ‘olo o nifo o elefane; o ou mata ua pei o vailepa i Hesepona e latalata ane i le faitotoa o Peterepima; o lou isu ua pei o le ‘olo o Lepanona e feagai ma Tamaseko.

⁵ O lou ulu i ou luga ua pei o Karamelu, ma lou lauulu ua pei o ie pauli; ua taofia le tupu i ou lauulu.

⁶ Le pele e, ua matuā lalelei oe, ua matuā matagofie oe, e faafiafia ai.

⁷ Ua faapea lou maualuga, ua tusa ma le pama; o ou susu foi e pei o fuifui vine.

⁸ Na ou faapea ifo, Ou te alu ae i le pama, ou te tago atu i ona lau; ona avea lea o ou susu e pei o fuifui vine, ma le nanamu o lou isu e pei o moli.

⁹ O lou fofoga foi e pei e le uaina lelei mā lo‘u manamea, ua tafe malie e faagaganaina ai laugutu o e momoe.

¹⁰ Ua fai a‘u mo lo‘u manamea, ua uai mai foi lona manao ia te au.

¹¹ Lo‘u manamea e, ina sau ia, ina ta o atu ia i le vao; ma momoe i faoa aai.

¹² Ia ta ala usu atu i tovine, ma ta matamata ai po ua fuga vine, po ua mātala ona fuga, po ua tupu olaola rimoni; ou te alofa atu ia te oe i lea mea.

¹³ Ua puaiina mai le nanamu o tutaima; e latalata ane foi i o tatou faitotoa o fua uma e sili ona lelei; o fua ua faatoa tau atoa ma fua ua loa, ua ou faaputuina mā oe, lo‘u manamea e.