Pese 4 - O LE TUSI PAIA

O LE MATAUPU IV.

¹ La‘u pele e, faauta, ua e lalelei; faauta, ua lalelei oe; ua ni mata o se lupe ou mata ai totonu o lou ie ufimata. O lou lauulu ua pei o fulufulu o le lafu ‘oti ua taooto mai i le mauga o Kiliata.

² O ou nifo ua pei o le lafu mamoe ua seleina fulufulu ua o ae nai le fulufuluga; e taitasi o i latou uma ma taiuilua, e leai foi se tasi o i latou e pa.

³ O ou laugutu ua pei o le manoa mūmū, ua matagofie lou gutu; ua pei o se fasi rimoni ou alafau i totonu o lou ie ufimata.

⁴ O lou ua ua pei o le ‘olo o Tavita na faia e tuu ai le auupega; ua faatautauina ai o talita e afe, o talita uma o toa.

⁵ O ou susu e lua ua pei o tamai sevi e lua, o le ui lua a le sevi, o loo tataa i totonu o susana.

⁶ Ou te alu atu i le mauga o i ai le muro, ma le mea maupuepue o i ai le lipano; seia gafoa le ata, ma mavae le ufiata.

⁷ La‘u uo e, ua sao lou lalelei, e leai lava se pona ia te oe.

⁸ Ina ta tuua ia o Lepanona, la‘u avā e, ina ta tuua Lepanona. Se‘i e vaavaai nai le tumutumu o Amana, ma le tumutumu o Senira ma Heremoni, ma ana o leona, ma mauga o nameri.

⁹ Ua avea lo‘u loto ia te oe, lo‘u tuafafine e, la‘u avā e; ua avea lo‘u loto i le tasi o ou mata, ma le tasi asoa o i lou ua.

¹⁰ Lo‘u tuafafine e, la‘u avā e, ua silisili ese lou alofa mai; e sili ona lelei o lou alofa mai i le uaina; o le nanamu foi o ou suāuu e sili i mea manogi uma.

¹¹ La‘u avā e, ua sisina ifo meli i ou laugutu; o i lalo o lou laulaufaiva le meli ma le suāsusu; o le nanamu foi o ou ofu ua pei o le nanamu o Lepanona.

¹² O lo‘u tuafafine, o la‘u avā, o le faatoaga ua puipuia o ia; o le vaipuna ua puipui; o le punāvai ua faamaufaailogaina.

¹³ O au laau muli o le torimoni ia, ma ona fua e sili ona lelei; o le kofera atoa ma le nato, o le nato ma le keroko;

¹⁴ o le kani ma le kinamomi, atoa ma laau uma o le lipano; o le muro ma le aloe, atoa ma mea uma e sili ona manogi;

¹⁵ o le punāvai i faatoaga; o le punāvai ola; o vaitafe foi mai Lepanona.

¹⁶ Le matu e, ina ala mai ia; le toga e, ina sau ia; agi mai i la‘u faatoaga, ina ia puaiina lona manogi. Ia maliu mai lo‘u manamea i lana faatoaga, ma taumafa i ona fua e sili ona lelei.