Pese 3 - O LE TUSI PAIA

O LE MATAUPU III.

¹ Ua ou i luga o la‘u moega i le po, na ou saili ai i le ua manao i ai lo‘u loto. Ua ou saili ia te ia, a e lei maua o ia.

² Ou te tulai ma fealualuai i le aai, i ala ma malae, ou te sailiili ai i le ua manao i ai lo‘u loto; ua ou sailiili ia te ia, a e lei maua.

³ Na maua a‘u e leoleo e feoai i le aai; ua ou faapea atu i ai, Ua outou iloa ea le ua manao i ai lo‘u loto?

⁴ E lei ata tuanai ia te i latou, ua ou maua loa le ua manao i ai lo‘u loto; na ou taofi ia te ia, ou te lei toe tuuina o ia seia ta‘ita‘iina atu ia te ia i le fale o lo‘u tinā, i le potu o le na fanaua a‘u.

⁵ Tama fafine a Ierusalema e, ou te fai atu ia te outou, ia tauto mai i sevi ma aila o le vao, tou te le tatatuli pe fafagu i la‘u pele, seia faitalia o ia.

⁶ O ai ea lena o loo alu ae nai le vao e faapei o le asu faaniutu, o loo nanamu i le pulu muro, ma le pulu lipano, ma mea manogi uma ua nutililiia a le tagata faatauoa?

⁷ Faauta mai ia, o lona moega, o le moega o Solomona, ua vagavagaia i toa e toaonogafulu nai le au totoa o Isaraelu.

⁸ Ua taitasi uma ma ‘u‘u i lana pelu, ua a‘oa‘oina i le taua; o le tagata ma lana pelu i lona vae ona o le mata‘u i le po.

⁹ Ua faia e le tupu o Solomona le fata mona i laau mai Lepanona.

¹⁰ Ua ia faia ona pou i le ario, o ona faalava i le auro, o lona nofoa i le ie pāuli; ua folasia faamatagofie i totonu i mea alofa mai tama fafine a Ierusalema.

¹¹ Tama fafine a Siona e, o atu ia, ina matamata i le tupu o Solomona ma le pale na faapaleina ai o ia e lona tina i le aso na fai avā ai o ia, le aso foi na fiafia ai lona finagalo.