Paruka 5 - O LE TUSI PAIA

O LE MATAUPU V. O le tatalo a Siona i le Atua.

¹ Ieiova e, ia e manatua le mea ua oo ia te i matou; ina e silasila mai ia, ma ia e silafia le faalumaina o i matou.

² Ua avea lo matou tofi mo tagata ese, ma o matou fale mo nuu ese.

³ Ua mātuaoti i matou, ua leai ni tamā; o matou tinā ua pei o fafine ua oti a latou tane.

⁴ Ua matou feinu i vai ua faatauina i tupe; o la matou fafie ua aumaia i le faatau.

⁵ Ua faasauaina i matou i le amo i o matou ua; ua lailoa i matou, ua leai sina mapu ia te i matou.

⁶ Ua matou tuuina atu le lima ia Aikupito ma Asuria, ina ia maoona ai i mea e ‘ai.

⁷ Ua agasala o matou tamā, ua leai foi i latou; a o i matou, ua tauave e i matou a latou sala.

⁸ Ua pule auauna ia te i matou; ua leai se tasi e laveai ia te i matou ai o latou lima.

⁹ O le toa‘i ua matou maua ai la matou mea e ‘ai, ona o le pelu ua i le vao.

¹⁰ Ua mu o matou pa‘u e peiseai se ogaumu, ona ua velavela o le oge.

¹¹ Ua latou fetoso fafine i Siona, o taupou foi i aai o Iuta.

¹² Na faatautauina alii i o latou lima; sa le ava i toeaina.

¹³ Na latou aveina atu taulelea e olo i maaolo; na taupaū foi tama i avegā fafie.

¹⁴ Ua tuua e toeaina o le faitotoa, o taulelea foi ua tuu a latou pese.

¹⁵ Ua mavae le fiafia o matou loto; ua liua la matou siva ma faanoanoa.

¹⁶ Ua paū le palealii i lo matou ulu; oi talofa ia te i matou nei, auā ua agasala i matou.

¹⁷ O le mea lea ua vaivai ai o matou loto; o mea ia ua faapouliuligia ai o matou mata;

¹⁸ auā o le mauga o Siona ua tuufua, ua feoai ai alope.

¹⁹ O oe, Ieova e, e tumau oe e faavavau; o lou nofoālii e auga tupulaga lea.

²⁰ Po o le a ea le mea e te faagalogaloina ai o i matou e faavavau? e te tuua ea o i matou i aso e tele?

²¹ Ieova e, ia e faaliliuina o i matou ia te oe, ona faaliliuina ai lea o i matou; ia e faafouina o matou aso e pei o anamua.

²² Auā ua e matuā lafoai ia te i matou; ua toasa tele lava oe ia te i matou.