Numera 32 - O LE TUSI PAIA

O LE MATAUPU XXXII. O le tofi o sa Reupenā ma sa Katō.

¹ Sa matuā tele lava le lafu manu a le fanauga a Reupena, ma le fanauga a Kato; ua vaavaai i latou i le laueleele o Iasaru, ma le laueleele o Kiliata, faauta foi o le mea e aoga lava i lafu manu.

² Ona o mai ai lea o le fanauga a Kato, ma le fanauga a Reupena, ua latou fai mai ia Mose, ma Eleasaro le ositaulaga, ma alii sili o le faapotopotoga, ua faapea mai,

³ O Atarota, ma tipona, ma Iasaru, ma Nimara, ma Hesepona, ma Eleale, ma Sepema, ma Nepo, ma Peona,

⁴ o le nuu na fasia e Ieova i luma o le faapotopotoga o Isaraelu, o le nuu e aoga i lafu manu; o loo ia au auauna foi o lafu.

⁵ Ua latou faapea mai foi, Afai e alofagia i matou e oe ia tuuina mai i au auauna o lenei nuu e fai mo matou, a e aua e te faaoo ia te i matou i tala atu o Ioritana.

⁶ Ona fai atu ai lea o Mose i le fanauga a Kato, ma le fanauga a Reupena, E o atu ea o outou uso i le taua, a e tou te nonofo ea iinei?

⁷ Se a ea le mea ua outou faavaivai ai loto o le fanauga a Isaaelu ia le o atu ai i latou i le nuu na tuuina mai e Ieova ia te i latou?

⁸ Sa faapea ona fai e o outou tamā, ina ua ou aauina atu i latou mai Katesapanea e asiasi i le nuu.

⁹ Na latou o ae i le alia o Esekolo, ma latou asiasi i le nuu, ona latou faavaivai ai lea o loto o le fanauga a Isaraelu ina ia le o ae i latou i le nuu ua tuuina mai e Ieova ia te i latou.

¹⁰ Ona tupu ai lea o le toasa o Ieova i lea lava aso, ona tauto ai lea o ia, ua faapea mai.

¹¹ O tagata na o ae mai Aikupito e afua mai i e ua luafulu o latou tausaga, atoa ma e ua matutua ai, latou te le iloa lava le nuu na ou tauto ai ia Aperaamo, ma Isaako, ma Iakopo; auā ua latou le matuā mulimuli mai ia te au;

¹² tau lava o Kalepo le atalii o Iefune o le sa Kinasā, ma Iosua le atalii o Nuno; auā ua la matuā mulimuli mai ia Ieova.

¹³ Na tupu foi le toasa o Ieova ia Isaraelu, ona faafeoai ai lea o i latou e ia i le vao i tausaga e fagafulu, ina seia faaumatia lea tupulaga atoa na fai mea leaga i luma o Ieova.

¹⁴ Faauta mai foi, ua tutupu mai outou o sui o outou tamā, o le tupulaga o tagata agasala, e toe faatele ai le toasa mamafa o Ieova ia Isaraelu.

¹⁵ Auā afai tou te liliu ese ia te ia, ona toe tuua lea e ia o i latou i le vao; e faaumatia foi e outou lenei nuu uma.

¹⁶ Ona latou faalatalata mai ai lea ia te ia, ma latou faapea mai, Matou te faia iinei o lotoā mamoe ma lo matou lafu manu, ma aai ma o matou tama iti;

¹⁷ a o i matou, matou te sauniuni faavave i le taua, e o atu ai i luma o le fanauga a Isaraelu, seia matou faaootia i latou i le mea latou te nonofo ai; a o matou tama iti, latou te nofo ‘olo i aai, auā o tagata o le nuu.

¹⁸ Matou te le toe foi mai i o matou aiga seia maua e le fanauga a Isaraelu taitasi ma lona tofi.

¹⁹ Auā matou te le fai lo matou tofi faatasi ma i latou i le la itu o Ioritana, po o ona tala atu: auā ua maua e i matou lo matou tofi i lenei itu i sasae o Ioritana.

²⁰ Ona tali atu ai lea o Mose ia te i latou, Afai tou te faia lenei mea, afai tou te sauniuni e ō i le taua i luma o Ieova,

²¹ ma outou sopoia atu Ioritana, o outou uma o sauni i le taua, i luma o Ieova, seia tulia e ia ona fili ai ona luma,

²² ma faatoilaloina le nuu i luma o Ieova; mulimuli ane tou te toe o mai, ona magalo ai lea o outou i luma o Ieova, atoa ma Isaraelu; e faia foi lenei nuu mo outou i luma o Ieova.

²³ A e afai tou te le faapea ona fai, faauta, e agasala ai outou ia Ieova; ia outou iloa foi e maua lava outou e a outou agasala.

²⁴ Ina faia lava ia e outou o aai mo a outou tama iti, ma lotoā mo a outou mamoe; ma ia outou faia lava le mea ua outou fai mai ai.

²⁵ Ona fai mai ai lea o le fanauga a Kato, ma le fanauga a Reupena ia Mose, ua faapea mai, E faia lava e au auauna le mea ua fetalai mai ai lo matou alii.

²⁶ O a matou tama iti, o a matou avā, o matou lafu mamoe, ma a matou manu uma e nonofo i latou iina i aai o Kiliata.

²⁷ A o au auauna, matou te o atu i lela itu o sauni uma lava i luma o Ieova e tau ai i le taua, e pei ona fetalai mai ai o lo matou alii.

²⁸ O i latou foi ia ua poloai atu ai Mose ia Eleasaro le ositaulaga, ma Iosua le atalii o Nuno, ma matai sili o itu aiga o le fanauga a Isaraelu,

²⁹ ua faapea atu Mose ia te i latou, Afai e sopoia atu faatasi ma outou o Ioritana e le fanauga a Kato, ma le fanauga a Reupena, o sauni uma e tau ai le taua i luma o Ieova, ma faatoilaloina ai le nuu i o outou luma, ona outou tuuina atu ai lea ia te i latou le nuu o Kiliata e fai ma latou.

³⁰ A e afai latou te le o faatasi ma outou i lela itu o sauni i le taua, ona maua ai lea e i latou o latou tofi e faatasi ma outou i le nuu o Kanana.

³¹ Ona fai mai ai lea o le fanauga a Kato, ma le fanauga a Reupena, ua faapea mai, O le mea ua fetalai mai ai Ieova i au auauna matou te faapea ona faia;

³² matou te o atu o i matou lava i lela itu o sauni i le taua i luma o Ieova i le nuu o Kanana, ina ia fai ai lo matou tofi i lenei itu o Ioritana.

³³ Ona tuuina lea e Mose ia te i latou, o le fanauga a Kato, ma le fanauga a Reupena, ma le tasi vaega o le itu aiga o Manase le atalii o Iosefa, o le nuu o Sekono le tupu o sa Amorī; ma le nuu o Oko le tupu o Vasana; o le laueleele, ma aai i ona itu, o aai ua soo ai le nuu.

³⁴ Ona faia lea e le fanauga a Kato o Tipona, ma Atarota, ma Aroeru,

³⁵ ma Atirota, ma Sofano, ma Iasaru,

³⁶ ma Iakepea, ma Petenimara, ma Petearana, o aai nofo ‘olo; atoa ma lotoā mamoe.

³⁷ Ua faia foi e le fanauga a Reupena, o Hesepona, ma Eleale,

³⁸ ma Kiriataima, ma Nepo, ma Paalameona, (ua liua o la igoa,) o aai na latou faia i nisi igoa.

³⁹ Ua o atu foi i Kiliata le fanauga a Makiro le atalii o Manase, ma latou aea, ua latou tulia foi sa Amorī na i ai.

⁴⁰ Ona tuuina atu lea e Mose o Kiliata ia Makiro le atalii o Manase, ona nofo ai lea o ia.

⁴¹ Ua alu foi Iairo le atalii o Manase, ma na faoa ona faoa aai; ua ia faaigoa foi i ai, o Havotaiairo.

⁴² Ua alu foi Nopa, ma na faoa o Kinata ma ona faoa aai, ua ia faaigoa foi i ai i lona lava igoa, o Nopa.