Numera 31 - O LE TUSI PAIA

O LE MATAUPU XXXI. O le taua a Isaraelu ma Mitiana, ma tulafono i mea e maua i taua.

¹ Ua fetalai mai foi Ieova ia Mose, ua faapea mai,

² Ia e taui atu ia Mitiana ona o le fanauga a Isaraelu, mulimuli ane ona faatasiina atu ai lea o oe i lou nuu.

³ Ona fai atu ai lea o Mose i le nuu, ua faapea atu, Ia sauniuni nisi o outou i le taua e sii atu e i latou ia Mitiana, e faaoo atu le taui mai ia Ieova ia Mitiana.

⁴ Ia taitoaafe i itu aiga uma o Isaraelu tou te aauina atu ai i le taua.

⁵ Ona fa‘i ‘au lea ai le manomano o Isaraelu e taitoaafe i itu aiga; e sefulu o afe ma afe e lua e ua sauni i le taua.

⁶ Ua aauina atu i latou e Mose i le taua e taitoaafe i itu aiga; latou te o i le taua ma Fineaso le atalii o Eleasaro le ositaulaga, sa ia te ia mea paia ma pu e ili.

⁷ Ona latou tau ai lea ma Mitiana, e pei ona poloai mai o Ieova ia Mose, ua fasiotia e i latou o tane uma lava.

⁸ Ua latou fasiotia foi tupu o Mitiana faatasi ma i latou na fasia, o Evi, ma Rekema, ma Suro, ma Huro, ma Repa, o tupu e toalima o Mitiana; o Palaamo foi le atalii o Peoro ua latou fasiotia i le pelu.

⁹ Ua ave foi faatagataotaua e le fanauga a Isaraelu o fafine o Mitiana, atoa ma o latou tama iti; o a latou lafu povi uma foi, ma a latou lafu mamoe uma, atoa ma a latou oloa uma ua latou vetea.

¹⁰ O a latou aai uma foi na latou nonofo ai, atoa ma o latou ‘olo uma, ua latou susunuina i le afi.

¹¹ Ua latou ave foi le vete uma ma mea uma na maua, o tagata atoa foi ma manu.

¹² Ona latou au mai ai lea o faatinifuga, ma mea na maua, atoa ma vete ia Mose, ma Eleasaro le ositaulaga, ma le faapotopotoga o le fanauga a Isaraelu i le toagālauapi i le eleele laugatasi o Moapi e latalata ane i Ioritana, e fesagai ma Ieriko.

¹³ Ona o atu lea o Mose, ma Eleasaro le ositaulaga, ma alii sili uma o le faapotopotoga, e faafetaiai ia te i latou i tua o le toagālauapi.

¹⁴ Ona ita lea o Mose i e sa pule i ‘au o le taua, o e na ave i taitoaafe, ma e na ave i taitoaselau; o e ua o mai i le taua sa tau.

¹⁵ Ua faapea atu a Mose ia te i latou, Ua outou faaolaina ea o fafine uma?

¹⁶ Faauta, o i latou ia na ala ai ona solia e le fanauga a Isaraelu le afioga a Ieova i le mea a Peoro, ona o le upu a Palaamo; ona tupu ai lea o le faamai i le faapotopotoga a Ieova.

¹⁷ O lenei ia outou fāsiotia tama tane uma o i tama iti, ma ia outou fāsiotia foi fafine uma ua tanea.

¹⁸ A o tama teine uma e lei tanea, ia outou faaolaina mo outou.

¹⁹ A o outou foi, tou te nonofo i tua o le toagalauapi i aso e fitu; ai se na na fasiotia se tasi, ai se na pai atu foi i se tagata oti, tou te faamamāina outou i le aso tolu ma le aso fitu; o outou atoa ma o outou tagata o taua.

²⁰ Ia outou faamamāina foi ofu uma, ma mea uma ua faia i pa‘u, ma mea uma ua faia i fulufulu o ‘oti, atoa ma mea uma ua faia i laau.

²¹ Ua fai atu foi Eleasaro le ositaulaga i ‘au na o atu i le taua, O le sauniga lenei o le tulafono na poloai mai ai Ieova ia Mose,

²² Tau lava o le auro, ma le ario, o le ‘apa memea, o le uamea, o le ‘apa sinasina, ma le pulu,

²³ o mea uma e le afaina i le afi tou te tuu i le afi, ona mamā ai lea; a e ui lava i lea ia faamamāina pea i le vai mo e ua leaga; a o mea uma e leaga i le afi tou te tuu i le vai.

²⁴ Tou te taia foi o outou ofu i le aso fitu, ona mamā ai lea o outou, mulimuli ane tou o mai i le toagālauapi.

²⁵ Ona fetalai mai lea o Ieova ia Mose, ua faapea mai,

²⁶ Ia e faitau mai le atoatoa o mea na maua i le vete, o tagata atoa ma manu; o oe, ma Eleasaro le ositaulaga, ma matai sili o le faapotopotoga;

²⁷ ma ia outou vaeluagalemuina o mea na maua mo latou e na faia le taua, ma latou o atu e tau i le taua, atoa ma le faapotopotoga uma.

²⁸ Ia outou vaea mai foi se taulaga ia Ieova ai ‘au na o i le taua, ia taitasi ai le tailima o selau o mea, o tagata, ma povi, ma asini, atoa ma mamoe.

²⁹ O la latou vaega ia au mai ai le taulaga, ma avatu ia Eleasaro le ositaulaga e fai ma taulaga sii ia Ieova.

³⁰ A o le vaegāmea a le fanauga a Isaraelu, ia e au mai ai ia taitasi i le tailimagafulu o mea, o tagata, ma povi, ma asini, ma mamoe, o manu uma lava, ma avatu ai i sa Levī, o e ua tausi i le tausiga o le malumalu o Ieova.

³¹ Ona faia lea e Mose ma Eleasaro le ositaulaga, e pei ona poloai mai ai o Ieova ia Mose.

³² O mea na maua, o toe o vete na maua e au o le taua, o mamoe e ono selau o afe ma afe e fitu sefulu ma afe e lima.

³³ O povi e fitu sefulu o afe ma afe e lua.

³⁴ O asini e ono sefulu o afe ma le afe e tasi.

³⁵ O le atoa foi o tagata, o fafine ua le tanea, e tolu sefulu o afe ma afe e lua.

³⁶ O le vaeluagalemu foi, o le vaegāmea lea a e na o i le taua, o le tauaofai o mamoe e tolu selau o afe ma afe e tolu sefulu ma afe e fitu ma le lima o selau.

³⁷ O le taulaga foi ia Ieova ai mamoe ia, e ono o selau ma le fitu o sefulu ma le lima.

³⁸ O povi e tolu sefulu o afe ma afe e ono. O le taulaga foi ia Ieova ai ia mea, e fitugafulu ma le lua.

³⁹ O asini e tolu sefulu o afe ma le lima o selau. O le taulaga foi ia Ieova ai ia mea, e onogafulu ma le tasi.

⁴⁰ O tagata e sefulu o afe ma afe e ono. O le taulaga foi ia Ieova ai ia te i latou e toatolugafulu ma le toalua.

⁴¹ Ua avatu e Mose le taulaga ia Eleasaro le ositaulaga, o le taulaga sii ia Ieova, e pei ona poloai mai ai o Ieova ia Mose.

⁴² A o le vaegāmea a le fanauga a Isaraelu na vaea e Mose ai ‘au na tau i le taua;

⁴³ (o le vaegāmea lenei a le faapotopotoga; o mamoe e tolu selau o afe ma afe e tolu sefulu ma afe e fitu ma le lima o selau;

⁴⁴ o povi e tolu sefulu o afe ma afe e ono;

⁴⁵ o asini e tolu sefulu o afe ma le lima o selau;

⁴⁶ o tagata foi e sefulu o afe ma afe e ono;)

⁴⁷ ua ave e Mose ai le vaegāmea a le fanauga a Isaraelu e taitasi i le limagafulu o mea, o tagata atoa ma manu, ma na avatua i sa Levī, o e na tausi i le tausiga o le malumalu o Ieova, e pei ona poloai ma ai o Ieova ia Mose.

⁴⁸ Ona o mai ai lea ia Mose o alii na pule i afe na ō i le taua, o e na ave i taitoaafe, ma e na ave i taitoaselau.

⁴⁹ Ua latou fai mai ia Mose, Ua uma ona faitau e au auauna le aofai o ‘au o le taua na ia te i matou; ua leai so matou e toatasi o le iloa;

⁵⁰ o le mea lea ua matou au mai ai le taulaga ia Ieova, o mea na maua taitasi a tagata, o teuga auro, ma filifili auro, ma taulima, ma mama, ma mama o taliga, ma asoa auro, e fai a‘i se togiola mo i matou i luma o Ieova.

⁵¹ Ona talia lea e Mose ma Eleasaro le ositaulaga le auro mai ia te i latou, o teuga uma ua faia.

⁵² O auro uma foi o le taulaga sii na avatu ia Ieova e alii na ave i taitoaafe, ma alii na ave i taitoaselau, e sefulu o afe ma afe e ono ma le fitu o selau ma le limagafulu o sekeli ia.

⁵³ O ‘au o le taua na latou taitoatasi ma fai lana vete.

⁵⁴ Ua talia e Mose ma Eleasaro le ositaulaga le auro i alii na ave i taitoaafe, ma e na ave i taitoaselau, ua la avatua i le fale fetafai o le faapotopotoga e fai ma faamanatuga mo le fanauga a Isaraelu i luma o Ieova.