Numera 27 - O LE TUSI PAIA

O LE MATAUPU XXVII. O le fia fai tofi o afafine o Selofeata. Ua tofia Iosua e pule.

¹ Ona o mai ai lea o afafine o Selofeata, o le atalii o Eferu, o le atalii ia o Kiliata, o le atalii ia o Makiro, o le atalii ia o Manase, o aiga ia o Manase o le atalii o Iosefa; o igoa foi ia o ona afafine, o Maala, ma Noa, ma Hakelu, ma Maleka, ma Tiresa.

² Ua latou tutu i luma o Mose, ma luma o Eleasaro le ositaulaga, i luma foi o alii, ma le faapotopotoga uma, i le faitotoa o le fale fetafai o le faapotopotoga, ua faapea mai,

³ Ua oti lo matou tamā i le vao, na le i ai o ia i le faapotopotoga o e na faapotopoto e tetee atu ia Ieova, o e ua ‘au faatasi ma Koru; a ua oti o ia i lana lava agasala, ua leai foi ni ona atalii.

⁴ Pe tineia i se a le igoa o lo matou tamā i lona aiga, ina ua leai sona atalii? Ina au mai ia ia te i matou so matou fanua faatasi ma le au uso o lo matou tamā.

⁵ Ona avatu ai lea e Mose o la latou upu i luma o Ieova.

⁶ Ona fetalai mai ai lea o Ieova ia Mose, ua faapea mai,

⁷ E tonu le upu a afafine o Selofeata; e te avatu lava ia te i latou so latou lava tofi faatasi ma le au uso o lo latou tamā; e te tuuina atu ia te i latou le tofi o lo latou tamā.

⁸ Ia e fai atu foi i le fanauga a Isaraelu, ia faapea atu, Afai e oti se tagata, a e leai sona atalii, ona outou tuuina atu ai lea o lona tofi i lona afafine.

⁹ Afai foi e leai sona afafine, ona outou tuuina atu ai lea o lona tofi i ona uso.

¹⁰ Afai foi e leai ni ona uso, ona outou tuuina atu ai lea o lona tofi i uso o lona tamā.

¹¹ Afai foi e leai ni uso o lona tamā, ona outou tuuina atu ai lea o lona tofi i se tasi o lona aiga o le ua aupito mai ia te ia i lona aiga, e fai foi mona. E fai foi lena mea ma tulafono e faatonu a‘i i le fanauga a Isaraelu, e pei ona poloai mai ai o Ieova ia Mose.

¹² Ua fetalai mai foi Ieova ia Mose, Ia e alu ae i lenei mauga o Aperima, ma vaavaai i le nuu ua ou tuuina atu i le fanauga a Isaraelu.

¹³ E te iloa ai, ona faatasiina atu ai lea o oe foi i lou nuu, e pei ona faatasiina atu o Arona lou uso.

¹⁴ Auā na oulua fouvale i la‘u upu i le vao o Tisina, ina ua finau mai o le faapotopotoga, ua le faapaiaina a‘u i le vai i o latou luma; o le vai o Meripa lea o i Katesa, i le vao o Tisina.

¹⁵ Ona fai atu ai lea o Mose ia ieova, ua faapea atu,

¹⁶ Ia tofia e Ieova, le Atua o agaga o tagata uma, se tagata e pule i le faapotopotoga;

¹⁷ o le na te alu atu i o latou luma ma toe sau i o latou luma; o le na te ta‘ita‘i atu, ma toe au mai ia te i latou; ina ne‘i avea o le faapotopotoga a Ieova, e pei o mamoe ua leai so latou leoleo.

¹⁸ Ona fetalai mai ai lea o Ieova ia Mose, Ia e ave ia Iosua le atalii o Nuno, o le tagata lea o i ai le Agaga, ma ia e faaee lou lima i luga ia te ia;

¹⁹ ia e tuu atu foi ia te ia i luma o Eleasaro le ositaulaga, ma luma o le faapotopotoga uma, ma ia e sauni atu se upu ia te ia i o latou luma;

²⁰ ia e tuu atu foi ia te ia nisi o lou mamalu, ina ia faalogo ai le faapotopotoga uma o le fanauga a Isaraelu.

²¹ E tu foi o ia i luma o Eleasaro le ositaulaga, na te fesili foi mo ia i le faatonuga o le Urima i luma o Ieova; o lana upu latou te o atu ai, o lana upu foi latou te toe foi mai ai, o ia atoa ma le fanauga a Isaraelu uma faatasi ma ia, o le faapotopotoga uma lava.

²² Ona faia lea e Mose e pei ona fetalai mai ai o Ieova ia te ia; ua na ave ia Iosua, ma na tuu atu ia te ia i luma o Eleasaro le ositaulaga, ma luma o le faapotopotoga uma.

²³ Ua ia faaee atu foi ona lima i luga ia te ia, ma sauni atu le upu ia te ia, e pei ona fetalai mai o Ieova ia Mose.