Numera 26 - O LE TUSI PAIA

O LE MATAUPU XXVI. O le faitauina o Isaraelu.

¹ Ua mavae le faamai, ona fetalai mai lea o Ieova ia Mose ma Eleasaro le atalii o Arona le faitaulaga, ua faapea mai,

² Ina faitau mai ia le aofai o le faapotopotoga uma o le fanauga a Isaraelu, e afua mai i e ua luafulu o latou tausaga, atoa ma e ua matutua ai, i aiga o latou tamā; atoa uma o Isaraelu e mafai ona o i le taua.

³ Ua fai atu foi Mose ma Eleasaro le ositaulaga ia te i latou i le eleele laugatasi o Moapi, e latalata ane i Ioritana, e fesagai ma Ieriko, ua faapea atu,

⁴ Ina faitau mai ia e afua mai i e ua luafulu o latou tausaga, atoa ma e ua matutua ai; e pei ona poloai mai ai o Ieova ia Mose ma le fanauga a Isaraelu na o mai mai le nuu o Aikupito.

⁵ O Reupena, o le ulumatua a Isaraelu; o atalii o Reupena; o Enoka, na tupu mai ai le aiga o sa Enokā; mai ia Falu le aiga o sa Falū;

⁶ mai ia Esarona le aiga o sa Esaronā; mai ia Karame le aiga o sa Karamē.

⁷ O aiga ia o sa Reupenā; o i latou foi na faitaulia e fa sefulu o afe ma afe e tolu ma le fitu o selau ma le toatolu sefulu.

⁸ O le atalii foi o Falu, o Eliapo.

⁹ O atalii foi o Eliapo, o Nemueli, ma Tatano, ma Apiramo; o Tatano ma Apiramo ia sa ta‘ua i le faapotopotoga, na la faamisa ia Mose ma Arona, faatasi ma e na ‘au ma Koru, ina ua latou faamisa ia Ieova.

¹⁰ Na faamaga le gutu o le eleele, ma folo ifo ia te i latou faatasi ma Koru, ina ua oti lea faapotopotoga, ina ua faaumatia i le afi o tagata e toalua lau ma le toalimagafulu; na faia foi i latou ma faailoga.

¹¹ A o atalii o Koru na le oti i latou.

¹² O atalii o Simeona i o latou aiga; na tupu mai ia Nemuelu o le aiga o sa Nemuelū; mai ia Iaminu o le aiga o sa Iaminū; mai ia Iakinu o le aiga o sa Iakinū;

¹³ mai ia Sera o le aiga o sa Serā; mai ia Saulo o le aiga o sa Saulō.

¹⁴ O aiga ia o sa Simeonā, e lua sefulu o afe ma afe e lua ma le toalua selau.

¹⁵ O atalii o Kato i o latou aiga; na tupu mai ia Sefiono o le aiga o sa Sefionō; mai ia Haki o le aiga o sa Hakī; mai ia Suni o le aiga o sa Sunī;

¹⁶ mai ia Aseni o le aiga o sa Asenī; mai ia Eri o le aiga o sa Erī;

¹⁷ mai ia Aroti o le aiga o sa Arotī; mai ia Areli o le aiga o o sa Arelī.

¹⁸ O aiga ia o atalii o Kato; o i latou na faitaulia, e fa sefulu o afe ma le toalima selau.

¹⁹ O atalii o Iuta, o Eru ma Onani; na oti Eru ma Onani i le nuu o Kanana.

²⁰ O atalii foi ia o Iuta i o latou aiga; na tupu mai ia Sila o le aiga o sa Silā; mai ia Faresa o le aiga o sa Faresā; mai ia Sera o le aiga o sa Serā.

²¹ O atalii foi ia o Faresa; na tupu mai ia Esarona o le aiga o sa Esaronā; mai ia Hamulu o le aiga o sa Hamulū.

²² O aiga ia o Iuta; o i latou na faitaulia, e fitu sefulu o afe ma afe e ono ma le toalima selau.

²³ O atalii o Isakara i o latou aiga; na tupu mai ia Tulaga o le aiga o sa Tulagā; mai ia Pua o le aiga o sa Puā;

²⁴ mai ia Iasuvi o le aiga o sa Iasuvī; mai ia Semarona o le aiga o sa Semaronā.

²⁵ O aiga ia o Isakara; o i latou na faitaulia, e ono sefulu o afe ma afe e fa ma le toatolu selau.

²⁶ O atalii o Sepulona i o latou aiga; na tupu mai ia Seretu o le aiga o sa Seretū; mai ia Aluna o le aiga o sa Alunā; mai ia Ialelu o le aiga o sa Ialelū.

²⁷ O aiga ia o sa Sepulonā; o i latou na faitaulia, e ono sefulu o afe ma le toalima selau.

²⁸ O atalii o Iosefa i o latou aiga, o Manase ma Efaraima.

²⁹ O atalii o Manase; na tupu mai ia Makiro o le aiga o sa Makirō; na fanaua foi e Makiro o Kiliata; mai ia Kiliata o le aiga o sa Kiliatā.

³⁰ O atalii ia o Kiliata; mai ia Ieseru o le aiga o sa Ieserū; mai ia Eleka o le aiga o sa Elekā;

³¹ mai ia Aserieli o le aiga o sa Aserielī; mai ia Sakema o le aiga o sa Sakemā;

³² mai ia Semita o le aiga o sa Semitā; mai ia Eferu o le aiga o sa Eferū.

³³ O Selofeata o le atalii o Eferu, e leai ni ona atalii, na o afafine; o igoa foi ia o afafine o Selofeata, o Maala, ma Noa, ma Hakelu, ma Meleka, ma Tiresa.

³⁴ O aiga ia o Manase; o i latou na faitaulia, e lima sefulu o afe ma afe e lua ma le toafitu selau.

³⁵ O atalii ia o Efaraima i o latou aiga; na tupu mai ia Sutelu o le aiga o sa Sutelū; mai ia Pekaru o le aiga o sa Pekarū; mai ia Taana o le aiga o sa Taanā.

³⁶ O atalii ia o Sutelu; mai ia Erana o le aiga o sa Eranā.

³⁷ O aiga ia o atalii o Efaraima; o i latou na faitaulia, e tolu sefulu o afe ma afe e lua ma le toalima selau. O atalii ia o Iosefa i o latou aiga.

³⁸ O atalii o Peniamina i o latou aiga; na tupu mai ia Pela o le aiga o sa Pelā; mai ia Asepelu o le aiga o sa Asepelū; mai ia Airamo o le aiga o sa Airamō;

³⁹ mai ia Supimo o le aiga o sa Supimō; mai ia Hupimo o le aiga o sa Hupimō;

⁴⁰ o atalii ia o Pela, o Aratu ma Naamanu; mai ia Aratu o le aiga o sa Aratū; mai ia Naamanu o le aiga o sa Naamanū.

⁴¹ O atalii ia o Peniamina i o latou aiga; o i latou na faitaulia, e fa sefulu o afe ma afe e lima ma le toaono selau.

⁴² O atalii ia o Tanu i o latou aiga; na tupu mai ia Suama o le aiga o sa Suamā. O aiga ia o Tanu i o latou aiga.

⁴³ O aiga uma o sa Suamā, o i latou na faitaulia, e ono sefulu o afe ma afe e fa ma le toafā selau.

⁴⁴ O atalii o Asera i o latou aiga; na tupu mai ia Iemina o le aiga o sa Ieminā; mai ia Iesivi o le aiga o sa Iesivī; mai ia Peria o le aiga o sa Periā.

⁴⁵ O atalii o Peria; mai ia Kaveru o le aiga o sa Kaverū; mai ia Mekielu o le aiga o sa mekielū.

⁴⁶ O le igoa foi o le afafine o Asera o Sera.

⁴⁷ O aiga ia o atalii o Asera, o i latou na faitaulia, e lima sefulu o afe ma afe e tolu ma le toafā selau.

⁴⁸ O atalii o Nafatali i o latou aiga; na tupu mai ia Iasielu o le aiga o sa Iasielū; mai ia Kuni o le aiga o sa Kunī;

⁴⁹ mai ia Iesaru o le aiga o sa Iesaru; mai ia Selimo o le aiga o sa Selimō.

⁵⁰ O aiga ia o Nafatali i o latou aiga; o i latou na faitaulia, e fa sefulu o afe ma afe e lima ma le toafā o selau.

⁵¹ O i latou ia o le fanauga a Isaraelu na faitaulia, e ono selau o afe ma le afe e tasi ma le fitu selau ma le toatolu sefulu.

⁵² Ona fetalai mai ai lea o Ieova ia Mose, ua faapea mai,

⁵³ O i latou ia ia tufatufaina atu i ai le fanua e fai ma tofi, ia faatatau i le faitau o igoa;

⁵⁴ o e toatele ia e avatu i ai le tofi ia tele; a o e toaitiiti ia e avatu i ai le tofi ia itiiti; e te avatu lona tofi i le tagata e tusa ma le faitau o e ua ia te ia.

⁵⁵ A e peitai e tufatufaina le fanua i le vili; e fai foi o latou tofi e tusa ma igoa o itu aiga o latou tamā;

⁵⁶ e tufatufaina foi e tusa ma le vili o le tofi i e toatele atoa foi ma e toaitiiti.

⁵⁷ O i latou foi ia na faitaulia i sa Levī i o latou aiga; na tupu mai ia Keresona o le aiga o sa Keresonā; mai ia Koato o le aiga o sa Koatō; mai ia Merari o le aiga o sa Merarī.

⁵⁸ O aiga ia o Levi; o le aiga o sa Lepenī, o le aiga o sa Heperonā, o le aiga o sa Maalī, o le aiga o sa Musē, o le aiga o sa Korū. Na fanaua foi e Koato o Amaramo.

⁵⁹ O le igoa foi o le avā a Amaramo o Iokapeta, o le afafine ia o Levi, na fanaua o ia ia Levi i Aikupito; na fanaua foi e ia ia Amaramo o Arona ma Mose, ma lo la tuafafine o Miriama.

⁶⁰ Na fanaua foi ia Arona o Natapu ma Aviu, o Eleasaro ma Itamaro.

⁶¹ A ua oti Natapu ma Aviu ina o la avatu le afi ese i luma o Ieova.

⁶² O i latou foi na faitaulia e lua sefulu o afe ma afe e tolu, o tane uma, e afua mai i e ua tasi lo latou masina, atoa ma e ua matutua ai; auā e lei faitaulia i latou faatasi ma le fanauga a Isaraelu, ona ua le avatua se tofi ia te i latou faatasi ma le fanauga a Isaraelu.

⁶³ O i latou ia na faitaulia e Mose ma Eleasaro le ositaulaga; o i laua na faitaulia le fanauga a Isaraelu i le eleele laugatasi o Moapi, e latalata ane i Ioritana, e fesagai ma Ieriko.

⁶⁴ A e le o i ai ia te i latou nei se tagata e toatasi na faitaulia e Mose ma Arona le ositaulaga, ina o la faitaulia le fanauga a Isaraelu i le vao o Sinai.

⁶⁵ Auā na fetalai mai Ieova ia te i latou, E matuā oti lava i latou i le vao. Na le toe lava so latou e toatasi; na o Kalepo le atalii o Iefune, ma Iosua le atalii o Nuno.