Numera 25 - O LE TUSI PAIA

O LE MATAUPU XXV. O le agasala a le nuu o Isaraelu ma fafine o Mitiana.

¹ Ua nonofo Isaraelu i Setima; ona amata lea ona faitaaga o le nuu ma fafine o Moapi.

² Ua latou aami foi i le nuu i taulaga i o latou atua; ona aai ai lea o le nuu, ma ifo atu i o latou atua.

³ Ua faatasia foi Isaraelu ma Paalapeoro; ona tupu ai lea o le toasa o Ieova ia Isaraelu.

⁴ Ona fetalai mai ai lea o Ieova ia Mose, Ia e ave alii uma o le nuu, ma faatāutau ia te i latou i le la, i luma o Ieova, ina ia liuesea le toasa tele o Ieova ia Isaraelu.

⁵ Ona fai atu ai lea o Mose i faamasino o Isaraelu, Ia outou taitasi ma fasioti i ona tagata na latou faatasi ma Paalapeoro.

⁶ Faauta foi, o le tasi tagata mai le fanauga a Isaraelu ua sau, ua ia au mai i ona uso o le fafine Mitiana, i luma o Mose, ma luma o le faapotopotoga uma o le fanauga a Isaraelu, a o fetagisi i latou i le faitotoa o le fale fetafai o le faapotopotoga.

⁷ Ua iloa foi e Fineaso le atalii o Eleasaro, o le atalii ia o Arona le faitaulaga; ona tulai ai lea o ia ai totonu o le faapotopotoga, ua ave le tao i lona lima.

⁸ Ua mulimuli atu foi o ia i le tagata o Isaraelu i le afeafe, ua sosoa ua aati ia te i laua, o le tagata o Isaraelu, atoa foi ma le fafine i lona manava; ona taofia ai lea o le faamai ai le fanauga a Isaraelu.

⁹ O e na oti foi i le faamai e luafulu o afe ma le fa o afe i latou.

¹⁰ Ona fetalai mai ai lea o Ieova ia Mose, ua faapea mai,

¹¹ O Fineaso le atalii o Eleasaro, o le atalii o Arona le faitaulaga ua liueseina ai lo‘u ita i le fanauga a Isaraelu, i lo‘u maelega ia te i latou, ua ou le faaumatia ai le fanauga a Isaraelu i lo‘u fuā.

¹² O lenei, ia e fai atu, Faauta, ou te tuuina atu ia te ia la‘u feagaiga e manuia ai;

¹³ e ia te ia ma lana fanau pe a mavae atu o ia, o le feagaiga o le faiva o le faitaulaga e faavavau, auā na maelega o ia ona o lona Atua, na faia foi e ia le togiola mo le fanauga a Isaraelu.

¹⁴ O le igoa foi o le tagata Isaraelu na fasiotia, o le na fasiotia faatasi ma le fafine Mitiana, o Semeri le atalii o Salu, o le alii sili foi o ia o le tasi aiga o sa Simeonā.

¹⁵ O le igoa foi o le fafine Mitiana ua fasiotia o Kosepi le afafine o Suro, o le alii sili o ia o le tasi aiga o Mitiana.

¹⁶ Ua fetalai mai foi Ieova ia Mose, ua faapea mai,

¹⁷ Ia outou faatiga ia Mitiana, ma fafasi ia te i latou;

¹⁸ auā ua latou faatiga ia te outou i a latou mailei, ua latou maileia ai outou i le mea a Peoro, ma le mea a Kosepi le afafine o le tasi alii sili o Mitiana, o lo latou fafine na fasiotia i le aso o le faamai ona o le mea a Peoro.