Numera 21 - O LE TUSI PAIA

O LE MATAUPU XXI. O gata feai ua utia ai le nuu; ua faia e Mose le gata uamea.

¹ Ua faalogo le tupu o Arata, o le sa Kananā, sa nofo i le itu i toga, ua o mai Isaraelu i le ala o Atarima, ona tau ai lea o ia ma Isaraelu, ua na ave foi nisi o i latou faatagataotaua.

² Ona faia lea e Isaraelu o lana tauto ia Ieova, ua faapea atu, Afai e te tuuina mai lava lenei nuu i lo‘u lima, ona ou matuā faaumatia ai lea o a latou aai.

³ Ua faafofoga Ieova i le upu a Isaraelu, ua tuuina atu e ia o sa Kananā, ona latou matuā faaumatia ai lea o i latou, atoa ma a latou aai; ona faaigoa ai lea e ia o lea mea o Horema.

⁴ Ona o lea o i latou ai le mauga o Horo i le ala i le sami Ulaula, ina ia faataamilo i le nuu o Etoma; ona tiga lea o loto o le nuu ona o le ala.

⁵ Ona fai upu ai lea o le nuu i le Atua ma Mose, ua faapea, Se a ea le mea na oulua aveina ae ai i matou nai Aikupito e oti ai i le vao? Auā e leai ni mea e ‘ai, e leai foi ni vai, o loo ‘ino‘ino foi o matou loto i nei mea e ‘ai faatauvaa.

⁶ Ona auina mai ai lea e Ieova o gata uogo i le nuu, ua feutia ai le nuu, ona oti ai lea o tagata e toatele o Isaraelu.

⁷ Ona o mai ai lea o le nuu ia Mose, ua latou faapea mai, Ua matou agasala, auā ua matou fai upu ia Ieova atoa foi ma oe; ia e tatalo atu ia Ieova ia ave ese e ia ia gata ia te i matou. Ona tatalo ai lea o Mose mo le nuu.

⁸ Ona fetalai mai ai lea o Ieova ia Mose, Ia e faia se gata uogo, ma tuu ae i luga i se laau, ona taitasi ai lea ma ola o e ua utia pe a vaavaai atu i ai.

⁹ Ona faia lea e Mose o le gata ‘apa memea, ma tuu ae i luga i se laau; ona faapea ai lea, afai ua utia se tasi e se gata, pe a vaai o ia i le gata ‘apa memea ua ola lava ia.

¹⁰ Ona o atu ai lea o le fanauga a Isaraelu, ma latou to lauapi i Opoto.

¹¹ Ona o atu lea o i latou ai Opoto, ma latou to lauapi i Ieaperima i le vao, o loo feagai ma Moapi, i le itu e alu ae ai le la.

¹² Ua o atu i latou ai lea mea, ma latou to lauapi i le alia o Sareta.

¹³ Ona o atu lea o i latou ai lea mea, ma latou to lauapi i tala atu o Arinona, o loo i le vao e alu atu i le tuaoi o sa Amorī; auā o Arinona o le tuaoi lea o Moapi i le va o Moapi ma sa Amorī.

¹⁴ O le mea lea ua fai mai ai i le tusi o taua a Ieova, O Vaepa i Sufo, ma alia i Arinona;

¹⁵ o le tafe foi o alia o loo alu ifo i le mea e i ai Aro, ma tafe ane i le tuaoi o Moapi.

¹⁶ Ona latou o atu lea ai lea mea, ua oo i Pere; o le vaieli lea na fetalai mai ai Ieova ia Mose, na faapea mai, Ina faapotopoto mai ia le nuu, ona ou foai atu ai lea o le vai ia te i latou.

¹⁷ Ona pepese ai lea o Isaraelu i lenei pese, Le vaieli e, ina e puna ae ia; ia outou tali atu i ai.

¹⁸ O le vaieli na elia e alii, na elia e alii o le nuu, atoa ma le faipule, i o latou tootoo. Ona o lea o i latou ai le vao, ua oo atu i Matana.

¹⁹ Ona o lea o i latou ai Matana, ua oo atu i Nalielu. Ona o lea o i latou ai Nalielu, ua oo atu i Pamota.

²⁰ Ona latou o atu lea ai Pamota i le vanu i le laueleele o Moapi, ua oo atu i le tumutumu o Peseka, e fesagai ma le vao.

²¹ Ona aauina atu lea e Isaraelu o le sāvali ia Sekono le tupu o sa Amorī, ua faapea atu,

²² Se‘i ou ui atu i lou nuu; matou te le afe ane i fanua po o tovine; matou te le feinu foi i vaieli; na o le ala tele o le tupu matou te ui atu ai, seia matou tuanai atu le tuaoi o lou nuu.

²³ Ua le mafai Sekono ona ui atu o Isaraelu i lona nuu; a ua faapotopotoina e Sekono lona nuu uma, ua alu atu foi o ia e tetee ia Isaraelu i le vao; ua oo atu ia i Iaesa, ua tau ai ma Isaraelu.

²⁴ Ona fasia lea o ia e Isaraelu i le pelu, ua fai foi mo latou lona nuu, e amata i Arinona e oo atu i Iapoka, e oo atu lava i le nuu o le fanauga a Amoni; auā sa faigata le tuaoi o le fanauga a Amoni.

²⁵ Ua aea foi e Isaraelu ia aai uma, ua mau foi Isaraelu i aai uma o sa Amorī, o Hesepona ma ona faoa aai uma lava.

²⁶ Auā o Hesepona o le aai lea o Sekono le tupu o sa Amorī; o ia foi sa muai tau ma le tupu o Moapi, ma faoa lona nuu uma ua pa‘i atu i Arinona.

²⁷ O le mea lea ua faapea mai ai o e fai faataoto, Ina o mai ia i Hesepona, se‘i atiina ae, ma teuteua le aai o Sekono;

²⁸ auā ua alu atu le afi nai Hesepona, o le afi mumū nai le aai o Sekono, ua susunuina ai Aro o Moapi, o alii o mea maualuluga i Arinona.

²⁹ Oi talofa ia te oe Moapi e! ua fano oe, le nuu o Kimosa; ua tuuina e ia ona atalii na sao, ma ona afafine e fai ma tagata o taua ia Sekono le tupu o sa Amorī.

³⁰ Sa matou fanafana atu ia te i latou; ua fano Hesepona e oo i Tipona; sa matou faatafuna ia te i latou ua pa‘i atu i Nofa, e tuaoi ma Metepa.

³¹ Ua mau Isaraelu i le nuu o sa Amorī.

³² Ona aauina atu ai lea e Mose nisi e asiasi i Iasaru, ua faoa foi e i latou ona faoa aai, ma latou tutulieseina sa Amorī na i ai.

³³ Ona latou liliu ane lea, ma o ae i le ala i Vasana; ona alu atu ai lea o Oko le tupu o Vasana e tetee ia te i latou, o ia atoa ma lona nuu uma e tau ai le taua i Eterei.

³⁴ Ona fetalai mai ai lea o Ieova ia Mose, Aua e te fefe ia te ia; auā ua ou tuuina atu i lou lima o ia, ma lona nuu uma, ma lona laueleele; e te faia foi ia te ia e pei ona e faia ia Sekono le tupu o sa Amorī, o le na mau i Hesepona.

³⁵ Ona latou fafasi ai lea ia te ia, ma ona atalii, atoa ma lona nuu uma, ua le toe ai se toatasi ia te ia; ona latou fai ai lea o lona laueleele mo i latou.