Numera 18 - O LE TUSI PAIA

O LE MATAUPU XVIII. O le tofiga o le au ositaulaga ma sa Levi.

¹ Ua fetalai mai foi Ieova ia Arona, O oe, ma ou atalii, ma le aiga o lou tamā faatasi ma oe, e tauave e outou le amioletonu o i le malumalu; o oe foi ma ou atalii faatasi ma oe, e tauave e outou le amioletonu o i lo outou faiva o ositaulaga.

² O ou uso foi o le itu aiga o Levi, o le itu aiga o lou tamā, e te faalatalataina mai i latou faatasi ma oe, ina ia faatasia i latou ia te oe, ma latou auauna ia te oe; a o oe ma ou atalii faatasi ma oe, tou te auauna i luma o le fale fetafai e i ai le tulafono.

³ Latou te tausia foi mea o ia te oe e tausi, ma le tausiga o le fale fetafai uma; tau lava ina ne‘i latou faalatalata i ipu o le malumalu ma le fata faitaulaga, ina ne‘i latou oti, o i latou atoa foi ma outou.

⁴ E faatasia foi i latou ia te oe, ma latou anaana i le tausiga o le fale fetafai o le faapotopotoga, e fai ai le galuega uma o le fale fetafai; a e aua ne‘i faalatalata se tagata ese ia te outou.

⁵ Tou te anaana foi i le tausiga o le malumalu ma le tausiga o le fata faitaulaga, ina ne‘i toe oo le toasa i le fanauga a Isaraelu.

⁶ Faauta, o a‘u foi, ua ou avea o outou uso o sa Levī ai le fanauga a Isaraelu; ua foaiina atu i latou ia te outou, ua foaiina lava mo Ioeva, e fai le galuega o le fale fetafai o le faapotopotoga.

⁷ A o oe ma ou atalii faatasi ma oe, tou te tausia lo outou faiva o ositaulaga i mea uma o le fata faitaulaga, ma mea foi i tua o le ie puipui; tou te auauna ai foi; ua ou foaiina atu lo outou faiva o ositaulaga, o le galuega foaiina lava; o le tagata ese foi e faalatalata i ai e fasiotia lava ia.

⁸ Ua fetalai mai foi Ieova ia Arona, Faauta, o a‘u foi, ua ou foaiina atu ia te oe le tausiga o a‘u taulaga sii i mea paia uma a le fanauga a Isaraelu; ua ou foaiina atu ai ia te oe ma ou atalii ona o le faauuina, o le tulafono lea e faavavau.

⁹ E ia te oe lenei mea i mea e sili ona paia, i taulaga e fai i le afi; o a latou taulaga uma, o a latou taulaga i mea e ‘ai uma, ma a latou taulaga uma mo le agasala, ma a latou taulaga uma mo le sese, latou te au mai ai ia te au, o mea e sili ona paia, e ia te oe ma ou atalii ia mea.

¹⁰ E te ‘ai ai i le mea e sili ona paia; o tane uma latou te aai ai; o le mea paia lava lea mā oe.

¹¹ E ia te oe foi lenei mea; o le taulaga sii ai la latou mea foaiina, ma taulaga lulu uma lava a le fanauga a Isaraelu; ua ou foaiina ia mea ia te oe, o ou atalii foi ma ou afafine faatasi ma oe, o le tulafono lea e faavavau; atoa uma e ua mamā i lou aiga latou te aai ai.

¹² O mea uma e sili ona lelei o i le suāuu, ma mea uma e sili ona lelei o i le uaina ma le saito; o faapolopolo o ia mea latou te aumaia ia Ieova, ou te foaiina ia mea ia te oe.

¹³ O mea uma e muai matutua i o latou fanua, e aumaia e i latou ia Ieova, e ia te oe lava ia mea; atoa uma e ua mamā i lou aiga latou te aai ai.

¹⁴ O mea uma e faatoina mai ia Isaraelu, e ia te oe lava ia mea.

¹⁵ O muai fanau uma i mea ola uma lava e au mai e i latou ia Ieova, o tagata atoa ma manu, e ia te oe lava ia; a e suia lava le ulumatua a le tagata, o le uluai tama foi a le manu e le mamā e suia foi lea.

¹⁶ O e a suia e te suia lava i latou e afua mai i e ua tasi le masina, ia tusa ma lau faatatau, o tupe e lima sekeli, o le sekeli lea o le malumalu, e luafulu o kire lea.

¹⁷ A o le uluai tama a le povi, ma le uluai tama a le mamoe, ma le uluai tama a le ‘oti, e te le suia lava ia; e paia i latou; e te sausauina o latou toto i luga o le fata faitaulaga, e te sunua foi o latou ga‘o o le taulaga e fai i le afi, o le mea manogi lelei lea ia Ieova.

¹⁸ A o latou tino, e fai mā oe lava ia, e faapei ona fai mā oe o le fatafata e luluina ma le alagālima taumatau.

¹⁹ O taulaga sii uma i mea paia e aumaia e le fanauga a Isaraelu ia Ieova ua ou foaiina lava ia te oe, ma ou atalii, ma ou afafine faatasi ma oe, o le tulafono lea e faavavau, o le feagaiga masima lea e faavavau i luma o Ieova ia te oe ma au fanau faatasi ma oe.

²⁰ Ua fetalai mai foi Ieova ia Arona, E te le maua se tofi i o latou laueleele; e leai foi sou fanua ia te i latou; o a‘u lava o lou fanua, ma lou tofi i le fanauga a Isaraelu.

²¹ Faauta foi, ua ou foaiina atu i le fanauga a Levi o lona sefulu o mea uma o i Isaraelu e fai ma tofi ona o la latou galuega latou te auauna ai, o le galuega lea o le fale fetafai o le faapotopotoga.

²² Aua foi ne‘i toe faalatalata le fanauga a Isaraelu i le fale fetafai o le faapotopotoga, ne‘i latou nofo sala, ma oti ai.

²³ A e auauna sa Levī i le galuega o le fale fetafai o le faapotopotoga, e tauave foi e i latou a latou amioletonu; o le tulafono lenei a faavavau i a outou augātupulaga, latou te le maua so latou tofi faatasi ma le fanauga a Isaraelu.

²⁴ A o lona sefulu o mea a le fanauga a Isaraelu latou te aumaia ia Ieova e fai ma taulaga sii, ua ou foaiina ia mea i sa Levī e fai mo latou tofi; o le mea lea na ou fai atu ai ia te i latou, Latou te le maua so latou tofi faatasi ma le fanauga a Isaraelu.

²⁵ Ua fetalai mai foi Ieova ia Mose, ua faapea mai,

²⁶ Ia e fai atu foi i sa Levī, ia faapea atu ia te i latou, Pe a outou talia nai le fanauga a Isaraelu o lona sefulu o mea ua foaiina e a‘u ia te outou mai ia te i latou, e fai mo outou tofi, ona outou au mai ai lea ai ia mea o lona sefulu nai le sefulu e fai ma taulaga sii ia Ieova.

²⁷ E ta‘ua foi ia te outou la outou taulaga sii, e peiseai o le saito ai le mea e soli ai saito, e peiseai foi o le tumu o le mea e soli ai vine.

²⁸ E faapea ona aumaia e outou foi se taulaga sii ia Ieova ai lona sefulu uma i mea tou te maua mai le fanauga a Isaraelu; tou te avatua foi ai ia mea ia Arona le ositaulaga le taulaga sii ia Ieova.

²⁹ E aumaia e outou ia Ieova o taulaga sii uma i mea uma ua foaiina mai ia te outou; o mea uma o i ai e sili ona lelei, o le mea paia o i ai.

³⁰ Ia e fai atu foi ia te i latou, Pe a uma ona siitia e outou o mea e sili ona lelei o i ai, ona ta‘ua lea o ia mea i sa Levī, e peiseai o mea e maua mai i le mea e soli ai saito, e peiseai foi o mea e maua mai i le mea e soli ai vine.

³¹ Tou te aai ai foi i mea uma, o outou ma o outou aiga; auā o le taui lena o la outou galuega i le fale fetafai o le faapotopotoga.

³² Tou te le nofo sala foi ona o lea mea pe a uma ona siitia e outou o mea e sili ona lelei o i ai; aua foi tou te solia mea paia a le fanauga a Isaraelu, ina ne‘i outou oti.