Neemia 8 - O LE TUSI PAIA

O LE MATAUPU VIII. O le faitauina o le tulafono. O le tausamiga o fale apitaga.

¹ Ua faapotopoto mai le nuu uma e pei o se tagata e toatasi i le malae o i luma o le faitotoa o le vai; ona latou fai atu lea ia Esera le tusiupu e au mai le tusi o le tulafono a Mose, na poloai mai ai Ieova ia Isaraelu.

² Ona au mai ai lea e Esera le faitaulaga le tulafono i luma o le faapotopotoga o tane atoa ma fafine, ma i latou uma o e atamamai i faalogo, i le aso muamua i le masina e fitu.

³ Ona ia faitau ai lea i le malae o i luma o le faitotoa o le vai, e afua i le malama ae o le taeao ua oo i le aoauli, i luma o tane ma fafine, ma e atamamai; ua uai mai foi taliga o le nuu uma i le tusi o le tulafono.

⁴ Ua tu foi Esera le tusiupu i luga i le tulaga laau, na latou fausia i lea lava mea; ua tutū faatasi foi ma ia i lona itu taumatau o Matatia, ma Sema, ma Anaia, ma Uria, ma Hilikia, ma Maaseia; a o i lona itu tauagavale, o Petaia, ma Mesaelu, ma Malekia, ma Hasumu, ma Hasepatana, o Sakaria ma Mesulama.

⁵ Ona fofola lea e Esera le tusi i luma o le nuu uma; (auā sa maualuga ia i le nuu uma;) ua ia fofola ai, ona tutū lea i luga o le nuu uma.

⁶ Ona faafetai atu lea o Esera ia Ieova le Atua silisili; ona tali mai lea o le nuu uma, Amene, Amene, ua sisii i luga o latou lima; ma ua latou punonou ma ifo toele ia Ieova.

⁷ O Iosua foi, ma Pani, ma Serepeia, o Iaminu, o Akupa, o Sapetai, o Hotia, o Maaseia, o Kelita, o Asaria, o Iosapata, o Hanana, o Pelaia, ma sa Levī, ua latou faamatalaina atu le tulafono i le nuu, o loo tutū mai foi le nuu.

⁸ Ua latou faitau ma‘e‘a i le tusi i le tulafono a le Atua, ma ua latou folafola atu le uiga, ma faamatalaina atu ia te i latou le mea ua faitauina.

⁹ O Neemia, o le alii e pule lea, ma Esera le faitaulaga, le tusiupu, ma sa Levī o e na a‘oa‘o i le nuu, ua latou fai atu i le nuu uma, O le aso paia lenei ia Ieova lo outou Atua, aua ne‘i outou faanoanoa, aua foi le fetagisi. Auā ua fetagisi le nuu uma, ina ua latou faalogologo i upu o le tulafono.

¹⁰ Ua ia fai atu foi ia te i latou, Ina o ia outou, ina aai mea lololo, ma inu mea suamalie, ma ia outou ave tufaaga ia te i latou e lei saunia se mea mā latou; auā o le aso paia lenei i lo tatou Alii; aua ne‘i tiga foi outou; auā o le fiafia ia Ieova o lo outou malosi lea.

¹¹ Ua faafilemu atu foi e sa Levī i le nuu uma, ua faapea atu, Fifilemu ia outou; auā o le aso paia lenei, aua ne‘i tiga foi outou.

¹² Ona o atu lea o le nuu uma e aai, ma inu, ma ave tufaaga, ma taufaiolioli tele, auā ua latou lagona upu na faailoa atu ia te i latou.

¹³ O le aso lua foi na faapotopotoina ai o matai sili o le nuu uma, o faitaulaga, ma sa Levī, ia Esera le tusiupu, ia a‘oa‘oina ai i latou i upu o le tuafono.

¹⁴ Ona latou iloa lea ua tusia i le tulafono na poloai mai ai Ieova ia Mose, ia nonofo le fanauga a Isaraelu i fale apitaga i le tausamiga i le masina e fitu;

¹⁵ ma ia latou logologoa‘i atu ma tala‘i atu i a latou aai uma, ma Ierusalema, e faapea atu, Ina o atu ia i le mauga, ma au mai la o le olive, ma la o le laau o le olive vao, ma la o le atasi, ma lau pama, ma la o laau lauolaola, e fai a‘i fale apitaga e pei ona tusia.

¹⁶ Ona o atu lea o le nuu, ma ua latou aumaia, ma fai mo latou o fale apitaga, taitoatasi i luga o lona fale, i o latou lotoā foi, ma lotoā o le fale o le Atua, ma le malae o le faitotoa o le vai, ma le malae o le faitotoa o Efaraima.

¹⁷ O le faapotopotoga uma foi o e na o mai mai le tafeaga, ua latou faia fale apitaga, ma ua latou nonofo i fale apitaga; auā talu ona po o Iosua le atalii o Nuno ua oo i lea aso, e lei faapea ona fai e le fanauga a Isaraelu. Sa matuā tele lava le fiafia.

¹⁸ Ua ia faitau foi i le tusi o le tulafono a le Atua i lea aso ma lea aso, e afua i le aso muamua ua oo i le aso e iu ai. O aso e fitu foi ua latou fai ai le tausamiga, ua faia foi le faapotopotoga i le aso e valu, e tusa ma le tu.